વડોદરાની અક્ષર પબ્લિક સ્કૂલના સંચાલકો દ્વારા વાલીઓને શાળામાંથી જ પુસ્તકો ખરીદવા માટે દબાણ કરાઇ રહ્યું છે.
વડોદરાની અક્ષર પબ્લિક સ્કૂલ ફરીવાર વિવાદમાં
અક્ષર પબ્લિક સ્કૂલે શાળામાં જ શરૂ કર્યો બુક સ્ટોલ
વાલીઓને શાળામાંથી જ પુસ્તકો ખરીદવા કરાયું દબાણ
વડોદરામાં સેવાસીમાં આવેલી અક્ષર પબ્લિક સ્કૂલ ફરીવાર વિવાદમાં આવી છે. અક્ષર પબ્લિક સ્કૂલના સંચાલકોની મનમાની સામે આવી છે. અક્ષર પબ્લિક સ્કૂલે શાળામાં જ બુક સ્ટોલ શરૂ કરી દીધો છે. વાલીઓને શાળામાંથી જ પુસ્તકો ખરીદવા માટે દબાણ કરવામાં આવી રહ્યું છે. વાલીઓ જે પુસ્તક ખરીદે છે તેનું બિલ પણ નથી આપવામાં આવતું. બે વર્ષ પહેલાં અક્ષર પબ્લિક સ્કૂલને FRCએ દંડ ફટકાર્યો હતો. તેમ છતાં શાળા સંચાલકોએ ફરી પોતાની મનમાની શરૂ કરી દીધી છે. વડોદરા પેરેન્ટ એસોસિએશને બુક વેચાણનો વીડિયો વાયરલ કર્યો છે.
ઉલ્લેખનીય છે કે, બે વર્ષ પહેલાં જ FRC દ્વારા આ સ્કૂલને દંડ ફટકારવામાં આવ્યો હતો કે શાળા સંચાલકો પુસ્તકનું વેચાણ કરી શકે નહીં. તેમ છતાં આ વર્ષે ફરીવાર અક્ષર પબ્લિક સ્કૂલના સંચાલકોએ સ્કૂલના કેમ્પસમાં જ બુક સ્ટોલ શરૂ કર્યો છે. તેમજ તમામ વાલીઓને શાળામાંથી જ પુસ્તક ખરીદવા માટે દબાણ કરાઇ રહ્યું છે. એ સિવાય જે વાલીઓ પુસ્તકો ખરીદે છે તેઓને બિલ પણ નથી આપવામાં આવતું. આ રીતે સંચાલકો બેવડી કમાણી કરવા માટે વાલીઓ પાસેથી ઉઘાડી લૂંટ ચલાવી રહ્યાં છે. જો કે આ ઘટનાનો પર્દાફાશ કરવા પેરેન્ટ્સ એસોસિએશનના સભ્યોએ ત્યાં પહોંચી તેનો વીડિયો બનાવ્યો હતો. જે વીડિયો હાલમાં ખૂબ વાયરલ થઇ રહ્યો છે. ત્યારે હવે જોવાનું એ રહ્યું કે, FRC અથવા તો જિલ્લા શિક્ષણાધિકારી આ શાળાની વિરૂદ્ધ શું પગલાં લેશે?
સળગતા સવાલ
વારંવાર કેમ શાળાઓ કરે છે મનમાની?
શાળાઓની મનમાની સામે કેમ નથી લેવાતાં પગલાં?
પગલાં લેવામાં શિક્ષણ વિભાગના હાથ કેમ ધ્રુજે છે?
શું શિક્ષણ વિભાગની મીલીભગતથી ચાલે છે મનમાની?
જિલ્લા શિક્ષણ અધિકારી કેમ આવી બાબતોને કરે છે નજરઅંદાજ?