મધ્ય પ્રદેશ / જ્યોતિરાદિત્ય સિંધિયા બાદ વધુ એક કોંગ્રેસ નેતાએ કમલનાથ સરકાર પર સાધ્યું નિશાન

• મધ્ય પ્રદેશ કોંગ્રેસમાં આંતરિક વિખવાદ
• જયોતિરાદિત્ય સિંધિયા બાદ અજયસિંહએ ઉઠાવ્યાં સવાલ
• અજયસિંહે કહ્યું કે કમલનાથ સરકાર અમારું જ નથી સાંભળતી

મધ્યપ્રદેશમાં કોંગ્રેસમાં આંતરીક વિખવાદ વધી રહ્યો છે. પહેલા કોંગ્રેસ નેતા જ્યોતિરાદિત્ય સિંધિયાએ સરકારને ચેતવણી આપી દીધી હતી કે જો ચૂંટણી ઢંઢેરામાં કરેલા વચનો પૂર્ણ નહીં કરવામાં આવે તો રસ્તા પર ઉતરી વિરોધ કરીશું. મધ્ય પ્રદેશમાં અતિથિ શિક્ષક દ્વારા કાયમી કરવાને લઇને વિરોધ પ્રદર્શન કરવામાં આવી રહ્યું હતું.
 

આ દરમિયાન જ્યોતિરાદિત્ય સિંધિયાએ કહ્યું હતું કે હું તમને એક વિશ્વાસ આપવા માગું છું કે તમારી માગણી અમારા ચૂંટણી ઢંઢેરામાં સામેલ છે. અમારો ચૂંટણી ઢંઢેરો અમારા માટે અમારો ગ્રંથ છે. થોડી રાહ જુઓ અને જો વચન પુરુ નહીં થાય તો હું પણ રસ્તા પર ઉતરીશ. જો કે હવે જ્યોતિરાદિત્ય સિંધિયા બાદ હવે કોંગ્રેસ નેતા અજયસિંહે પણ કમલનાથ સરકાર વિરુદ્ધમાં નિવેદન આપ્યું.
 

કોંગ્રેસ નેતા અજયસિંહે કહ્યું કે અમે વિચાર્યું હતું કે અમે યુવાઓની બેરોજગારી દૂર કરીશું. સિંચાઇના સાધન વધારીશું, પરંતુ અમારી જ વાત અમારી સરકારમાં કોઇ  સાંભળતું નથી. આમ કમલનાથ સરકાર સામે પોતાના જ નેતાઓ દ્વારા નારાજગીને લઇ વિપક્ષને પણ પ્રહાર કરવાનો મોકો મળી ગયો છે.