રિલાયન્સ Jioએ દેશમાં નંબર 1 ટેલિકોમ કંપનીનું સ્થાન ગ્રહણ કર્યાના થોડા જ સમયમાં તેમના કટ્ટર હરીફ એરટેલે કમબેક કરીને રોકાણકારોને ખુશ કરી દીધા છે. શેરબજારમાં એરટેલે આ વર્ષે કોઈ પણ કંપની કરતા સૌથી શ્રેષ્ઠ પ્રદર્શન કર્યું છે.
ભારતી એરટેલ લિમિટેડના શેરમાં આ વર્ષે તોતિંગ ૨૬% ઉછાળો નોંધાયો છે. નોંધનીય છે કે વિશ્વની ટોચની કંપની એમેઝોન ૨ અબજ ડોલર જેટલું રોકાણ કરવાની યોજના ધરાવે છે જેથી માર્કેટમાં સકારાત્મક વાતાવરણ જોવા મળ્યું છે.
સુપ્રીમ કોર્ટે AGR મુદ્દે કરોડો રૂપિયા ચુકવવાનો આદેશ કર્યો હતો
સુપ્રીમ કોર્ટે એરટેલ અને વોડાફોનને AGR મુદ્દે કરોડો રૂપિયા ચુકવવાનો આદેશ કર્યો હતો અને આ મુદ્દે બંને કંપનીઓને જબરજસ્ત આર્થિક ફટકો પડ્યો હતો પણ હવે તેમણે સ્ટોક માર્કેટમાંથી એક્વિટી સ્વરૂપે ઘણી મૂડી ઉભી કરી છે અને Jio સામે મજબૂત હરીફાઈ ઉભી કરી છે. નોંધનીય છે કે Jioએ સફાયો બોલાવ્યા બાદ હવે BSNL સરકારી ટેલિકોમ સિવાય ફક્ત 3 જ ખાનગી કંપનીઓ અસ્તિત્વ ધરાવે છે.
એરટેલ પણ ઈ કોમર્સ, ઈ પેમેન્ટ વગેરે ક્ષેત્રોમાં ઝંપલાવે તેવી શક્યતા
એરટેલના નિવેદન પ્રમાણે અત્યારે તેઓ એમેઝોનને તેમનો હિસ્સો વેચવામાં રસ ધરાવતા નથી. નોંધનીય છે કે ટેલિકોમ વિભાગ હવે વપરાશકર્તાઓની સંખ્યા અને ટેરિફના ભાવથી આગળ વધી ગયો છે. Jioએ હવે ઈ કોમર્સ, ઈ પેમેન્ટ અને ઓનલાઈન એન્ટરટેનમેન્ટ ક્ષેત્રે પણ ઝંપલાવ્યું છે.
એરટેલ પણ Jioના પગલે ચાલી રહ્યું છે જેમાં હવે તે એમેઝોન સાથે મળીને OTT પ્લેટફોર્મ, ઈ કોમર્સ, ઈ પેમેન્ટ વગેરે ક્ષેત્રે પોતાની યોજના આગળ વધારવા જઈ રહ્યું છે તેવા રોઈટર્સ તરફથી મળેલા અહેવાલ છે. એરટેલને કોર્ટના ચુકાદા પ્રમાણે AGRની ચુકવણી માટે અને પોતાનું 4G કવરેજ દેશભર ઉભું કરવા માટે કેપિટલ વધારવાની જરૂર છે.