અત્યારે ગ્રાહકોને 160 રૂપિયામાં 16 જીબી ડેટા મળી રહ્યો છે : મિત્તલ
આટલી કિંમતમાં એક મહિનામાં માત્ર 1.6 GB ડેટા જ વાપરો નહીં વધારે પૈસા ચૂકવો : મિત્તલ
ભારતમાં મોબાઈલ ડેટાની કિંમતો વધારવા માટે માંગ કરી રહેલા ટેલિકોમ કંપનીઓ આવનાર સમયમાં પોતાના ગ્રાહકોને જોરદાર ઝટકો આપી શકે છે, ભારતી એરટેલના ચેરમેન સુનીલ મિત્તલ અનુસાર ગ્રાહકોને વર્તમાનમાં 160 રૂપિયામાં 16 જીબી ડેટા મળી રહ્યો છે જ્યારે માત્ર 1.6 GB ડેટા જ મળવો જોઈએ. આમ ચેરમેન અનુસાર ડેટાની કિંમત 100 રૂપિયા પ્રતિ GB હોવી જોઈએ. આમ મિત્તલે પોતાના યુઝર્સને સંકેત આપી દીધા છે કે આવનાર સમયમાં હવે વધારે પૈસા ચૂકવવા તૈયારી રાખવી.
એક ઇવેન્ટમાં સુનીલ મિત્તલે પોતાના યુઝર્સને સલાહ આપી કે તેઓ આટલી કિંમતમાં એક મહિનામાં માત્ર 1.6 GB ડેટા જ વાપરે અથવા તો વધારે રૂપિયા ચૂકવવા તૈયાર રહે. તેમણે કહ્યું કે તે નથી ઇચ્છતા કે 16 GB ડેટાની કિંમત અમેરિકા અને યુરોપની જેમ 50થી 60 ડોલર સુધી જતા રહે પણ તે એવું પણ નથી ઈચ્છતા કે આ ભાવ અત્યારની જેમ માત્ર બે ડોલર પર જ રહે.
નોંધનીય છે કે એરટેલમાં 199ના પ્લાનમાં 24 દિવસ માટે દરરોજ 1 GB ડેટા આપવામાં આવે છે અને હવે ચેરમેનનાં આ નિવેદન પરથી સંભાવનાઓ લગાવવામાં આવી રહી છે કે આવનાર સમયમાં આ પ્લાનમાં 24 દિવસનાં માત્ર 2.4 GB ડેટા જ આપવામાં આવશે.
ચેરમેને વધુમાં કહ્યું કે બિઝનેસને ટકાવી રાખવા માટે પ્રત્યેક યુઝર્સ તરફથી સરેરાશ 300 રૂપિયા/ મહિના આવક થવી જોઈએ અને કંપનીનું લક્ષ્ય છે કે તે આવતા છ મહિનામાં તેને 200 રૂપિયા પ્રતિ મહિના સુધી પહોંચાડી દે. જૂન મહિનામાં કંપનીને પ્રતિ યુઝર તરફથી માસિક 157 રૂપિયાની આવક થઇ છે.