તમિલનાડુ / આખરે એર ઈન્ડિયાની ફ્લાઈટનું સુરક્ષિત લેન્ડિંગ, 140 મુસાફરો સુરક્ષિત, જાણો મામલો

Air India Flight Safe Landing : તમિલનાડુના તિરુચિરાપલ્લીમાં સાંજે એર ઈન્ડિયાની ફ્લાઈટમાં ખામી સર્જાઈ હતી. આ ફ્લાઈટ તિરુચિરાપલ્લી એરપોર્ટ પર કલાકોથી ચક્કર લગાવી રહી હતી અને લેન્ડિંગ કરી શકતી ન હતી. જો કે મળતા સમાચાર મુજબ ફ્લાઈટ સુરક્ષિત રીતે લેન્ડિંગ થઈ ગઈ છે અને 140 મુસાફરો પણ સુરક્ષિત છે કોઈ મોટી જાનહાની થઈ ન હતી. એક સમયે મુસાફરોનો જીવ તાળવે ચોંટી ગયો હતો.

ફ્લાઈટનું સુરક્ષિત લેન્ડિંગ થયું

સૂત્રો પાસેથી મળતી માહિતી મુજબ, ફ્લાઈટમાં હાઈડ્રોલિક્સ ફેઈલ થઈ ગયું હતું. આ કારણે તેને લેન્ડિંગ કરવામાં મુશ્કેલી ઉભી થઈ રહી હતી. જો કે ફ્લાઈટનું સુરક્ષિત લેન્ડિંગ થયું છે. વિમાનમાં સવાર તમામ 140 મુસાફરો સુરક્ષિત છે. આ ફ્લાઈટ ત્રિચીથી શારજાહ જઈ રહી હતી. ફ્લાઇટ એરપોર્ટ પર 8:14 કલાકે લેન્ડ થઈ હતી.

એરપોર્ટ પર ઈમરજન્સી જાહેર કરાઈ હતી

ત્રિચીથી શારજાહ જઈ રહેલી એર ઈન્ડિયાની ફ્લાઈટ નંબર IX613ના પાઈલટની વિનંતી પર તિરુચિરાપલ્લી એરપોર્ટ પર ઈમરજન્સી જાહેર કરવામાં આવી હતી. ટેક-ઓફ દરમિયાન લેન્ડિંગ ગિયરમાં ખામી સર્જાઈ હતી, જેના કારણે પાયલટે પરત ફરવું પડ્યું હતું. તિરુચિરાપલ્લીથી શારજાહ જઈ રહેલી B737-800 લેન્ડિંગ પહેલા ઈંધણ ભરી રહી હતી. એરપોર્ટ પર તમામ નિયમોનું પાલન કરવામાં આવી રહ્યું હતું.

વધુ વાંચો : બાપ રે... યુવકના આંતરડા પર જીવતો વંદો ચોંટેલો, તો બહાર કેવી રીતે નીકાળ્યો? ડૉક્ટરોએ અપનાવી આ ટેક્નિક

કેવી રીતે સર્જાઈ છે હાઈડ્રોલિક ખામી?

ત્રિચી એરપોર્ટના ડાયરેક્ટરના જણાવ્યાનુસાર, પાઇલટે હાઇડ્રોલિક ફોલ્ટ અંગે એર સ્ટેશનને જાણ કરી હતી. એરક્રાફ્ટમાં હાઇડ્રોલિક ખામી ત્યારે સર્જાઈ છે જ્યારે સિસ્ટમ કે જે લેન્ડિંગ ગિયર, બ્રેક્સ અને ફ્લૅપ્સ જેવા મહત્વપૂર્ણ ભાગોને નિયંત્રિત કરવા દબાણયુક્ત પ્રવાહીનો ઉપયોગ કરે છે તે યોગ્ય રીતે કાર્ય કરવાનું બંધ કરે છે. ઉલ્લેખનીય છે કે, ત્રિચીથી શારજાહ જઈ રહેલી એર ઈન્ડિયા એક્સપ્રેસ ફ્લાઈટ હાઈડ્રોલિક ફોલ્ટને કારણે બે કલાક કરતા વધુ સમય સુધી ઉડી રહી હતી. હાલમાં તેનું સુરક્ષિત લેન્ડિંગ થયું છે. આ ફ્લાઈટ સાંજે 5:43 કલાકે ઉડાન ભરી હતી. થોડા સમય પછી, તેમાં ખામી સર્જાઈ હતી.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ