જામનગર / આજી ડેમનું જળતાંડવઃ પૂરના પાણીમાં ફસાયેલ સર્ગભા મહિલા સહિત 20 લોકોનું વાયુસેનાએ કર્યું રેસ્ક્યું

આજી ડેમના જળ તાંડવ સામે આખરે બચાવ કાર્ય પૂર્ણ થયું છે. જોડિયા તાલુકાના ચાર ગામના લોકોનું એરફોર્સ દ્વારા રેસ્ક્યુ કરવામાં આવ્યું છે. એરફોર્સના હેલિકોપ્ટર દ્વારા બાલભા, રણજીતપુર, પીઠળ ગામનું રેસ્ક્યુ કાર્ય પૂર્ણ કરવામાં આવ્યું છે.

અનરાધાર વરસાદના કારણે જાનગરના જોડિયાના ચાર ગામો બેટમાં ફેરવાયા હતા. આજી ડેમમાંથી પાણી છોડવામાં આવતા તમામ ગામોમાં પુરના પાણી ફરી વળ્યા હતા. બીજી તરફ બાલભા, રણજીતપુર અને પીઠળ ગામના જેસળયુ ખેતર વિસ્તારમાં સગર્ભા મહિલા સહિત 20 લોકો પૂરના પાણીમાં ફસાઈ ગયા હતા. જે અંગે તંત્રને જાણ કરાતા વાયુસેના દ્વારા રેસ્ક્યૂ ઓપરેશન હાથ ધરવામાં આવ્યું હતું. વાયુસેનાનું હેલિકોપ્ટર ખરાબ હવામાન વચ્ચે પણ ફસાયેલા લોકો સુધી પહોંચ્યું હતું. ત્યારબાદ તમામ લોકોનું રેસ્ક્યૂ કર્યું હતું.

દિલધડક રેસ્ક્યુ ઓપરેશનના દ્રશ્યો

વરસાદી પાણી ભરાતા 2 અલગ અલગ સ્થળોએ રેસ્ક્યુ કરાયુ. હેલીકોપ્ટરની મદદથી ફસાયેલા તમામ લોકોનો બચાવ કરાયો. બલ્લભા ગામ નજીક ફસાયેલા 14 લોકોને બચાવાયા. તો જિલ્લાના દુર્ગમ સ્થળોએ ફસાયેલા અન્ય 16નું પણ રેસ્ક્યુ કરાયુ.

જોડિયામાં ફસાયેલા સરકારી અધિકારીઓનું રેસ્ક્યુ

જામનગરના જોડિયામાં ફસાયેલા સરકારી અધિકારીઓનું રેસ્ક્યૂ કરી જીવ બચાવાયો છે. મળતી માહિતી પ્રમાણે, અધિકારીઓ શનિવારે પુરની સ્થિતિનો તાગ મેળવવા માટે ગયા હતા. જે દરમિયાન માનપર-હીરાપર વચ્ચે પ્રોબેશન SDM, TDO અને નાયબ મામલતદાર સહિત 6 લોકો પુરના પાણીમાં ફસાઈ ગયા હતા. જે બાદ અધિકારીઓએ પાણીમાંથી બહાર નિકળવા માટે તંત્રની મદદ માગવી પડી હતી. તંત્રના અધિકારીઓ પણ જાણ થતા જ દોડી સ્થળ પર દોડી ગયા હતા. તમામ લોકોનું રેસ્ક્યૂ કરી જામનગર ખાતે ખસેડવામાં આવ્યા હતા.

આજી-3 ડેમ ઓવરફ્લો

જામનગરમાં ભારે વરસાદ થતા આજી-3 ડેમ ઓવરફ્લો થતા ડેમના 10 દરવાજા 7 ફૂટ ખોલાયા છે. નીચાણવાળા ગામને તંત્ર દ્વારા અલર્ટ કરવામાં આવ્યા છે. પખવાડીયામાં ત્રીજી વખત ડેમના દરવાજા ખોલાયા છે.

ઉન્ડ-1 ડેમ ઓવરફ્લો

જામનગરમાં આવેલા ઉન્ડ-1 ડેમ ઓવરફ્લો થયો છે. ડેમ ઓવરફ્લો થતા ડેમના 9 દરવાજા 6 ફૂટ સુધી ખોલાયા હતા. ત્યારે ઉંડ-1 ડેમના 9 દરવાજા ફરી ખોલાયા છે. ખોલાયેલા દરવાજા પરથી 3 ફુટ પાણી વહી રહ્યું છે. નીચાણવાળા વિસ્તારના પૂરની સ્થિતિ સર્જાઈ છે. જેથી તંત્ર દ્વારા એલર્ટ જાહેર કરવામા આવ્યુ છે. નીચાણવાળા વિસ્તારોને સુરક્ષિત સ્થળો પર ખસી જવા આદેશ કરવામાં આવ્યા છે.

ઉન્ડ-2 ડેમમાં પાણીની આવક

જોડીયા પાસે આવેલા ઉન્ડ-2 ડેમમાં પાણીની આવક થતા ડેમના 5 દરવાજા એક ફૂટ ખોલાયા છે. ભારે વરસાદ થતા કંકાવટી ડેમ ઓવરફ્લો થયો છે. કંકાવટી ડેમના 6 દરવાજા ખોલવામાં આવ્યા છે. નીચાણવાળા વિસ્તારોને સલામત સ્થળે ખસેડાયા છે.

રંગમતી નદી ગાંડી તૂર બની

જામનગરની ભાગોળ ગામ પાસે આવેલ રંગમતી નદી ગાંડી તૂર બની છે. ભારે વરસાદને કારણે નદીઓમાં નવી નીર આવ્યાં છે. ઉપરવાસમાં ભારે વરસાદને કારણે પુરની સ્થિતિનું નિર્માણ થયો છે. જામનગરના આસપાના ગામડાઓમાં પડેલા 10થી 12 ઈંચ વરસાદને કારણે નીદીઓ ગાડી તૂર બની છે.