વાયુસેના / ઇઝરાયલ પાસેથી મળ્યો સ્પાઇસ બોમ્બનો પહેલો જથ્થો, બાલાકોટમાં ઉડાવ્યા હતા આતંકી કેમ્પ

• ભારત પહોંચ્યો લેઝર ગાઇડેડ સ્પાઇસ 2000 બોમ્બનો પહેલો જથ્થો
• વાયુસેનાએ બાલાકોટ એરસ્ટ્રાઇકમાં કર્યો હતો ઉપયોગ 
• સ્પાઇસ 2000 બોમ્બનો પહેલો જથ્થો રવિવારે ગ્વાલિયર પહોંચ્યો

વાયુસેનાના મિરાજ-2000 વિમાન સ્પાઇસ-2000 બોમ્બથી લેસ

હાલ ભારતીય વાયુસેનાના મિરાજ-2000 વિમાન સ્પાઇસ-2000 બોમ્બથી લેસ છે. આ એ જ સ્પાઇસ 2000 લેઝર ગાઇડેડ બોમ્બ છે. જેનો ઉપયોગ કરી ભારતીય વાયુસેનાએ પાકિસ્તાનના બાલાકોટમાં તબાહી મચાવી દીધી હતી. અને આંતકવાદી સંગઠન જૈશ-એ-મોહમ્મદના આતંકી શિબિર પર હુમલો કરી તેમના હુમલાને ધૂળમાં મેળવી દીધો હતો. 

લેઝર ગાઇડેડ બોમ્બ એટલા ખતરનાક કે બિલ્ડિંગ ધ્વસ્ત કરી શકે

આ લેઝર ગાઇડેડ બોમ્બ એટલા ખતરનાક છે કે એકવારમાં આખી બિલ્ડિંગને ધ્વસ્ત કરી શકે છે. 300 કરોડ રૂપિયાની લેઝર ગાઇડેડ બોમ્બની વર્તમાન ડીલ પૂર્ણ થયા બાદ વાયુસેના મોટી સંખ્યામાં બોમ્બની ખરીદીનો આદેશ આપશે.

સુખોઇ-30 એમકેઆઇને પણ સ્પાઇસ-2000 બોમ્બથી લેસ કરવાની તૈયારી

ભારતીય વાયુસેના પોતાના લડાકૂ વિમાનોને વધુ શક્તિશાળી બનાવવા માટે સુખોઇ-30 એમકેઆઇને પણ ઇઝરાયલના સ્પાઇસ-2000 બોમ્બથી લેસ કરવાની તૈયારી કરી રહ્યા હતા. જોકે, એ વિશેની જાણકારી પ્રાપ્ત થઇ શકી નથી કે આ પ્રક્રિયા પૂર્ણ થઇ ચૂકી છે કે હજુ પણ ચાલી રહી છે. 

લેઝર ગાઇડેડ બોમ્બ સચોટ નિશાન પર તબાહી મચાવવા માટે સૌથી યોગ્ય માનવામાં આવે છે. લડાકૂ વિમાનોથી આ બોમ્બને સચોટ નિસાન લગાવી દુશ્મનને થોડીક ક્ષણોમાં જ નેસ્તાનાબૂદ કરી શકાય છે. 

આ પહેલા ભારતે ઇઝરાયલ પાસેથી સ્પાઇસ-2000 સ્માર્ટ બોમ્બના 200 યુનિટની ખરીદી કરી હતી. તેની ખાસિયત છે કે તેને એક જીપીએસ ગાઇડેડ કિટની સાથે લગાવામાં આવે છે, જે હવામાં અનપ્લગ્ડ બોમ્બને સચોટ નિશાન લગાવી ઉડાવી શકે છે.