વિરોધ / કૃષિ કાયદાને લઈને રાહુલ ગાંધીનું મોટું નિવેદન, કહ્યું સરકારનું માત્ર એક જ લક્ષ્ય છે કે...

• કૃષિ કાયદાને લઈને રાહુલ ગાંધીના આક્ષેપ 
• મોદી સરકારનું એકમાત્ર હેતુ ખેડૂતોને તેમની ઉપજનું મૂલ્ય ન મળે તે છે : રાહુલ ગાંધી 
• કેન્દ્ર સરકારનું લક્ષ્ય ખેડૂતોના બજારને નષ્ટ કરવાનું છે : રાહુલ ગાંધી 

કોંગ્રેસ નેતા રાહુલ ગાંધીએ મંગળવારે કેન્દ્રના ત્રણ કૃષિ કાયદાઓ ઉપર નિશાન સાધતા કહ્યું હતું કે, ભાજપ સરકારનું લક્ષ્ય ખેડૂતોના બજારને નષ્ટ કરવાનો છે, તેમની ઉપજને યોગ્ય કિંમત ન મળે. રાહુલ ગાંધીએ કહ્યું હતું કે પહેલા બે કાયદા દેશના કૃષિ ક્ષેત્રનો નાશ કરે છે, જ્યારે ત્રીજો ખેડૂતોને ન્યાયથી વંચિત રાખે છે. તેઓ કેરળમાં એક જનસભાને સંબોધી રહ્યા હતા.

રાહુલ ગાંધીના મોદી સરકાર પર ગંભીર આક્ષેપ 

તેમણે આક્ષેપ કર્યો કે,'પ્રથમ કાયદો ખેડૂતોના બજારને નષ્ટ કરશે, બીજા અમીરને તેની ઈચ્છા પ્રમાણેનું જોઈએ તેટલું અનાજ ખરીદવાની અને અમર્યાદિત સ્ટોક કરવાની મંજૂરી આપશે. આ બંને કાયદા તેમને અનાજ અને શાકભાજીના ભાવને નિયંત્રિત કરવાની મંજૂરી આપે છે. 'તેમણે આક્ષેપ કર્યો,' સરકારનો એક જ હેતુ છે, ખેડૂતને તેના ઉત્પાદનની કિંમતથી વંચિત રાખવો.

રાહુલ ગાંધીએ આરોપ લગાવ્યો, "તેથી જ લાખો ખેડૂતો આજે વિરોધ પ્રદર્શન કરી રહ્યા છે. વડા પ્રધાને શું કહ્યું? તેઓ આતંકવાદી છે.'' કોંગ્રેસના નેતાએ આંતરરાષ્ટ્રીય બજારમાં તેલની ઓછી કિંમતો હોવા છતાં પણ પેટ્રોલ-ડીઝલના વધતાં ભાવને લઈને કેન્દ્ર અને રાજ્ય સરકાર પર નિશાન સાધ્યું હતું અને દાવો કર્યો હતો કે બંને સરકારો દેશના ધનિક લોકોને પૈસા ચૂકવે છે. 

 પેટ્રોલ-ડીઝલની કિંમતોને લઈને પણ સાધ્યું નિશાન

સરકાર પર પ્રહાર કરતાં તેમણે કહ્યું, 'આંતરરાષ્ટ્રીય બજારમાં તેલની કિંમત ઓછી છે, પરંતુ ભારતમાં પેટ્રોલ અને ડીઝલની કિંમતોમાં વધારો થઈ રહ્યો છે. તમારા ખિસ્સામાંથી દરરોજ હજારો કરોડો રૂપિયા લેવામાં આવી રહ્યા છે. આ પૈસા ક્યાં જાય છે? આ પૈસા કોને અપાય છે? '