દિલ્હી એમ્સના સૂત્રોના જણાવ્યા અનુસાર હોસ્પિટલમાં હવે ઓક્સિજન અને બેડની ઘટ પડી રહી છે, જેના પછી અહીં નવા દર્દીઓની ભરતી હાલમાં રોકી દેવામાં આવી છે.
દિલ્હીમાં કોરોના કેસો સતત વધી રહ્યા છે
દિલ્હી એમ્સમાં પણ ઓક્સિજનની ઘટ, નવા દર્દીઓને એડમિટ નથી કરાતા : સૂત્રો
ઓવરલોડના કારણે હાલમાં નવા દર્દીઓ નહીં : હોસ્પિટલ સૂત્રો
કોરોના સંક્રમણની ઝડપ હાલમાં એટલી તીવ્ર થઈ ગઈ છે કે દેશભરના હોસ્પિટલોમાં નવા દર્દીઓને ભરતી કરવા માટે હવે બેડ, આઇસીયુ બેડ અને ઓક્સિજન જેવી સુવિધાઓની અછત થવા માંડી છે, હવે સમાચાર આવી રહ્યા છે કે દેશની સૌથી પ્રમુખ હોસ્પિટલમાંથી એક ગણાતી એવી દિલ્હી એમ્સમાં પણ હાલ પૂરતા નવા દર્દીઓને ભરતી કરવા પર રોક લગાવી દેવામાં આવી છે. મહત્વનું છે કે સૂત્રો દ્વારા આ જાણકારી મળી છે.
દિલ્હી એમ્સમાં હવે દર્દીઓને ભરતી નથી કરાઇ રહ્યા : સૂત્રો
સૂત્રોએ વધુમાં જણાવ્યું હતું કે એમ્સમાં ઓક્સિજનની અછત છે, માટે જેને અત્યાર સુધીમાં દાખલ કરવામાં આવ્યા છે તેમની જ સારવાર કરવામાં આવી રહી છે, હવે અહીં વધુ દર્દીઓને ભરતી કરી શકે તેમ નથી, ના તો અહીં કોઈ જગ્યા છે, કે ના જ કોઈ ઓક્સિજન છે.
જો કે હોસ્પિટલના સૂત્રોએ એમ પણ જાણકારી આપી હતી કે આ બધું પરમેનેન્ટ નથી અને ઇમરજન્સી પણ બંધ નથી કરવામાં આવી, માત્ર ઓવરલોડના કારણે દર્દીઓને ભરતી નથી કરાઇ રહ્યા.
દેશમાં રોકાઈ નથી રહી કોરોનાની રફતાર
મહત્વનું છે કે હાલમાં દેશમાં કોરોના કેસોની સંખ્યા સતત વધતી જ જઈ રહી છે, અને તે નિયંત્રણ બહાર થઈ રહી છે, શુક્રવારે અહીં 3.32 લાખ કેસ નોંધાયા હતા અને દેશમાં એક્ટિવ કેસની સંખ્યા પણ વધીને 24.28 લાખ જેટલી થઈ ગઈ છે. 24 કલાકમાં 2263 લોકોના મોત પણ થયા છે.
જો દિલ્હીની જ વાત કરવામાં આવે તો અહીં પણ કોરોનાના કેસો રોજ નવો રેકરોડ તોડી રહ્યા છે, છેલ્લા 24 કલાકમાં અહીં પણ 24,331 નવા કેસ નોંધાયા છે અને 348 મોત થયા હતા. આ અત્યાર સુધીના સૌથી વધુ આંકડા છે, દિલ્હીમાં હાલમાં 92,029 એક્ટિવ કેસ છે.