ઉત્તર પ્રદેશના ચૌબેપુરમાં આઠ પોલીસ કર્મચારીઓની હત્યાના કેસમાં ફરાર થયેલા વિકાસ દુબેના નિકટતમ સહયોગી અમર દુબેને ઉત્તર પ્રદેશ એસટીએફએ આજે સવારે એન્કાઉન્ટરમાં ઠાર માર્યો છે.
મૌદહામાં થયેલા એન્કાઉન્ટરમાં અમર દુબે ઠાર
અમર દુબે ગેંગસ્ટર વિકાસ દુબેનો રાઇટ હેન્ડ હોવાનું કહેવાય છે
મુખ્ય આરોપી વિકાસ દુબે હજુ પણ ફરાર
પોલીસે તેના માથે ૨૫ હજારનું ઈનામ જાહેર કર્યું હતું
હમીરપુરના મૌદહામાં થયેલા એન્કાઉન્ટરમાં અમર દુબે ઠાર મરાયો છે. અમર દુબે પણ કાનપુરકાંડમાં વોન્ટેડ હતો. યુપી એસટીએફના જણાવ્યા મુજબ અમર દુબેને તેમણે ઘેર્યો તો તેણે અચાનક ફાયરિંગ શરૂ કરી દીધું હતું. ત્યારબાદ જવાબી ફાયરિંગમાં અમર દુબેનું મોત થયું હતું. એન્કાઉન્ટરમાં ઠાર મરાયેલો અમર દુબે ગેંગસ્ટર વિકાસ દુબેનો રાઇટ હેન્ડ હોવાનું કહેવાય છે. તે ચૌબેપુરના વિકરૂ ગામમાં થયેલા શૂટઆઉટમાં પણ સામેલ હતો અને પોલીસે તેના માથે ૨૫ હજારનું ઈનામ જાહેર કર્યું હતું.
સૂત્રો દ્વારા મળતી માહિતી મુજબ પોલીસ તેને મારવા નહોતી માગતી પણ જીવતો પકડવા માગતી હતી, પરંતુ જ્યારે એસટીએફએ તેને સરેન્ડર કરવાનું કહ્યું તો તેણે અચાનક જ ફાયરિંગ શરૂ કરી દીધું હતું. ત્યારબાદ જવાબી ફાયરિંગમાં તે ઠાર મરાયો હતો.
સરેન્ડર કરશે વિકાસ દુબે ?
બીજી તરફ મુખ્ય આરોપી વિકાસ દુબે હજુ પણ ફરાર છે. તેને પણ પોતાનું એન્કાઉન્ટર થઈ જશે એવો ડર છે. સૂત્રો પાસેથી મળતી માહિતી મુજબ તે પોતાના વકીલોના માધ્યમથી કોર્ટમાં સરેન્ડર કરવાના પ્રયાસમાં છે. તેનું છેલ્લું લોકેશન ફરીદાબાદમાં મળ્યું હતું, જ્યારે તે એક હોટલમાં રોકાવા માટે રૂમ લેવા પહોંચ્યો, પરંતુ જ્યારે પોલીસ પહોંચી ત્યારે તે ત્યાંથી જતો રહ્યો હતો. હવે ફરીદાબાદથી તેના બે નજીકના સાગરીતોની કસ્ટડીમાં લઈને પૂછપરછ શરૂ કરી દીધી છે. પોલીસને આશંકા છે કે તે હરિયાણા કે દિલ્હીની કોર્ટમાં સરેન્ડર કરવાનો પ્રયાસમાં છે.
વિકાસ દુબે ફરીદાબાદમાં છુપાયો હોવાની બાતમીના આધારે દરોડા
કાનપુર એન્કાઉન્ટર કેસમાં હિસ્ટ્રીશીટર વિકાસ દુબેને શોધી રહેલી પોલીસને અત્યાર સુધીનો સૌથી મોટો ક્લૂ મળ્યો છે. હીચકારી ઘટનાને અંજામ આપ્યા બાદ પહેલી વાર હરિયાણાના ફરીદાબાદના બડખલચોક પર આવેલી શ્રી સાસારામ હોટલમાં હત્યારો હિસ્ટ્રીશીટર વિકાસ દુબે જોવા મળ્યો હતો. હોટલના માલિકના જણાવ્યા મુજબ તે વ્યક્તિ સાડા બાર વાગ્યે શ્રી સાસારામ ગેસ્ટ હાઉસમાં આવ્યો હતો. તેણે પોતાનું નામ અંકુર જણાવ્યું હતું. થોડી વાર માટે રૂમ લેવાની વાત કરી અને ત્યારબાદ જ્યારે ઓળખપત્ર માગ્યું ત્યારે તેણે પોતાનું પાનકાર્ડ આપ્યું, જે સ્પષ્ટ નહોતું. કોઈ અન્ય ઓળખપત્ર દેખાડવાનું કહ્યું ત્યારે તે પાછો જતો રહ્યો હતો. પોલીસને જ્યારે વિકાસ દુબે હોટલમાં હોવાની બાતમી મળી ત્યારે પોલીસે હોટલ પર રેડ કરી પણ વિકાસ દુબે ત્યાં મળ્યો નહોતો, પરંતુ ફરીદાબાદ પોલીસે વિકાસ દુબેના બે સાથીને પકડ્યા છે. દરોડા વખતે પોલીસના ૩૦થી ૩૫ જવાન અને અધિકારીઓ સાદા ડ્રેસમાં તહેનાત હતા.
પોલીસે વિકાસ દુબેના બે સાથીઓ પ્રભાત અને અંકુરની ધરપકડ કરી લીધી છે, જોકે વિકાસ ત્યાંથી ભાગી ગયો છે. આ બંનેની હાલ પૂછપરછ ચાલુ છે.