નાના બાળકોના રડવાને નજરઅંદાજ કરવાનું ક્યારેક ભારે પડી જતું હોય છે. ઘણીવાર આપણે બાળકોના રડવાને સામાન્ય રડવાનું સમજી લઇએ છીએ. તેની પાછળ કારણ ક્યારેક કંઇક અલગ હોય છે.
જ્યારે અસલી વાત સામે આવે છે ત્યારે થાય છે કાશ આ પહેલા સમજી લીધું હોત. વૈજ્ઞાનિકોએ હવે બાળકોનો વધુ સારી રીતે ખ્યાલ રાખવા માટે આર્ટીફિશિયલ ઇન્ટેલિજન્સી યુક્ત એક નવું ટુલ વિકસાવ્યુ છે, જે બાળકોના રડવાનું અસલી કારણ જણાવશે.
આ ટુલ દ્વારા જાણી શકાશે કે બાળક કોઇ બિમારીના કારણે રડે છે કે સામાન્ય કારણે. કેટલાક અનુભવી હેલ્થ વર્કર અને અનુભવી માતા પિતા બાળકોની જરુરિયાતને તેમના રડવાના અવાજથી સ્પષ્ટ રીતે ઓળખી જાય છે, પરંતુ આ બધા માટે સરળ હોતું નથી.
અમેરિકાની નોર્ધન ઈલિનોઈસ યુનિવર્સીટીના સંશોધકોએ જણાવ્યુ કે દરેક બાળકની રડવાની રીત અલગ હોય છે, પરંતુ જ્યારે તે કોઇ બિમારીના કારણે રડે છે ત્યારે બધા બાળકોના રડવામાં કંઇકને કંઇક કોમન હોય છે. તેમના રડવામાં એજ છુપાયેલી પેટર્ન ઓળખી શકવી મુશ્કેલ હોય છે. આ બાબતની જાણ માટે વૈજ્ઞાનિકોએ એક નવું એઆઇ ટુલ બનાવ્યુ છે. તેમાં એક નવા પ્રકારની ક્રાઇ લેંગ્વેજ બનાવાઈ છે. જેના માધ્યમથી સામાન્ય સ્થિતિમાં કે અસામાન્ય સ્થિતિમાં બાળકના રડવાની જાણ થઇ શકશે.
અલગ અલગ બિમારીઓના કારણે બાળકોના રડવામાં અલગ અલગ સિગ્નલ મળે છે. એઆઇ ટુલ દ્વારા તેને ઓળખી શકાય છે અને બિમારીની યોગ્ય જાણ થાય છે. વૈજ્ઞાનિકોએ બનાવેલું એઆઇ ટુલ શોરબકોરમાં પણ બાળકોના રડવાનો અવાજ ઓળખી લેશે. આ માટે ક્મ્પ્રેસ્ડ સેન્સિંગગ ટેકનીકનો ઉપયોગ કરાયો છે. આ એક એવી પ્રક્રિયા છે જેમાં ઓછા સિગ્નલમાં પણ અવાજ પકડાઇ જાય છે.