સોશિયલ મીડિયા પર જાળ બિછાવી ભોળી યુવતીઓને છેતરતા જય નાગર વિરુદ્ધ બોપલ બાદ હવે આનંદનગર પોલીસ સ્ટેશનમાં પણ ફરિયાદ નોંધાઈ. પરિણીતાને ભોળવી દાગીના પડાવી લીધા
ઈન્સ્ટાગ્રામ પર નકલી આઈડી બનાવી ઠગાઈ કરતા શખ્શ વિરૂદ્ધ ફરિયાદ નોંધાઈ
યુવતિને લાલચ આપી તેઓની પાસેથી સોનાના દાગીના પડાવતો હતો
પોલીસે ગુનો નોંધી તપાસ હાધ ધરી છે
લક્ઝુરિયસ લાઇફ જીવવાની લાલચમાં કેટલીક યુવતીઓ સોશિયલ મીડિયામાં શાતિર લોકોની જાળમાં ફસાઈને પૈસા તો ગુમાવે જ છે ઉપરાંત બદનામી પણ વહોરી લેતી હોય છે. ઇન્સ્ટાગ્રામ પર નકલી આઇડી બનાવીને અમદાવાદની યુવતીઓ પાસેથી સોનાના દાગીના પડાવતા ખતરનાક ઠગ વિરુદ્ધ વધુ એક ફરિયાદ નોંધાઇ છે. રણવીરસિંહની ફિલ્મ ‘લેડીઝ વર્સિસ રિકી બહલ’ જેવો ઠગાઈનો સિલસિલો અમદાવાદમાં ફરી શરૂ થતાં પોલીસ હરકતમાં આવી છે.
આનંદનગર વિસ્તારમાં રહેતી એક પરિણીતા સીમા (નામ બદલ્યું છે)એ આનંદનગર પોલીસ સ્ટેશનમાં જય નાગર નામના ઠગ વિરુદ્ધ ચીટિંગની તેમજ ધમકીની ફરિયાદ કરી છે. સીમા ઇન્સ્ટાગ્રામનો ઉપયોગ કરે છે અને ૨૦૨૧માં shubham_7250 નામની આઇડી પરથી ફોલો રિકવેસ્ટ આવી હતી. સીમાએ રિકવેસ્ટ એક્સેપ્ટ કરી હતી અને બાદમાં તેમની ઇન્સ્ટાગ્રામના મેસેજમાં વાતચીત થતી હતી. સીમાએ તેનું નામ પૂછતાં તેણે પોતાનું નામ શુભમ્ નાગર બતાવ્યું હતું. શુભમ્ નાગરે સીમાને વિશ્વાસમાં લીધી હતી અને બાદમાં કહ્યું હતું કે તારી પાસે રહેલુ સોનુ મને આપ હું તને તેમાં વધારે સોનુ ઉમેરી પરત આપીશ. સીમાને શુભમ્ પર વિશ્વાસ આવી જતાં તેણે હા પાડી દીધી હતી. શુભમે સીમાને કહ્યું હતું કે મારો નાનો ભાઇ જય નાગર તારી પાસે સોનુ લેવા માટે આવશે. તું તેને આપી દેજે. બીજા દિવસે સીમાના નંબર પર જય નાગરનો ફોન આવ્યો હતો અને તેને કહ્યું હતું કે હું જોધપુર ગામ ચાર રસ્તા પાસે ઊભો છું તમે મને સોનુ આપી જાવ.
સીમાએ ઘરમાં રહેલું સોનુ જય નાગરને આપી દીધુ હતું ત્યારે તેણે સીમાને કહ્યું હતું કે તારે બીજી વાર મને વધારે સોનુ આપવું પડશે. જો તું મને બીજી વાર સોનુ નહીં આપે તો હું તારા પતિને જાનથી મારી નાખીશ. સીમા ગભરાઇ ગઇ હતી અને તેના ઘરે જતી રહી હતી. ડરના કારણે સીમાએ શુભમ્ નાગર સાથે ઇન્સ્ટાગ્રામના મેસેજમાં વાતચીત કરી હતી. સીમાએ પોતાનું સોનુ પરત માગ્યું હતું પરંતુ જય નાગરે પરત આપ્યું નહી. માર્ચ ૨૦૨૩માં શુભમ્ નાગરે સીમા પાસેથી વધુ સોનુ માગ્યું હતું. જેથી તેણે ડરીને સોનુ આપવાની હા પાડી દીધી હતી. બીજા દિવસે શ્યામલ ચાર રસ્તા પાસેથી જય નાગર સીમા પાસેથી સોનુ લઇને જતો રહ્યો હતો. સીમાએ પોતાનું સોનુ પરત માગતાં શુભમે તેને આપવાનો ઇનકાર કરી દીધો હતો. સીમાએ તપાસ કરાવી તો જાણવા મળ્યું હતું કે જય નાગરે ઇન્સ્ટાગ્રામ પર શુભમ્ નાગર નામની ખોટી આઇડી બનાવી હતી. સીમાએ સમગ્ર હકીકત તેના પતિને કહી દેતાં અંતે ગઇ કાલે આનંદનગર પોલીસ સ્ટેશનમાં ફરિયાદ નોંધાઇ છે.
ફોટો વાઈરલ કરવાની ધમકી આપીને એક લાખથી વધારે રૂપિયા તથા સોનાના દાગીના માગ્યા
ઉલ્લેખનીય છે કે બોપલ પોલીસ સ્ટેશનમાં પણ જય નાગર વિરુદ્ધ અન્ય એક યુવતીએ ફરિયાદ કરી હતી. બોપલ વિસ્તારમાં રહેતી રીચા (નામ બદલ્યું છે)એ shubham_7250ની ફ્રેન્ડ રિક્વેસ્ટ સ્વીકારી લીધી હતી. શુભમ્ ઇન્સ્ટાગ્રામના મેસેજમાં રીચા સાથે મેસેજમાં વાતચીત કરતો હતો. આ દરમિયાન શુભમે રીચાને વિશ્વાસમાં લઈને તેના ન્યૂડ ફોટો મેળવી લીધા હતા. બાદમાં તેને ફોટો વાઈરલ કરવાની ધમકી આપીને એક લાખથી વધારે રૂપિયા તથા સોનાના દાગીના માગ્યા હતા. રીચાએ તપાસ કરાવી તો જાણવા મળ્યું કે ઇસનપુરનો જય નાગર નામનો યુવક શુભમ્ નામની ખોટી આઇડી બનાવીને ચીટિંગ કરે છે.
મોંઘીદાટ કાર સાથે ફોટો અપલોડ કરી યુવતીઓને ફસાવતો
યુવતીઓને બ્લેકમેઇલ કરવા માટે જય નાગર લક્ઝરી કાર તેમજ હાઇફાઇ લાઇફ સ્ટાઇલ જીવે છે તેવા ફોટોગ્રાફ્સ ઇન્સ્ટાગ્રામની shubham_7250 આઇડી પર અપલોડ કરતો હતો. ફોટોગ્રાફ્સના આધારે જય તમામ યુવતીઓને રિકવેસ્ટ મોકલતો હતો અને બાદમાં મેસેજ મારફતે વાતચીત ચાલુ કરતો હતો. યુવતી રિપ્લાય આપે એટલે તેને લોભામણી લાલચ આપીને ફસાવતો હતો. યુવતી એટલી હદે જયની દીવાની થઇ જતી હતી કે તે સોનુ પણ આપવા તૈયાર થઇ જતી હતી. જયના ઇન્સ્ટાગ્રામ એકાઉન્ટમાં લકઝરી કાર સાથેના ફોટોગ્રાફસ છે તેમજ આઇફોન, આઇવોચ ખરીદી તેના ફોટોગ્રાફ્સ, વિદેશમાં જઇને સ્વીમિંગપૂલમાં નહાતો હોવાના અનેક ફોટોગ્રાફ્સ છે જેને જોઇને યુવતીઓ આકર્ષિત થતી હતી. પોલીસે જયના ઇન્સ્ટાગ્રામ આઇડી પર તપાસ શરૂ કરી છે.બોપલ બાદ આનંદનગર પોલીસ સ્ટેશનમાં ગુનો દાખલ થયા બાદ હજુ પણ જય નાગર વિરુદ્ધમાં અનેક યુવતી સામે આવે તેવી શક્યતાઓ છે. ઉલ્લેખીય છે કે અમદાવાદમાં થોડાં વર્ષો પહેલાં સુજલ સિંઘાનિયા નામના યુવકે સંખ્યાબંધ યુવતીઓ સાથે ચીટિંગ કર્યું હતું ત્યારે હવે જય નાગર વિરુદ્ધ યુવતીઓએ ફરિયાદ નોંધાવવાનું શરૂ કરી દીધું છે.