પોતાની ડ્રિમ કાર લઇને અમદાવાદ શહેરની સફર કરવી કોને ન ગમે? પણ આ સફરમાં ગાડી રસ્તા પર દોડતી નથી પણ મોટા ભાગના સમયે અત્યંત પ્રદૂષિત વાતાવરણમાં રસ્તાઓ ઉપર ટ્રાફિક જામમાં ફસાઈને આપણી ડ્રિમ કાર હોર્ન જ મારતી રહે છે. અમદાવાદમાં આ ચિંતાજનક પરિસ્થિતિ પાછળનું કારણ અને તેના ગંભીર પરિણામો ચોંકાવનારા છે.
રોડ ટ્રાન્સપોર્ટ યરબુક 2016-17ના કેન્દ્રીય સડક અને પરિવહન મંત્રાલયના અહેવાલ મુજબ અમદાવાદ શહેરમાં 48 લાખ નોંધણી પામેલા વાહનો છે. આ વાહનો માટે શહેરમાં રોડ ઉપર ફક્ત 0.54 મીટર એટલે કે ગણીને એક વાહન દીઠ 50 સેન્ટીમીટર જગ્યા મળે છે. આ પરિસ્થિતિ સતત કથળી રહી છે જેનું સૌથી મોટું કારણ એ છે કે 2017થી વાહનોની સંખ્યામાં તોતિંગ વધારો થઇ રહ્યો છે જયારે રોડની લંબાઈમાં કોઈ વધારો થઇ રહ્યો નથી.
આ ઝડપે વધી રહી છે અમદાવાદમાં ગાડીઓ
અમદાવાદમાં ગાડીઓની વસ્તી દર વર્ષે 2.5 થી 3 લાખ રૂપિયા જેટલી વધે છે. ચિંતાજનક રીતે 5 થી 6% જેટલી વાર્ષિક ગાડીઓની સંખ્યા વધે છે.
AMCના અહેવાલ મુજબ શહેરમાં કુલ રોડની લંબાઈ 2580 કિમી છે જે 2017થી સ્થિર રહી છે.
સારા પબ્લિક ટ્રાન્સપોર્ટના અભાવે વધી રહી છે આ સમસ્યા
નિષ્ણાતોના મતે આ રોડની લંબાઈ વાહનોની સુરક્ષાને જોખમાવે છે. આદર્શ રીતે વાહન દીઠ 2 મીટર જગ્યા હોવી જોઈએ. સત્તાધીશો વધી રહેલી ગાડીઓનો સંખ્યા નિયંત્રણમાં લાવી શકતા નથી પણ સારા પબ્લિક ટ્રાન્સપોર્ટથી રસ્તે ચાલી રહેલા વાહનોની સંખ્યા નિયંત્રણમાં લાવી શકે છે.
AMCના એક અધિકારીના મતે AMTSની બસોને BRTS કોરિડોરની બહાર લઇ જવાના નિર્ણયના કારણે શહેરમાં ટ્રાફિકની સ્થિતિ વધુ કથળી છે.
રોડ સેફટીના ટ્રાફિક નિષ્ણાત અમિત ખત્રીના મતે ખાનગી વાહનોની સંખ્યામાં થઇ રહેલા આ વધારા માટે પબ્લિક ટ્રાન્સપોર્ટની નિષ્ફ્ળતા જવાબદાર છે.
અહેવાલના મતે 42 ભારતીય શહેરો જેની વસ્તી 10 લાખથી વધુ છે ત્યાં કુલ 7.28 કરોડથી વધુ વાહનો નોંધાયેલા છે. આ વાહનો ભારતના કુલ નોંધાયેલા વાહનોના 28.75% છે.
કયા શહેરોમાં કેટલા વાહનો
દિલ્હી : 1.03 કરોડ વાહનો
બેંગ્લોર : 68.33 લાખ વાહનો
ચેન્નાઇ : 52.99 લાખ વાહનો
અમદાવાદ : 39.04 લાખ વાહનો
બૃહદ મુંબઈ : 30.53 લાખ વાહનો
સુરત : 28.87 લાખ વાહનો
આ છ જ શહેરો આગળ વાત કરી તે 42 શહેરોના કુલ વાહનમાંથી 44.27% વાહનો ધરાવે છે. સુરતમાં વાહનોનો વૃદ્ધિ દર છેલ્લા 10 વર્ષમાં 12.21% સાથે સૌથી ઉંચો રહ્યો છે.