AMC દ્વારા કોરોના વેક્સિનેશન મહાઅભિયાન હેઠળ સ્લમ વિસ્તારમાં વેક્સિન લો અને એક લિટર ખાદ્યતેલ મેળવો તેવી ખાસ ઝુંબેશ શનિવારથી શરૂ કરાઈ છે.
નો વેક્સિન, નો ઓન રોડ ડ્રાઇવિંગ અતંર્ગત અભિયાન હાથ ધરાશે
AMC અને પોલીસ વિભાગે સંયુક્ત અભિયાન હાથ ધર્યું
વેક્સિન વગરના કોઈપણ વ્યક્તિ માર્ગ પર વાહન ચલાવી નહી શકે
'નો વેક્સિન, નો ઓન રોડ ડ્રાઇવિંગ' ઝુંબેશ હાથ ધરાશે.
મ્યુનિ. તંત્ર દ્વારા કોરોના વેક્સિનેશન મહાઅભિયાન હેઠળ સ્લમ વિસ્તારમાં વેક્સિન લો અને એક લિટર ખાદ્યતેલ મેળવો તેવી ખાસ ઝુંબેશ શનિવારથી શરૂ કરાઈ છે. કાલે 18,749 લાભાર્થીને તેલનાં પાઉચ અપાયાં હતાં તેમજ વેક્સિનેશન માટે આવનારા લોકો પૈકી 25ને ડ્રો કરીને પ્રોત્સાહન તરીકે રૂ.10 હજાર સુધીનો મોબાઇલ ફોન આપવાની યોજના પણ જાહેર કરાઈ છે. હવે લોકોને વેક્સિનેટ કરવા ટ્રાફિક પોલીસ મેદાનમાં ઊતરશે. શહેરના ચાર રસ્તા પર ટ્રાફિક પોલીસ વાહનચાલકોનાં વેક્સિન સર્ટિફિકેટ તપાસશે. બીજા અર્થમાં 'નો વેક્સિન, નો ઓન રોડ ડ્રાઇવિંગ' ઝુંબેશ હાથ ધરાશે.
શહેરના તમામ નાગરિકોને વેક્સિન મળે તે અંતર્ગત અભિયાન હાથ ઘરાયું
શહેરના તમામ નાગરિકોને વેક્સિનનો પહેલો ડોઝ 100 ટકા મળી રહે તે આશયથી 9 ઓક્ટોબરથી વેક્સિન લો, એક લિટર ખાદ્યતેલ મફત મેળવો યોજનાના પહેલા દિવસે સ્લમ વિસ્તારમાં તેલનાં 10 હજાર પાઉચનું વિતરણ કરાયું હતું. આ યોજના અંતર્ગત છેલ્લા બે દિવસમાં કુલ 28,749 લાભાર્થીને એક િલટર તેલનાં પાઉચ અપાઈ ચૂક્યાં છે.
વેક્સિનેશન મહાઅભિયાન હેઠળ વધુ 38,975 લોકોને વેક્સિનેટ કરાયા
વેક્સિનેશન મહાઅભિયાન હેઠળ વધુ 38,975 નાગરિકોને વેક્સિનેટ કરાયા હતા, જે પૈકી 15,573ને પહેલો ડોઝ અને 23,402ને બીજો ડોઝ અપાયો હતો. આ ઉપરાંત એએમટીએસના બસસ્ટેન્ડ પર વધુ 449 પેસેન્જર અને બીઆરટીએસના બસસ્ટેન્ડ પર વધુ 423 પેસેન્જર મળીને કુલ 872 પેસેન્જરનું વેક્સિનેશન કરાયું હતું. વધુ ને વધુ લોકો વેક્સિન લે તે આશયથી ગઈ કાલે મ્યુનિ. તંત્ર અને ટ્રાફિક વિભાગ વચ્ચે એક મહત્ત્વપૂર્ણ બેઠક યોજાઈ હતી, જેમાં ચાર રસ્તા પર ટ્રાફિક પોલીસ વાહનચાલકોનાં વેક્સિનનાં સર્ટિફિકેટ તપાસે અને જે વાહનચાલક તેનો પહેલો અથવા બીજો ડોઝ લીધો હોવાનું સર્ટિફિકેટ બતાવે તેમને જ રોડ પર વાહન હંકારવાની મંજૂરી અપાય તે દિશામાં અગત્યની ચર્ચા હાથ ધરાઈ હતી.
AMC અને પોલીસ વિભાગે સંયુક્ત અભિયાન હાથ ધર્યું
અગાઉ હેલ્મેટ વખતે જે પ્રકારની ડ્રાઇવ પોલીસે હાથ ધરીને વાહનચાલકોને દંડ્યા હતા તે પ્રકારે વેક્સિનનું સર્ટિફિકેટ ન ધરાવતા વાહનચાલકોને દંડિત કરવા તેવો સર્વસંમતિનો સૂર આ બેઠકમાં વ્યક્ત થયો હતો. હવે ટ્રાફિક પોલીસ ચાર રસ્તા પર ઊભા રહીને વેક્સિન લીધા વગરના વાહનચાલકોને દંડ ફટકારવાનું ખાસ અભિયાન હાથ પર લઈ શકે છે, જોકે દંડની રકમ કેટલી લેવી? રૂ. 100 કે 500, તે અંગે પણ ટૂંક સમયમાં નિર્ણય લેવાશે. બીજા અર્થમાં વેક્સિન લેવાનું એક અથવા બીજા કારણસર ટાળતા નાગરિકોએ જો રોડ પર ટુવ્હીલર કે ફોર વ્હીલર જેવાં અંગત વાહન લઈને નીકળવું હશે તો વેક્સિન લેવી પડશે અન્યથા દંડ ભરવાની તૈયારી રાખવી પડશે.