અમદાવાદના શાંતિપુરા સર્કલ નજીક એપલવૂડ સુરેલમાં રહેતા કરણ ઓડેદરાએ બોપલ પોલીસ સ્ટેશનમાં ફરિયાદ નોંધાવી છે. કરણ સિંધુ ભવન ખાતે જમીન લે વેચની ઓફિસમાં કામ કરે છે. થોડા દિવસ પહેલાં અજાણ્યા નંબર પરથી કરણ પર ફોન આવ્યો હતો કે હું એક્સિસ બેંક ક્રેડિટ ડિપાર્ટમેન્ટમાંથી બોલું છું, તમારા ક્રેડિટ કાર્ડમાં પોઇન્ટ જમાં થયા છે. તે તમે રૂપિયામાં કન્વર્ટ કરી નાખશો તો સારું થશે. જેથી કરણે હાં પાડી હતી.
ક્રેડિટ કાર્ડ નંબર આપતા 78 હજાર ડેબિટ
ગઠિયાએ કરણને એક એપ્લિકેશન ડાઉનલોડ કરાવી હતી. જેમાં તમામ વિગત ભરવા માટે કહ્યું હતું. ગઠિયાના કહ્યા મુજબ કરણે તમામ વિગત આપી દીધી હતી. તેમજ ક્રેડિટ કાર્ડના પાછળના ત્રણ આંકડા પણ આપી દીધા હતા. થોડી વારમાં કરણના ખાતામાંથી ટુકડે ટુકડે 78 હજાર રૂપિયા ડેબિટ થઇ ગયા હતા. જેથી કરણે ગઠિયા વિરુદ્ધ ફરિયાદ નોંધાવતાં પોલીસે છેતરપિંડી સહિતની કલમો હેઠળ ગુનો નોંધી તેની ધરપકડનાં ચક્રો ગતિમાન કર્યાં હતાં.
કાર્ડનો ઉપયોગ કરનારાની સંખ્યા વધી
ઉલ્લેખનીય છે કે, મોટા ભાગના લોકો પેમેન્ટ કરવા માટે ડેબિટ અને ક્રેડિટ કાર્ડનો ઉપયોગ કરે છે, સીધી રીતે નહીં તો ક્યારેક UPI પેમેન્ટ અથવા ડાયરેક્ટ પેમેન્ટ માટે આપણે કાર્ડનો ઉપયોગ કરતા હોઈએ છીએ. જેમ જેમ આ કાર્ડ યુઝ કરનારાની સંખ્યા વધી છે તેમ તેમ આ ટ્રાન્ઝેક્શનમાં છેતરપિંડીનું પ્રમાણ પણ વધી ગયું છે. ક્રેડિટ કાર્ડ એસોસિયેશને અથવા કાર્ડ ઈશ્યૂ કરનાર બેંકે કાર્ડને જે નંબર આપ્યો હોય તે નંબર ક્રેડિટ કાર્ડથી પેમેન્ટ કરવા માટે ગ્રાહકે આ નંબર મર્ચન્ટને આપવો પડે છે.
ભૂલથી પણ આ નંબર ન કરવો શેર
જોકે, આ નંબર અન્ય કોઈ સાથે શેર કરવો જોઈએ નહીં. કાર્ડ પર આંકડા પ્રિન્ટ થયેલા હોય છે. CVV તેનો અર્થ કાર્ડ વેરિફિકેશન વેલ્યૂ એવો થાય છે. કાર્ડ પર પ્રિન્ટ કરાયેલો આ ત્રણ આંકડાનો નંબર હોય છે જે મોટા ભાગનાં ઓનલાઈન ટ્રાન્ઝેક્શન માટે ફરજિયાત આપવાનો હોય છે. આ વિગત પણ કોન્ફિડેન્શિયલ હોય છે અને તે ક્યારેય કોઈનીય સાથે શેર ન કરવો જોઈએ.