અમદાવાદમાં સોશિયલ મીડિયાના માધ્યમથી પરિચયમાં આવ્યા બાદ વધુ એક પરિણીતા પર દુષ્કર્મ ગુજારાયાની ફરિયાદ ઉઠી છે.
પરિણીતા અને યુવક સોશિયલ મીડિયા થકી આવ્યા હતા પરિચયમાં
બંને વચ્ચેનો પરિચય પ્રેમ સંબંધમાં પરિણમ્યો
યુવકે અન્ય યુવતી સાથે સગાઈ કરી લેતા મામલો પહોંચ્યો પોલીસ મથકે
અમદાવાદના સેટેલાઇટ વિસ્તારમાં રહેતી પરિણીતાએ યુવક વિરુદ્ધ દુષ્કર્મની ફરિયાદ નોંધાવતા ચકચાર મચી ગઈ છે. સોશિયલ મીડિયા થકી પરિણીતા અને યુવક પરિચયમાં આવ્યા બાદ બને વચ્ચેનો પરિચય પ્રેમ સંબંધમાં પરિણમ્યો હતો. દરમિયાન યુવકે પરિણીતાને લગ્નની લાલચ આપી તેની સાથે શારીરિક સંબંધો બાંધ્યા હોવાની રાવ ઉઠી છે. જોકે આરોપી યુવકે અન્ય યુવતી સાથે સગાઈ કરી લેતા સમગ્ર મામલો પોલીસ સ્ટેશને પહોંચ્યો છે.
આરોપી અવારનવાર પરિણીતાના ઘરે મળવા જતો
અમદાવાદના રાણીપ વિસ્તારમાં રહેતા ભાવિન ભાવસાર નામના યુવકનો સેટેલાઇટ વિસ્તારમાં રહેતી પરિણીતા સાથે વર્ષ 2019 મા પરિચય થયો હતો. બંને વચ્ચે સોશિયલ મીડિયાના માધ્યમથી સબંધ થયો હતો. ત્યારબાદ આરોપી યુવકે પરિણીતાને મળવા બોલાવી હતી. જ્યાં મુલાકાત બાદ આરોપી અવારનવાર સેટેલાઈટ વિસ્તારમાં પરિણીતાના ઘરે મળવા જતો હતો. બંને વચ્ચેના પ્રેમ સબંધને લઈને યુવકે પરિણીતાને લગ્નની લાલચ આપી હતી અને પરિણીતાના પતિ નોકરી પર હોય ત્યારે પરિણીતા સાથે શારીરિક સંબંધો પણ બાંધ્યા હતા. એટલું જ નહી શારીરિક સબંધના નામે અવારનવાર ફોન કરીને આરોપી ભાવિન પરિણીતાને હેરાન પણ કરતો હતો. પરિણીતાને પોતાની સાથે વાત કરવા માટે દબાણ કરતો હતો.
આરોપીએ ધમકી આપી પરિણીતા સાથે કુકર્મ આચર્યું
આ દરમિયાન લગ્નની વાતનું બહાનું આગળ ધરી આરોપીએ ફરીવાર યુવતીને મળવા બોલાવી હતી. જેથી પરિણીતા આરોપીને મળવા પહોંચી હતી. જ્યાં યુવકે ફરી પરિણીતા પાસેથી શારીરિક સંબંધની માંગણી કરતાં મહિલાએ મનાઈ કરી દીધી હતી. આથી આરોપીએ બંને વચ્ચેના સબંધની પરિણીતાના પતિને જાણ કરી ભાંડો ફોડવાની ધમકી આપી હતી અને ત્યાં પરિણીતા સાથે કુકર્મ આચર્યું હતું.
પોલીસે આરોપીની કરી ધરપકડ
આરોપીએ પરિણીતાને હવસનો શિકાર બનાવી લીધા બાદ અંતે અન્ય યુવતી સાથે હાલમાં જ સગાઈ કરી લીધી હતી. જે બાબતની જાણ ભોગ બનનાર પરિણીતાને થતાં તેણે પોતાના પતિને સમગ્ર હકીકત જણાવી હતી. બાદમાં યુવતીના પતિએ આરોપીને ઘરે બોલવાનું કહેતા પરિણીતાએ આરોપીને પોતાના ઘરે બોલાવ્યો હતો અને પોલીસને ફોન કરી ફરિયાદ પણ નોંધાવી હતી. જેથી પોલીસે તાત્કાલિક દોડી જઈ યુવકની ધરપકડ કરી છે. હાલ પોલીસ દ્વારા સમગ્ર મામલે પુરાવાઓ એકત્ર કરી આગળની કાર્યવાહી હાથ ધરવામાં આવી છે.