કાર્યવાહી / ‘તું પૈસા ભેગા કરવા ઊભી છે, ચાલતી થા, હું દંડ નથી ભરવાની’ કહી મહિલા પોલીસને માર્યો ધક્કો

સેટેલાઇટ પોલીસ સ્ટેશનમાં ફરજ બજાવતાં પીએસઆઇ એ. આર. બાથમ અને તેમની ટીમ સેટેલાઈટ વિસ્તારમાં માસ્ક ન પહેરનાર લોકો સામે કાર્યવાહી કરવા માટે સક્રિય હતા ત્યારે ઇસરો તરફથી એક ગાડી આવી રહી હતી, તેમાં બેઠેલી વ્યક્તિએ યોગ્ય રીતે માસ્ક પહેર્યું  ન હતું, જેથી પોલીસે આ કાર રોકી હતી.

કારમાં ડ્રાઇવર સીટની ડાબી બાજુમાં બેઠેલી મહિલા હીરલ પરીખના મોઢા પર માસ્ક યોગ્ય રીતે ન હોવાથી પોલીસે તે બાબતે દંડ ભરવાની સૂચના આપી હતી. પોલીસે દંડ ભરવાનું કહેતાં હીરલ એકદમ ઉશ્કેરાઇ ગઇ હતી અને મહિલા પોલીસને કહેવા લાગી હતી કે, 'હું માસ્કનો મેમો ભરવાની નથી, હું જોઈ લઈશ'.

તમારે જે કરવું હોય તે કરી લો તેમ કહી મહિલા પોલીસને ધક્કો મારી 'ચલ ફૂટ' જેવા અપમાનજનક શબ્દો બોલવા લાગી હતી. હીરલ આટલેથી પણ અટકી ન હતી. તેણે મહિલા પોલીસને 'તારે જે કરવું હોય તે કરી લે' આવું કહેતાં તેની સામે કાયદેસર કાર્યવાહી કરવામાં આવી હતી.