ઉનાળો આવશે એટલે બરફના ગોળા કે આઈસ્ક્રીમ ખાવા રોજ કોઈ લારી કે રેકડીએ પહોંચી જશું. બરફના ગોળા કે આઈસ્ક્રીમના લારી ચલાવતાં પુરૂષો જોયા હશે પણ ક્યારે કોઈ મહિલા માલિક હોય તેવું જોયું છે? જો જવાબ ના હોય તો જાણો અમદાવાદના વેજલપુરમાં રહેતાં જાગૃતિબહેન વિશે જે પુરૂષોને પણ પાછળ છોડી દે તેવો તવા આઈસક્રીમ અને બરફના ગોળાનો બિઝનેસ કરે છે.
પુરુષ સમોવડી બની ચૂકી છે મહિલા
સલામ છે અમદાવાદની આ સાસુ વહુની જોડીને
અમદાવાદમાં જાગૃતિબેન પહેલી મહિલા જે પીરસે છે તવા આઈસક્રીમ અને બરફગોળા
શરૂઆતમાં અંદાજે દોઢ લાખ રૂપિયામાં બિઝનેસ શરૂ કર્યો હતો. આજે તે 4 માણસો સાથે બિઝનેસ ચલાવે છે. જાગૃતિબેન ચોક્સી પરિવારની મદદ અને લાઈફલાઈન એવા જલ્પાબેન અને માધવીની સાથે અમદાવાદના પોર્શ ગણાતા પ્રેરણાતીર્થ દેરાસર અને એસજી હાઈવેના ઓશિયા માર્ટની બહાર પોતાના 5 કાઉન્ટર્સ ચલાવે છે. સૌરાષ્ટ્રના બરફગોળા, ફાલુદા અને લાઈવ તવા આઈસ્ક્રીમની સાથે શેરડીનો રસ અહીના ફેમસ છે.
બરફગોળા જાતે બનાવી સર્વ કરવા, તવા આઈસ્ક્રીમ પોતે બનાવવો અને સર્વ કરવો એવા કદાચ અમદાવાદમાં આ પહેલી સાસુ-વહુની જોડી છે. આ જોડીએ કમાલ દેખાડી છે. આ સાથે જ મહિલા ખાણીપીણીમાં હોય તો ચોખ્ખાઈ અને હેલ્થને લઈને પણ લોકોને વધારે શંકા રહેતી નથી. મહિલા દિને આ સાસુ વહુની જોડીને સલામ છે.
30થી વધારે ફ્લેવર્સના આઈસ્ક્રીમની મજા અહીં મળશે
તવા આઈસ્ક્રીમની શરૂઆત 4 વર્ષ પહેલાં કરવામાં આવી હતી. આ મૂળ થાઈલેન્ડનો કન્સેપ્ટ છે. સોશિયલ મીડિયા યુટ્યૂબ પરથી તેને માટેનું મશીન ખરીદ્યું. આ મશીન રાજકોટથી મંગાવ્યું અને તેની કિંમત અંદાજે એક લાખની આસપાસની છે. આજે અમે 30થી વધારે ફ્લેવર્સના આઈસ્ક્રીમ બનાવીએ છીએ. અમારે ત્યાં નટેલા નટ્સ, કીટકેટ, કોથમીર મરચાં અને સાથે જ લીંબુ ફૂદીનાની યૂનિક વેરાયટી તથા કાજુ ગુલકંદ આઈસક્રીમ ફેમસ છે.
અમારે ત્યાં અનેક જગ્યાઓએથી લોકો આ આઈસ્ક્રીમની મજા માણવા આવે છે અને સાથે જ અમે કસ્ટમર્સની સામે 3 મિનિટમાં લાઈવ તવા આઈસ્ક્રીમ બનાવીએ છીએ. તેમાંના તમામ ઈન્ગ્રીડિયન્ટ્સ FSSI અપ્રૂવ્ડ હોય છે. દિવસનું અંદાજિત વેચાણ 4000ની આસપાસનું હોય છે. આ આઈસ્ક્રીમ બનાવવા માટે દૂધ, ફ્રેશ ક્રીમ, મિલ્ક પાવડર અને મિલ્ક મેડનો બેઝ તૈયાર કરવામાં આવે છે.
બરફગોળાઃ સાસુ વહુની જોડી કરે છે કમાલ
સૌરાષ્ટ્રથી અમદાવાદ આવ્યા ત્યારે બરફ ગોળાનો બહુ શોખ હતો પણ સૌરાષ્ટ્ર જેવો ગોળો અમદાવાદમાં ક્યાય મળતો ન હતો. આ સમયે વિચાર આવ્યો કે રાજકોટ અને જામનગર જેવા ફેમસ ગોળા અમદાવાદના લોકોને ખવડાવીએ.
25થી વધારે વેરાયટી સર્વ કરાય છે
છેલ્લા 5 વર્ષથી બરફગોળાની શરૂઆત નાના એવા 2 ટેબલથી કરી હતી. જેમાં લોકોનો ઘણો સારો રિસ્પોન્સ મળ્યો અને સાથે દર વર્ષે અમે નવી વેરાયટી પણ ઉમેરતા ગયા. હાલમાં 25થી વધારે વેરાયટી અમે સર્વ કરીએ છીએ. અમદાવાદીઓને જે ફ્લેવર વધારે પસંદ આવે છે તેમાં ચોકોડીપ, બ્રાઉની ગોળા, માવા રબડી તથા નેટલા ડીપ ફેમસ છે.
FSSI અપ્રૂવ્ડ ફૂડ કલર્સ હોવાથી ગ્રાહકોને ફરિયાદ રહેતી નથી
પહેલાં અમે RO બરફ બહારથી લાવતા પણ હવે અમે જાતે જ આરઓનું પાણી જમાવીને બરફ બનાવીએ છીએ. બધી જ ફ્લેવર્સ પણ ઘરે જ બને છે. તેમાં હેલ્થ અને હાઈજિનનું ખાસ ધ્યાન રાખવામાં આવે છે. અહીંની પ્રોડક્ટ્સમાં ફાઈનેસ્ટ ક્વોલિટીના ફ્લેવર્સ તથા FSSI અપ્રૂવ્ડ ફૂડ કલર્સ વાપરવામાં આવે છે. અહીંના બરફથી કોઈને ગળું પકડાવવાની ફરિયાદ રહેતી નથી.
રોજનો 200 કિલો બરફ યૂઝ થાય છે
અમારે ત્યાં ડ્રાયફ્રૂટ ડિશ, ફ્રૂટ ડિશ, રજવાડી માવા મલાઈ ડિશ તથા બ્રાઉની ડિશ મળે છે જેમાં આઈસક્રીમ ગોળાની ડિશનો પણ સમાવેશ કરાય છે. અંદાજિત રોજના 250થી 300 લોકો બરફ ગોળા ખાવા આવે છે જેમાં 200 કિલો જેટલો બરફ યૂઝ થાય છે. જેનાથી અંદાજે 3000થી વધારેની ઈનકમ થાય છે.
ફાલુદા અને શેરડીનો રસનું પણ વેચાણ કરે છે જાગૃતિબેન
ગોળા અને આઈસક્રીમમાં સફળતા મળ્યા બાદ વિચાર આવ્યો કે સારી ક્વોલિટીના કુલ્ફી, ફાલુદા તથા હાઈજેનિક બરફ વિનાનો રસ પણ કસ્ટમર્સને સર્વ કરીએ. આ વર્ષથી અમે આ કાઉન્ટર્સ પણ શરૂ કર્યા છે. બરફ ન નાખવાના કારણે શેરડીનો રસ થિક અને નેચરલ રહે છે. જેને લોકો પસંદ કરે છે. સાથે જ ફાલુદામાં 7 ફ્લેવર્સને સર્વ કરવામાં આવે છે જેમાં રોઝ, રાજભોગ, સ્ટ્રોબેરી ફ્લેવર્સ પણ લોકોને ગમે છે. ઓરિજિનલ મુંબઈ સ્ટાઈલ રોલ કટ, કુલ્ફી, જેમાં દૂધને ઉકાળીને માવો અને મલાઈ એડ કરીને એકદમ ઓથેન્ટીક ટેસ્ટ આપવામાં આવે છે. તેમાં પાઈનેપલ, મેન્ગો અને બદામ પિસ્તા કુલ્ફી જાણીતી છે.
મારી સફળતામાં મારા પરિવારનો છે પૂરો સાથ
જાગૃતિબેન ચોકસી કહે છે કે, મારી સફળતામાં મારા પરિવારનો સાથ મુખ્ય છે. તેઓ કદાચ મારી સફળતા માટે મારાથી પણ વધારે કલાક કામ કરે છે. હું સવારે 11થી રાતના 12 સુધી આ કામમાં સંકળાયેલી રહું છું. શોખ માટે થઈને અંદાજે દોઢ લાખ રૂપિયાથી શરૂ કરેલો બિઝનેસ આજે 5 વર્ષ પછી અવિરત ચાલી રહ્યો છે અને સાથે જ લોકોનો ઘણો સારો રિસ્પોન્સ પણ મળી રહ્યો છે. ઉલ્લેખનીય છે કે આજે જાગૃતિબેન મહિને અંદાજે 2 લાખનો બિઝનેસ કરે છે જે ખરેખર પ્રશંસનીય છે.