LIVE: રાજ્યમાં ખુલ્લેઆમ ચાલતી દારૂની હાટડીઓ પર Vtvનું સ્ટિંગ ઓપરેશન

અમદાવાદમાં લઠ્ઠાકાંડ બાદ પણ રાજ્યભરમાં દારૂની હાટડીઓ ધમધમી રહી છે. એક તરફ પોલીસ રેડ કરી બુટલેગરો પર લગામ કસવાનો ઢોંગ કરી રહી છે. બીજી તરફ ખુલ્લેઆમ રસ્તાઓ પર અને ગામડાઓમાં દારૂ વેચાઈ રહ્યો છે. પોલીસ દાવાઓ કરી રહી છે.

ત્યારે Vtv એ પોલીસના તમામ ખોખલા દાવાઓની પોલ ખોલી નાખી છે. લઠ્ઠાકાંડ બાદ Vtvએ રાજ્યભરમાં દારૂના ધમધમતા અડ્ડાઓનું મેગા સ્ટિંગ ઓપરેશન કર્યું. જેમાં પોલીસ અને બુટલેગરોની મિલિભગત સ્પષ્ટ રીતે રામે આવી છે. અમારા કેમેરામાં બેફામ રીતે ધમધમી રહેલી દારૂની હાટડીઓ કેદ થઇ. 



તો બુટલેગરો અને દારૂના ખેપિયા પણ કેદ થયા. આ તમામ લોકો બેખોફ રીતે પોલીસની આંખો સામે જ આ રીતે દારૂના અડ્ડાઓ ચલાવી રહ્યા છે. સૌથી ચોંકાવનારી બાબત તો એ છે કે છોટા ઉદેપુર અને સુરેદ્રનગરમાં મહિલા બુટલેગરો દારૂના પિઠ્ઠા ચલાવી રહી છે.

Vtv કેમેરામાં નસવાડીની એક મહિલા બુટલેગર દેશી દારૂની પોટલી વહેંચતા કેદ થઈ. તો આ તરફ સુરેદ્રનગરના મુળીના ગામડામાં રોડ પર ખુલ્લેઆમ દારૂનો વેપલો ચાલી રહ્યો છે. સૌથી ચોંકાવનારી બાબત તો એ છે કે એક તરફ ધારાસભ્ય જિજ્ઞેશ મેવાણી લઠ્ઠાકાંડ બાદ બુટલેગરોને ત્યાં જનતા રેડ કરી દારૂ ઝડપી પાડવાનો સ્ટંટ કરી રહ્યા છે.

જ્યારે બીજી તરફ ખુદ્દ તેમના જ મત વિસ્તાર વડગામમાં દારૂની ભઠ્ઠીઓ ચાલી રહી છે. આ તરફ રાજ્યના શ્રમ અને રોજગાર મંત્રીના મત વિસ્તારના શંખેશ્વરમાં પણ દારૂના અડ્ડા ધમધમી રહ્યા છે. પરંતુ જનતાના સેવાકોને માત્ર રાજકારણ જ રસ છે. કોઈ નક્કર પગલા નથી ભરવા.