અમદાવાદ: વસ્ત્રાપુરમાં પાંચ RJ વિરુદ્ધ નોંધાઇ ફરિયાદ સ્ટેજ પરથી ફેંકી આલ્બમની સીડી

અમદાવાદ રેડિયો પર લોકોને કાયદાનું પાલન કરવા અને સિવિક સેન્સની સૂફિયાણી વાતો કરતા RJ દ્વારા અત્યંત બેજવાબદારીપૂર્વકનું કૃત્ય કરવામાં આવ્યું. જોખમી રીતે પ્લાસ્ટિક-કવર સાથેની ઓડિયો સીડી ગરબા મહોત્સવ દરમિયાન લોકો પર ફેંકાતાં એક બાળકને આંખની નીચેના ભાગે ગંભીર ઇજા પહોંચતા બાળકના પિતા એ આર જે દેવકી સહીત 5 સામે ફરિયાદ નોંધાવી છે. ખાનગી રેડિયો ચેનલ  દ્વારા SG હાઇ-વે પર આવેલા માહી પાર્ટી પ્લોટમાં ગરબા મહોત્સવ દરમિયાન જોખમી રીતે સ્ટેજ પરથી લોકો પર છુટ્ટી ઓડિયો સીડી ફેંકવામાં આવી હતી. 

દરમિયાનમાં એક ચાર્ટર્ડ એકાઉન્ટન્ટના ચાર વર્ષના પુત્રને આંખની નીચેના ભાગે સીડી વાગી હતી. બાળકને સારવાર માટે ખાનગી હોસ્પિટલમાં ખસેડવાની ફરજ પડી હતી. આ મામલે રેડ RED-FMના ચેનલ હેડ અને આરજે દેવકી RJ આયુષ RJ હર્ષ RJ ધ્રુમિલ અને RJ નિશિતા વિરુદ્ધ બાળકના પિતાએ વસ્ત્રાપુર પોલીસ સ્ટેશનમાં ફરિયાદ નોંધાવતાં પોલીસે ગુનો નોંધી તપાસ હાથ ધરી છે. ૧ર ઓકટોબરના રોજ રાત્રે ભાવેશભાઇ પત્ની અને પુત્ર સાથે સિંધુ ભવન રોડ પર આવેલા માહી પાર્ટી પ્લોટમાં યોજાયેલા રેડ રાસના ગરબા રમવા ગયા હતા. 

ગરબામાં અનેક લોકો હાજર હતા અને ગરબાની રમઝટ ચાલતી હતી.દરમિયાનમાં રાતના૧૧-૩૦ની આસપાસ અચાનક ગરબા બંધ થયા હતા અને સ્ટેજ પરથી રેડ એફએમ રેડિયો સ્ટેશનના ચેનલ હેડ અને RJ દેવકી RJ આયુષ આરજે હર્ષ આરજે ધ્રુ‌મિલ અને આરજે નિશિતા તેમજ તેમની સાથેના અન્ય લોકોએ રેડ એફએમની જાહેરાત કરવા માટે પોતાના હાથમાં રહેલી ફાઇબર-પ્લાસ્ટિકના કવરવાળી ઓડિયો સીડી લોકો પર છુટ્ટી ફેંકી હતી.

ભાવેશભાઇનાં પત્ની તેમના પુત્રને લઇ સ્ટેજની સામે ડાબી બાજુ ક્રોસમાં બેઠાં હતાં. સ્ટેજ પરથી છુટ્ટી આવતી ‌સીડી અર્થને વાગે નહીં તે માટે તેના મોઢા પાસે પર્સ રાખ્યું હતું. સીડી વાગી નથી તે જોવા પર્સ હટાવ્યું તે દરમિયાન સ્ટેજ પરથી ફેંકાયેલી એક સીડી અર્થના મોઢાના ભાગે આંખની નીચે વાગી હતી.