અમદાવાદની પોલીસ રાજસ્થાનમાં ચોરીના વાહનો કબજે કરવા ગઇ હતી. જ્યાં સહેજ પણ ડર્યા વગર બહાદુરીથી કાર્યવાહી કરી હતી. અમદાવાદ પોલીસની કર્મનિષ્ઠા અને સાહસનું ઉત્તમ ઉદાહરણ આપતો કિસ્સો સામે આવ્યો છે. વાસણા પોલીસ સ્ટેશનના પીએસઆઇ એક વ્યક્તિને તપાસ માટે લઇ જતા સમયે 20 જેટલા હથિયારધારી ગુનેગારોએ તેમને ઘેરી લીધા હતા. પરંતુ પીએસઆઇના કરડાકીભર્યા અવાજથી હથિયારધારી ગુનેગારો ધ્રૂજી ઊઠ્યા હતા.
રાજસ્થાનમાં પીએસઆઇ સહિતના સ્ટાફને હથિયારધારી ર૦ કરતાં વધુ ગુનેગારોએ ઘેરી લીધા હતા
રાજસ્થાનના બાડમેરમાં ચોરીનાં વાહન કબજે કરવા માટે ગયેલા અમદાવાદના વાસણા પોલીસ સ્ટેશનના પીએસઆઇ સહિતના સ્ટાફને હથિયારધારી ર૦ કરતાં વધુ ગુનેગારોએ ઘેરી લેતાં મામલો બીચક્યો હતો. હુમલો કરવા માટે આવેલા હથિયારધારી ગુનેગારોથી બચવા માટે પીએસઆઇએ ચાલાકી વાપરીને કરડાકીભર્યો અવાજ કરી કહ્યું કે મારી સાથે ચાર ટીમ અને ૬૦ માણસો છે, જો તમે કંઈ કરશો તો તમારી હાલત ખરાબ થઈ જશે. અમે ચોરીનાં વાહનો લેવા આવ્યા છીએ, તે અમને આપી દો.
અમદાવાદના વાસણાના પીએસઆઇ જે.બી. પરમાર સ્ટાફના માણસો અને એક આરોપીને લઈ બાડમેર જિલ્લાના મોખાબ શિવા અને કવાસ ગામે વાહન કબજે કરવા માટે પહોંચ્યા હતા. આરોપીઓએ ચોરીની ઇકો કાર જે વ્યક્તિને આપી હતી તે વ્યક્તિની તપાસ માટે પોલીસે એક લોકલ વ્યક્તિનો સંપર્ક કર્યો હતો, જોકે લોકલ વ્યક્તિ પોલીસને ગોળ-ગોળ ફેરવી ફરાર થઈ ગઇ હતી. આખરે પીએસઆઈ પરમાર સાંજે કવાસ ગામથી તે વ્યક્તિને કોલર પકડી કારમાં બેસાડી ગાડીઓ રિકવર કરવા રવાના થયા હતા.
20 હથિયારી શખ્સોએ પોલીસનો પીછો કરીને PSIને ઘેરી લીધા
સ્કોર્પિયો-બોલેરો કારમાં ર૦ જેટલા હથિયારી શખ્સોએ પીછો કરી પોલીસનાં વાહનને હાઇવે પર ઘેરી લીધાં હતાં. હથિયારધારી ર૦ જેટલા શખ્સોને જોઈ પીએસઆઇ પરમાર અને તેમની સાથેના સ્ટાફના માણસો વાહનમાંથી નીચે ઊતર્યા હતા, જોકે પીએસઆઇ પરમારે સહેજ પણ ડર્યા વગર હથિયાર સાથે લોકલ વ્યક્તિને છોડાવવા આવેલ ગેંગના સભ્યોને કહ્યું કે મારી પાસે ચાર ટીમ અને ૬૦ માણસો છે. એક ફોન કરતાં તે લોકો આવી જશે અને તમે મુસીબતમાં મુકાશો. અમે ચોરીનાં વાહન રિકવર કરવા આવ્યા છીએ, અમને વાહન આપી દો, તમારો માણસ લઈ જાવ.
બાદમાં શખ્સોએ ચોરીની 3 ઇકો કાર જમા કરાવી
પીએસઆઇના હુંકારથી ફફડેલા હથિયારધારી શખ્સોએ ચોરીની ત્રણ ઈકો કાર જમા કરાવી અને બાકીનાં વાહન પોલીસ સ્ટેશનમાં જમા હોવાનું કહ્યું હતું. આખરે પીએસઆઈ પરમારે લોકલ વ્યક્તિને જવા દીધી હતી. અમદાવાદ પોલીસ ચોરીની ઇકો કાર લઈ આરોપી સાથે પરત આવવા રવાના થઈ હતી..
અમદાવાદમાં ઇકો ગાડીની ચોરી કરતી રાજસ્થાન ગેંગના બે સાગરીતો ઝડપાયા હતા
ઇકો કારની ચોરી કરતા આંતરરાજ્ય ગેંગના બે આરોપીની વાસણા પોલીસે ધરપકડ કરી હતી. પોલીસે મોહનલાલ ઉર્ફે મુન્ના ચારણ અને જશારામ ઉર્ફે જશુ લોલ. આ બન્ને કુખ્યાત ગુનેગાર છે. વાહન ચોરીમાં માસ્ટર માઈન્ડ છે. તેમને અમદાવાદમાં 6 ઇકો કાર અને ચાર બાઇક સહિત 10 વાહનની ચોરી કરી હતી. આ બન્ને આરોપીઓ વાસણામાં ગુપ્તાનગરથી પસાર થઈ રહ્યા હતા ત્યારે પોલીસને બાતમી મળતા બન્ને ચોરીની ઇકો સાથે રંગે હાથે ઝડપાઇ ગયા હતા.
માસ્ટર ચાવીથી વાહનોની કરતા હતા ચોરી
ઇકો કારને ટાર્ગેટ કરવા માટે રાજસ્થાનથી ટ્રાવેલ્સમાં અમદાવાદ આવતા હતા. માસ્ટર ચાવીનો ઉપયોગ કરીને બાઇક ચોરી કરતા. ત્યાર બાદ આ ચોરીની બાઇક લઈને ઇકો કાર ની ચોરી કરવા ફરતા હતા. જ્યારે કોઈ ઇકો કાર જોવા મળતી તો માસ્ટર ચાવીનો ઉપયોગ કરીને રાજેસ્થાન ફરાર થઈ જતા હતા. આરોપીઓ ફક્ત ઇકો કારને જ ટાર્ગેટ કરતા હતા. કારણ કે ઇકો કારમાં દારૂ અને ડ્રગ્સની હેરાફેરી કરી શકે. આરોપીઓએ અત્યાર સુધીમાં અમદાવાદમાં વાડજ, સોલા, વાસણા, પાલડી અને આનંદનગરમાં 10 જેટલા વાહનોની ચોરી કરી હોવાનું તપાસમાં ખુલ્યું.