ગુજરાતમાં દિવસેને દિવસે ક્રાઇમમાં સતત વધારો થઇ રહ્યો છે. ત્યારે કોઇ પણ ઘટનાને અંજામ આપવા માટે અસામાજિક તત્વો હથિયારોનો ઉપયોગ કરતા હોય છે. ત્યારે આ હથિયારો ગુજરાતના પાડોશી રાજ્યોમાંથી ગુજરાતમાં લાવવામાં આવે છે. ત્યારબાદ ગુજરાતમાં મોટા પાયે વેચાણ કરવામાં આવે છે.
રાજ્યમાં લુખ્ખા તત્વો જાણે બેફામ બન્યા હોઈ તેવું લાગી રહ્યું છે. અમદાવાદ બાદ વડોદરામાં પણ ત્રણ શખ્સો દેશી તમંચા સાથે ઝડપાઈ આવ્યા છે. મળતી માહિતી પ્રમાણે, લૂંટના ગુનાને અંજામ આપવા માટે આ ત્રણેય શખ્સો એક્ટીવા પર જઈ રહ્યા હતા. જે દરમિયાન જવાહરનગર વિસ્તારમાં ક્રાઈમબ્રાન્ચે વાહન ચેકિંગમાં તેમને ઝડપી પાડ્યા હતા.
આ ત્રણેય શખ્સો પાસેથી એક તમંચો અને 9 જીવતા કારતુસ જપ્ત કરવામાં આવ્યા છે. ક્રાઈમ બ્રાન્ચે ઝડપી પાડેલા આ આરોપીઓની મોઈન રાઠોડ, બંટી રાઠોડ અને મનહરસિંહ રાણાના રૂપમાં ઓળખ થઈ છે. હાલ ક્રાઈમ બ્રાન્ચે ત્રણેય શખ્સોની ધરપકડ કરી સમગ્ર મામલે વધુ તપાસ હાથ ધરી છે.
ઉત્તરપ્રદેશથી અમદાવાદ હથિયાર વેચવા આવ્યા હતા
વડોદરા અગાઉ અમદાવાદ ક્રાઇમ બ્રાન્ચે મોટી સફળતા મળી હતી. જશોદાનગરમાંથી ધાતક હથિયારો સાથે 4 લોકોની ધરપકડ કરવામાં આવી હતી. ક્રાઇમ બ્રાન્ચે 18 હથિયારોના મોટા જથ્થા સાથે 4 શખ્સને ઝડપી પાડયા હતા. પોલીસે રિવોલ્વર અને 38 કારતુસ જપ્ત કર્યા હતા. સાથે એક કાર પણ કબજે કરવામા આવી છે.
મળતી માહિતી મુજબ ઘાતક હથિયારોના મોટા જથ્થા સાથે ક્રાઇમ બ્રાન્ચે શખ્સને ઝડપી પાડ્યા હતા. તો ઝડપાયેલી શખ્સ સામે ગુનો નોંધીને આગળની કાર્યવાહી હાથ ધરવામાં આવી છે.