અમદાવાદ પોલીસે સ્પીડ લિમિટ નક્કી કરી હોવા છતાંય સૂમસામ રસ્તા જોઇ વાહનચાલકો પુરઝડપે વાહન ચલાવે છે. જેના કારણે અકસ્માતની ઘટનાઓ ઘટી છે. મોડી રાતે અમદાવાદના ખોખરા વિસ્તારના અનુપમ સિનેમા પાસે પુરઝડપે આવી રહેલા ડમ્પરચાલકે અકસ્માત કરતાં એક મહિલા સહિત ત્રણ લોકોનાં મોત થયાં છે. જ્યારે એક ઘાયલ છે. ડમ્પરચાલકે ચારથી પાંચ વાહનને અડફેટમાં લીધાં હતાં.
મોડી રાતે સર્જાયેલા અકસ્માતથી અરેરાટીઃ બે યુવાન અને મહિલાનાં મોત
અનુપમ સિનેમા નજીક ચારથી પાંચ વાહનોને કચડી ડમ્પર ઘર સાથે અથડાયું
ડમ્પરચાલકને લોકોએ પકડી ઢોરમાર મારી પોલીસ હવાલે કર્યો
સ્થાનિકોના જણાવ્યાં અનુસાર ડમ્પરચાલક ચિક્કાર દારૂ પીધેલી હાલતમાં હતો. જેથી પોલીસે ડમ્પરચાલકની ધરપકડ કરી તેને મેડિકલ ચેકઅપ માટે હોસ્પિટલમાં મોકલી આપ્યો છે. મોડી રાતે સુખરામનગરથી એક ડમ્પર પુરઝડપે અનુપમ સિનેમા, ખોખરા તરફ આવી રહ્યું હતું ત્યારે તેના ચાલકે સ્ટિયરિંગ પરનો કાબૂ ગુમાવ્યો હતો.
પુરઝડપે આવી રહેલા ડમ્પરચાલકે સ્ટિયરિંગ પરનો કાબૂ ગુમાવતાં એક બાઇક પર જઇ રહેલા કમલેશ અને દીપક ખટીકને અડફેટમાં લીધા હતા. જેમાં કમલેશ ખટીકનું ઘટનાસ્થળે મોત થયું હતું. બાઇકને અડફેટમાં લીધા બાદ ડમ્પરચાલકે અન્ય ત્રણ-ચાર વાહનને પણ અડફેટમાં લીધાં હતાં. વાહનો અડફેટમાં લીધા બાદ ડમ્પર સીધું એક મકાનમાં ઘૂસી ગયું હતું.
મકાનની બહાર તારાબહેન ચંદુભાઇ ધોબી અને તેમનો પુત્ર રાજુ ધોબી સૂતાં હતાં. ડમ્પરનું ટાયર તારાબહેન પર ફરી વળતાં તેમનું ઘટનાસ્થળે મોત થયું હતું, જ્યારે રાજુને ઇજા પહોંચી હતી. દીપક અને રાજુને સારવાર માટે હોસ્પિટલમાં ખસેડવામાં આવ્યાં હતાં, જ્યાં ટૂંકી સારવાર દરમિયાન દીપકનું મોત થયું હતું. અકસ્માતના પગલે તોડફોડ મચાવતાં નાસભાગ મચી ગઇ હતી.
અકસ્માત જોઇ સ્થાનિકો દોડી આવ્યા હતા અને ડમ્પરચાલકને બહાર કાઢીને ઢોરમાર માર્યો હતો. ઘટનાની જાણ થતાં પહેલાં પોલીસની એક ગાડી આવી હતી, જોકે ઉશ્કેરાયેલાં ટોળાંએ પોલીસની ગાડીને ઘેરી લેતાં તે જતી રહી હતી અને ત્યારબાદ ૧પથી વધુ પોલીસનાં વાહન ૧૦૦થી વધુ માણસના કાફલા સાથે દોડી આવ્યાં હતાં અને ડમ્પરચાલકની ધરપકડ કરીને લઇ ગયા હતા.