અમદાવાદ / ‘હું દંડ નહીં ભરું, ખોટી લુખ્ખાગીરી કરો છો, તમારાથી થાય તે કરી લો': પોલીસને ધમકી

સોલા પોલીસ સ્ટેશનમાં ફરજ બજાવતા લોકરક્ષક કપિલકુમાર કાળાભાઇ   અને તેમની ટીમ સાથે એસ.જી. હાઇવે પર નિરમા યુનિવ‌િર્સટી ચાર રસ્તા પાસે કોરોના ગાઈડ લાઇન અનુસાર માસ્ક નહિ પહેરનારને દંડ કરવાની કાર્યવાહી કરતા હતા તે સમયે એક કારચાલકની પાછળની સીટ પર બેસલી મહિલાએ માસ્ક પહેર્યો નહોતો.

તેથી પોલીસે તેમને રોક્યાં હતાં અને દંડ ભરવા માટે તેમનું નામ પૂછતાં રીટાબહેન પટેલ (રહે. પંચામૃત વિભાગ-ર, સાયન્સ  સિટી) જણાવ્યું હતું, જેથી કર્મચારીએ તેમને દંડ ભરવાનું કહેતાં કારચાલકે એકદમ ઉશ્કેરાઈ જઈ પોલીસ કર્મચારીને કહ્યું કે હું દંડ નહીં ભરું, તમે ખોટી લુખ્ખાગીરી કરો છો, તમારાથી જે થાય તે કરી લો, હું દંડ તો નહીં જ ભરું તે દરમિયાન કારમાં પાછળ બેસલી મહિલાએ પણ પોલીસ કમર્ચારીને ધમકી આપી કે હું સેલ્સટેક્સ ઇન્સ્પેકટર છું, ચલ હટ, જો તું મને નહીં જવા દે તો હું તને ઝાપટ મારી દઇશ, તું મને જ કેમ હેરાન કરે છે એમ કહી જોરજોરથી બૂમો પાડી લોકોને ભેગા કરી માથાકૂટ કરી હતી.

 આ કારચાલક અને મહિલા રકઝક કરતાં હોવાથી તે સમયે પોલીસે તેમને રકઝક કરવાની ના પાડી હતી તેમ છતાં તેમણે રકઝક કરવાનું ચાલુ રાખતાં પોલીસ કર્મચારીએ કારચાલક પારિતોષભાઈ પટેલ અને મહિલા રીટાબહેન પટેલ રકઝક કરતાં હોવાથી સોલા પોલીસમાં તેમની સામે સરકારી ફરજમાં અડચણરૂપ બન્યાનો ગુનો નોંધી તપાસ હાથ ધરી છે.