અમદાવાદ ટ્રાફિક પોલીસ બૂથનો બદલાશે લૂક, 200થી વધારે પાકા ટ્રાફિક પોલીસ બૂથ બનાવાશે
અમદાવાદમાં ટ્રાફિક પોલીસને ભેટ
પાકા ટ્રાફિક પોલીસ બૂથ બનાવાશે
શહેરમાં 200થી વધુ પાકા ટ્રાફિક બૂથ બનાવાશે
અમદાવાદને સ્માર્ટસિટી બનાવવાના પ્રયાસો ચાલી રહ્યા છે. શહેરમાં હાઇરાઇઝ બિલ્ડિંગો, બ્રિજ, મેટ્રો ટ્રેન, રિવરફ્રન્ટ સહિત તમામ આધુનિક સુવિધાઓ છે. હવે જાણે કે અમદાવાદની ઓળખ જ બદલાઇ ગઇ છે. ત્યારે ટ્રાફિક પોલીસ બુથમાં પણ મોટા ફેરફારો જોવા મળશે. અમદાવાદમાં 200થી વધારે પાકા ટ્રાફિક બૂથ નિર્માણ પામશે. જી હા, શહેરમાં ટ્રાફિક પોલીસ માટે સાવ નાની ઓરડી કે પછી પતરાનો શેડ ઉભો કરવામાં આવે છે તો એવા ઘણા વિસ્તારો છે જ્યાં ટ્રાફિક પોલીસ માટે કોઇ જ સવલત હોતી નથી.
ટોયલેટ-પેન્ટ્રીની હશે સુવિધા
અમદાવાદમાં 200થી વધુ પાકા ટ્રાફિક પોલીસ બૂથનું નિર્માણ થશે. જેમાં અલગ અલગ ડિઝાઇનના ટ્રાફીક બૂથ બનાવવામાં આવશે. યુનિવર્સિટીમાં વૉકી ટોકી સ્ટાઈલનું ટ્રાફિક પોલીસ બૂથ બનાવાયું છે. જો કે અત્યાર સુધી ટ્રાફિક પોલીસ ચોકીમાં ટોયલેટ બાથરુમની કોઇ સુવિધા ન હતી. જો કે નવી ટ્રાફિક પોલીસ ચોકીમાં ટોઇલેટ અને પેન્ટ્રીની સુવિધા કરવામાં આવશે. અલગ અલગ થીમ પર અમદાવાદમાં 200 ટ્રાફિક બૂથનું નિર્માણ પ્રગતિ પર છે.
વોકી ટોકી લુક ધરાવતી ટ્રાફિક પોલીસ બૂથ
શહેરના વિવિધ જગ્યાઓ પર આકર્ષક દેખાવ ધરાવતા ટ્રાફિક પોલીસ બૂથ બનાવવામાં આવશે. જે અંતર્ગત દાદાસાહેબના પગલા પાસે યુનિવર્સિટી ખાતે વૉકી ટોકી લુક ધરાવતા ટ્રાફિક પોલીસ બુથનું નિર્માણ કરવામાં આવ્યુ છે.
200થી વધારે પાકા ટ્રાફિક પોલીસ બૂથ
સામાન્ય રીતે આપણે ટ્રાફિક પોલીસને ચાર રસ્તા પર જોતા હોઇએ છીએ. કાળઝાળ ગરમી હોય કે પછી ધોધમાર વરસાદ વરસતો હોય. તેઓ પોતાની ડ્યૂટી કરતા જોવા મળે છે. પરંતુ ઘણી વખત મનમાં સવાલ થાય કે આ લોકો જમે ક્યાં ? રસ્તા પર ? જાહેર શૌચાલય નજીકમાં હોય તો બરાબર પણ ન હોય તો ? આવા સવાલો મનમાં થતા હોય છે. ત્યારે હવે પાકા ટ્રાફિક બુથ બનાવવામાં આવતા આ તમામ સમસ્યાઓનો ઉકેલ આવી જશે.