ઉકેલ ક્યારે..?ક્યાંક મલ્ટી લેવલ પાર્કિગ બંધ હાલતમાં ક્યાંક પાર્કિગ ફી નામે ઉઘરાવાય છે નાણાં

અમદાવાદમાં ટ્રાફિક સમસ્યાને નિવારવા ગુજરાત હાઈકોર્ટે AMC અને ટ્રાફિક પોલીસની ઝાટકણી કાઢી હોવા છતાં કોર્પોરેશનની ઉદાસીનતા જોવા મળી છે. ત્યારે VTVની ટીમે શહેરમાં મલ્ટીલેવલના પાર્કિગની શું છે સ્થિતિ તેની માહિતી મેળવી હતી. ત્યારે VTVની ટીમે કાંકરીયા તળાવ આગળ આવેલા મલ્ટીલેવલ પાર્કિગની મુલાકાત લીધી હતી.

ઉલ્લેખનીય છે કે વીટીવી દ્વારા આ મલ્ટીલેવલ પાર્કિગની મુલાકાત લેવાઇ ત્યારે જાણવા મળ્યું કે તે છેલ્લા કેટલાય સમયથી બંધ હાલતમાં પડી રહ્યું છે. આ સ્માર્ટ પાર્કિગ રૂ. 28 કરોડના ખર્ચે તૈયાર કરવામાં આવી રહ્યું છે. છતાં હજુ સુધી બંધ હાલતમાં પડી રહ્યું છે. ત્યારે અહીં સવાલ થાય છે કે રાહદારીઓ કયાં કરે પાર્કિગ. આ મલ્ટીલેવલ પાર્કિગમાં 600 ગાડી પાર્ક કરવાની ક્ષમતા ધરાવે છે. છતાં AMCની બેદરકારીથી શોભાના ગાંઠિયા સમાન પાર્કિગ પડી રહ્યું છે. 

આપને જણાવી દઇએ કે દિન પ્રતિદિન વધતી જતી ટ્રાફિકની મુશ્કેલીના કારણે હાઈકોર્ટે તંત્ર વિરુદ્ધ લાલ આંખ કરી હતી. જેના પગલે પોલીસ અને amc દ્વારા ટ્રાફિક મુશ્કેલીયો સામે પગલા લેવામાં આવ્યા હતા. ખાસ કરીને વાત કરીએ તો શોપિંગ મોલ અને મુવી થીયેટરની બહાર પુષ્કળ પ્રમાણમાં ટ્રાફિક જોવા મળતો હોય છે. આ ટ્રાફિકના કારણે રાહદારીઓને અગવડ પડતી હોય છે. વસ્ત્રાપુર ટ્રાફિક પોલીસ વિભાગ દ્વારા આ ટ્રાફિકને દુર કરવા હિમાલીયા મોલ અને અલ્ફા વન મોલ (અમદાવાદ મોલ)ને નોટીસ આપી હતી.

તો આ તરફ અમદાવાદના રાણીપ બસ ટર્મિનલમાં પાર્કિગ માટે ચાર્જ વસૂલાય હોવાનું સામે આવ્યું છે. ટુ-વ્હીલરના રૂ. 10 અને કાર પાર્કિગ માટે રૂ. 20નો ચાર્જ લેવાય છે. ચાર્જ લેવાય છે છતાં મુસાફરોને વાહન પાર્ક કરવા માટે સુવિધા મળી રહી નથી. વાહન પાર્ક કરવા માટે ચાર્જ ચુકવવો પડે છે.



રાણીપ બસ ટર્મિનલ પર ખાનગી કંપનીઓને કોન્ટ્રાક્ટ અપાયો છે. બીજી તરફ પોલીસ ખાનગી સ્થળો પર પાર્કિગ ચાર્જ મુદ્દે નોટિસ પાઠવે છે. એક તરફ GDCR મુજબ BU પરમિશન લેવા પાર્કિગ માટે જગ્યા ફરજીયાત છે. 

ત્યારે અહીં અનેક પ્રકારના સવાલો થાય છે કે અત્યાર સુધી GDCRના નિયમોનું ઉલ્લંઘન કેમ થયું? ટુ-વ્હીલર કાર પાર્કિગ માટે કેમ લેવાય છે ચાર્જ? ટુ-વ્હીલરના 10 કાર પાર્કિગ માટે રૂ. 20નો ચાર્જ કેમ લેવાય છે? પાર્કિગ માટે પૈસા છતાં સુવિધા કેમ નહીં?

અત્યાર સુધી પાર્કિગ ફીના નામે કેટલા વસૂલ્યા? પાર્કિગ પેટે જનતા પાસેથી કરોડોની લૂંટ શા માટે? ટ્રાફિક વિભાગ શા માટે કોઈ પગલા લઈ રહ્યા નથી? શું પાર્કિગ ચાર્જ ખાનગી કંપનીઓ વસુલી રહી છે? જેવા તમામ પ્રકારના સવાલ થાય છે.