મામલો બીચક્યો / અમદાવાદ : ટ્રાફિક પોલીસે દંડના 1500 માંગ્યા પણ યુવક પાસે નીકળ્યાં 500, પછી જે થયું તે ચોંકાવનારું

સાણંદ નજીકના ગોધાવી ગામમાં રહેતા આકાશભાઈ વાઘેલાએ ગાયકવાડ હવેલી પોલીસ સ્ટેશનમાં પોલીસ ફરિયાદ કરી છે. આકાશ હાલમાં એક  ખાનગી એજન્સીના ઓનલાઇન પરીક્ષા સેન્ટરમાં સુપરવાઈઝર તરીકે ફરજ બજાવે છે. ગઇ કાલે આકાશ અને તેના પરિવારના સભ્યો સાથે સંબંધીના ઘરે ભુવાલડી ખાતે સગાઈના પ્રસંગમાં ગયાે હતાે.

ત્યાંથી સાંજે આકાશ પરત આવતાે હતાે ત્યારે આસ્ટોડિયા દરવાજાથી નીકળી ઘર તરફ જઈ રહ્યાે હતાે. આકાશ ખમાસા ચાર રસ્તા આવતાં તેને ખમાસા ચાર રસ્તા પાસે ફરજ બજાવતા પોલીસ કર્મચારીઓએ રોક્યો હતો.

તે સમયે આકાશે હેલ્મેટ તથા માસ્ક પહેર્યું હતું, જેથી હાજર પોલીસ કર્મચારીએ લાઇસન્સ તથા ગાડીના કાગળ માગ્યા હતા. આકાશે લાઇસન્સ અને પીયૂસી પોલીસ કર્મચારીને બતાવ્યાં હતાં, પરંતુ પીયુસીની મુદત પૂર્ણ થઈ ગઇ હોવાથી પોલીસ કર્મચારીએ આકાશને ૧પ૦૦ રૂપિયા દંડ ભરવા માટે કહ્યું હતું, પરંતુ આકાશ પાસે દંડ ભરવા માટે પૂરતા પૈસા ન હોવાથી પોલીસ કર્મચારીને પ૦૦ રૂપિયા જ છે તેમ જણાવી બીજાં નાણાં તેના સંબંધી પાસેથી મંગાવી આપી દંડની રકમ પૂરી કરી દેવાનું જણાવ્યું હતું.

 જોકે પોલીસ કર્મચારી આકાશની કોઈ વાત માનવા તૈયાર ન હતા અને જોતજોતામાં પોલીસ કર્મચારીઓએ આકાશ સાથે ગાળો બોલી ઝઘડો કર્યો હતો. આકાશે પોલીસ કર્મચારીને ગાળો બોલવાની ના પાડતાં  પોલીસ કર્મચારીએ એકદમ ઉશ્કેરાઈ જઈ બે લાફા માર્યા હતા.

પોલીસ કર્મચારી આટલેથી અટક્યો ન હતો. તેણે આકાશના ગુપ્ત ભાગે પણ લાત મારી દીધી હતી. તે દરમિયાન આકાશે બૂમાબૂમ કરતાં આસપાસના લોકો ભેગા થઇ ગયા હતા. ત્યારબાદ આકાશે તેના પિતાને આ ઘટના અંગે જાણ કરતાં તેના પિતાએ કંટ્રોલરૂમમાં ફોન કરી પોલીસ બોલાવી હતી

પોલીસ કર્મચારીથી આકાશને ગુપ્ત ભાગે માર વાગ્યો હોવાથી દુખાવો થતાં તાત્કાલિક સિવિલ હૉસ્પિટલ ખાતે ખસેડવામાં આવ્યાે હતાે. સારવાર દરમિયાન ગાયકવાડ હવેલી પોલીસે સિવિલ હોસ્પિટલ પહોંચી આકાશનું નિવેદન નોંધ્યા બાદ અજાણ્યા ટ્રાફિક પોલીસ કર્મચારી સામે ફરિયાદ નોંધી વધુ તપાસ શરૂ કરી છે.