ટ્રાફિક પોલીસની ડ્યૂટી ટ્રાફિકના નિયમો તોડનાર વાહનચાલકોને દંડવાની કે પછી ટ્રાફિક જામ થયો હોય તે તેને ક્લિયર કરવાની અને ગેરકાયદે વાહન પાર્ક કર્યું હોય તો તેને ડીટેઇન કરવાની હોય છે. પરંતુ શહેરના ઇન્દિરાબ્રિજ સર્કલ પાસે ફરજ બજાવતા એક ટ્રાફિકના પોલીસ કર્મચારીની દબંગગીરી એ હદે છે કે તે કોઇનાં પણ પ્રિમાઈસીસમાં જઇને ફોટોગ્રાફ્સ પાડી શકે છે. જેને બચાવવા માટે ટ્રાફિકના ડીસીપી મેદાનમાં ઊતર્યા છે.
પોલીસ કર્મચારીએ ફોટોગ્રાફ્સ પાડ્યા છે
જિમની ગલીમાં પડેલાં તમામ વાહનોને ડીટેઇન કર્યાં
સીસીટીવી ફૂટેજમાં સ્પષ્ટ દેખાય છે
કોરોના વાઇરસની દહેશતના કારણે માસ્ક ફરજિયાત પહેરવા જેવા અનેક સખત નિયમો સરકારે બનાવી દીધા છે. જેના કારણે પોલીસ માસ્ક નહીં પહેરનાર લોકોને દંડવાનું શરૂ કરી દીધું છે. તો બીજી તરફ જ્યાં ગેરકાયદે પાર્કિંગ થયું હોય ત્યાં પોલીસ વાહન ડીટેઇન કરી રહી છે. ગઇ કાલે ઇન્દિરા બ્રિજ સર્કલ પાસે ફરજ બજાવતા એક ટ્રાફિક પોલીસ કર્મચારીનો વીડિયો સામે આવ્યો છે. જેમાં તે એક જિમમાં જઇને એક્સર્સાઇઝ કરતા યુવક અને યુવતીઓના ફોટગ્રાફ્સ પાડી રહ્યો છે.
જિમની ગલીમાં પડેલાં તમામ વાહનોને ડીટેઇન કર્યાં
જિમના માલિક હરેશ ક્રિશ્નાનીએ જણાવ્યું છે કે એક્સર્સાઇઝ કરવા માટે આવતાં યુવક અને યુવતીઓ ટ્રાફિકની સમસ્યા સર્જાય નહીં તે માટે જાહેર રોડ પર પાર્કિંગ કરતા નથી અને જિમની બાજુમાં આવેલી એક ગલીમાં પાર્કિંગ કરે છે. ગઇ કાલે ટ્રાફિકનો એક પોલીસ કર્મચારી બપોરના સમયમાં જિમમાં આવ્યો હતો અને એક્સર્સાઇઝ કરતા યુવક અને યુવતીઓના ફોટોગ્રાફ્સ પાડવા લાગ્યો હતો. ફોટોગ્રાફ્સ પાડ્યા બાદ પોલીસ કર્મચારી જિમની બહાર આવી ગયો હતો અને સીધો ટોઇંગ વાનને ફોન કરી દીધો હતો. થોડાક સમય બાદ ટોઇંગ વાન આવી જતાં જિમની ગલીમાં પડેલાં તમામ વાહનોને ડીટેઇન કર્યાં હતાં.
સીસીટીવી ફૂટેજમાં સ્પષ્ટ દેખાય છે
સ્થાનિક પોલીસ જિમમાં જઇને ફોટોગ્રાફ્સ પાડે તે વાત ગળે ઊતરે તેમ છે પરંતુ ટ્રાફિકનો પોલીસ કોન્સ્ટેબલ આ રીતે જિમમાં જઇને ફોટોગ્રાફ્સ પાડે તે યોગ્ય નથી. સીસીટીવી ફૂટેજમાં સ્પષ્ટ દેખાય છે કે જિમમાં સોશિયલ ડિસ્ટન્સનું પાલન થઇ રહ્યું છે જ્યારે ગણતરીના લોકો જિમમાં હતા તો પછી પોલીસ કર્મચારીએ જિમમાં જવાની જરૂર શું પડી.
પોલીસ કર્મચારીએ ફોટોગ્રાફ્સ પાડ્યા છે
ટ્રાફિક પોલીસ કર્મચારીને બચાવવા માટે ટ્રાફિકના ડીસીપી તેજસ પટેલ મેદાનમાં ઊતર્યા છે. ડીસીપી તેજસ પટેલે જણાવ્યું છે કે સ્થાનિક રહીશની ફરિયાદ હતી જેથી વાહનો ડીટેઇન કર્યાં છે જ્યારે પોલીસ કર્મચારીને ખબર હતી કે જિમમાં સીસીટીવી કેમેરા છે તેમ છતાંય તેણે જઇને ફોટગ્રાફ્સ પાડ્યા છે. જિમમાં કેટલા લોકો છે તેની જાણ માટે પોલીસ કર્મચારીએ ફોટોગ્રાફ્સ પાડ્યા છે. આ વીડિયો પોલીસ કમિશનર સંજય શ્રીવાસ્તવ પાસે જતાં તેમણે ટ્રાફિકના જોઇન્ટ કમિશનર મયંકસિંહ ચાવડાને તપાસનાે આદેશ આપ્યો છે.