અમદાવાદમાં ટ્રાફિક પોલીસ દ્વારા ઈ-ચલણ બાકી હોય તેમની પાસે હાજર સ્થળ પર દંડ ભરાવી રહી છે, દંડને લઈ પોલીસ કડક ઉઘરાણી કરી રહી છે
ઇ-મેમો માટે કડક ઉઘરાણી
પોલીસની બાકી મેમોની ઉઘરાણી
લોકોને ઉભા રાખી દંડ વસૂલાયો
અમદાવાદની ગુજરાત યુનિવર્સિટી વિસ્તારમાં પોલીસે ઈ-મેમોની ઉઘરાણી શરૂ કરી દીધી છે. જે વાહન ચાલકના ઈ-ચલણ બાકી હોય તેને લઇ પોલીસે કડક ઉઘરાણી કરી છે. ઈ-ચલણ બાકી હોય તેમની પાસે પોલીસ હાજર સ્થળ પર દંડ ભરાવી રહી છે. લોકોને ઉભા રાખી પોલીસ પોતાની ડિવાઈઝમાં જ ઈ-મેમો ચેક કરી દંડ વસૂલવામાં આવ્યો હતો.
મહત્વનું છે કે, 3 ફેબ્રુઆરીના રોજ ઈ-મેમોને લઈ કેટલાક આંકડાઓ સામે આવ્યા હતા. અમદાવાદ શહેરમાં ટ્રાફિકના નિયમોનું ચુસ્તપણે પાલન થાય અને ટ્રાફિકની સમસ્યા તેમજ અકસ્માતની ઘટનાને નિવારી શકાય તે માટે, ટ્રાફિક પોલીસ દ્વારા ઈ મેમો આપવાની પ્રક્રિયા હાથ ધરવામાં આવી છે. જેના ભાગરૂપે વિવિધ ટ્રાફિક સિગ્નલો પર કેમેરા લગાવવામાં આવ્યા છે. અત્યાર સુધી ટ્રાફિકના નિયમોના ભંગ બદલ શહેર ટ્રાફિક પોલીસે 60 લાખ ઈ-મેમો દ્વારા 172 કરોડનો દંડ ફટકાર્યો છે.
અમદાવાદીઓના નામે કરોડો રૂપિયાનું ઈ-ચલણ બાકી
પરંતુ શહેરમાં ટ્રાફિકના નિયમોનો ભંગ કરનાર લોકો દંડ જ ભરતા નથી. જેના કારણે છેલ્લા 5 વર્ષમાં ટ્રાફિકના નિયમો તોડનાર લોકો પાસેથી માત્ર 43 કરોડ રૂપિયા વસૂલ કરાયા છે. પણ 139 કરોડ જેટલી મેમાના દંડની રકમ શહેરવાસીએ ભરી જ નથી. આપને જણાવી દઈએ કે, ટોટલ દંડની રકમ 172 કરોડમાંથી સૌથી વધુ દંડ 122 કરોડ સ્ટોપ લાઈનના ભંગ બદલ ફટકારવામાં આવ્યા છે.