ચેતવણીરુપ કિસ્સો / અમદાવાદ : CCTV ફૂટેજમાં પણ કેદ ન થાય તેવી ગજબ રીતે તસ્કરોએ ગાડીના સાયલન્સરની ચોરી કરી

• અમદાવાદના કાર માલિકો માટે ચેતવણીરૂપ કિસ્સો
• નવી ગાડીઓના સાયલન્સર ચોરી કરે છે આ ગેંગ

ગાંધીનગરના શુભગ્રહ ટાટા હાઉસિંગમાં રહેતા અશ્વિનભાઈ શર્માએ સરખેજ પોલીસ સ્ટેશનમાં ચોરીની ફરિયાદ નોંધાવી છે. અશ્વિનભાઈ શાં‌તિપુરા સર્કલ પાસે કિરણ મોટર્સના ગોડાઉનમાં સ્ટોક ઇન્ચાર્જ તરીકે ફરજ બજાવે છે. કિરણ મોટર્સની મારુતિ સુઝુકી કંપનીની નવી આવેલ કારનું ગોડાઉન સાણંદ સર્કલ તરફ જવાના રોડ પર ખુલ્લી જગ્યામાં આવેલું છે.

ગોડાઉન ફરતે ફેન્સિંગ પણ કર્યું છે અને તેની દેખરેખ માટે સિક્યોરિટી ગાર્ડ પણ રાખવામાં આવેલા છે તેમજ સીસીટીવી કેમેરા તેમજ લાઈટની વ્યવસ્થા પણ કરવામાં આવી છે અને અત્રે ફરજ બજાવતા સિક્યોરિટી ગાર્ડ પણ અહીંની ઓરડીમાં જ રહે છે.

તા. ર૪ ડિસેમ્બરે અશ્વિનભાઈની કંપનીમાં કામ કરતા ભાવેશભાઈ એક ગાડીની ડિલિવરી હોવાથી કાર લેવા આવ્યા હતા ત્યારે કાર ચાલુ કરતાં ખબર પડી કે ઇકો કારમાં સાઇલેન્સર નથી, જેથી બીજી કાર પણ ચાલુ કરતાં તેમાં પણ સાઇલેન્સર ન હતું. આસપાસની ઇકો કાર જોઈ તો ત્યાં પડેલ કાર પણ સાઇલેન્સર વગરની હતી. ભાવેશભાઈએ અશ્વિનભાઈને આ ઘટનાની જાણ કરતાં તેઓ તાત્કાલિક ગોડાઉન પર ગયા હતા અને ત્યાં તપાસ કરતાં સફેદ કલરની રર ઇકો કારમાં સાઇલેન્સર નહોતાં.

અશ્વિનભાઈએ તેમના ગોડાઉનમાં મૂકેલા સીસીટીવી ફૂટેજ પણ ચેક કર્યા, પરંતુ તસ્કરો ગજબની તરકીબ કરી ચોરી કરી ગયા છે. ગોડાઉનના સીસીટીવી ફૂટેજમાં કોઈ ફળદાયી માહિતી ન મળતાં અશ્વિનભાઈએ પોલીસને ચોરી થયાની જાણ કર્યા બાદ ૧૪.૩૦ લાખ રૂપિયાનાં રર ઇકો કારનાં સાઇલેન્સરની ચોરી થયાની ફરિયાદ સરખેજ પોલીસ સ્ટેશનમાં નોંધાવી છે.

ઉલ્લેખનીય છે કે થોડા દિવસ પહેલાં નાના ચિલોડા વિસ્તારમાં આવેલા કારના ગોડાઉનમાં તસ્કરો એકસાથે આઠ નવીનક્કોર કારમાંથી સાઇલેન્સરની ચોરી કરી નાસી ગયા હોવાની ઘટના સામે આવી હતી. કારની  ડિલિવરી  લેવા માટે આવેલા શો-રૂમના ઇન્ચાર્જને કારના અવાજમાં ગરબડ લાગી હતી, જેથી તેણે ચેક કરતાં કારનું સાઇલેન્સર ગુમ હોવાનું સામે આવ્યું હતું.

બીજી તરફ રામોલ વિસ્તારમાં બે ઈકો કારનાં બે સાઇલેન્સરની ચોરી કરી તસ્કરો ફરાર થઇ ગયા હોવાની ઘટના સામે આવી હતી, કન્સ્ટ્રક્શન સાઇટ પર મજૂરને લઈ જવા માટે ઇકો કાર વાપરનાર સુશીલકુમારની પણ કારમાંથી સાઇલેન્સરની ચોરી થઇ હતી અને તે મામલે રામોલ પોલીસમાં ફરિયાદ નોંધાવી હતી.

મહત્ત્વની વાત તો એ છે કે અમદાવાદ ફરતે આવેલા વિસ્તારમાં જ્યાં હાઇવે ગણતરીની મિનિટોમાં પહોંચી જવાય ત્યાં આ સાઇલેન્સરની ચોરી કરતી ગેંગ સક્રિય થઇ છે. ગાડીઓનાં ગોડાઉન અમદાવાદ ફરતે હોવાના કારણે ચોરી કરવામાં સરળતા રહે છે.

શહેરમાં સાઇલેન્સરની ચોરી કરતી ગેંગ સક્રિય થતાં શહેરની ક્રાઇમ બ્રાન્ચ અને એસઓજી એજન્સીઓએ તપાસ શરૂ કરી છે. ક્રાઇમ બ્રાન્ચે ફરિયાદના આધારે આસપાસના સીસીટીવી ફૂટેજ મેળવી વધુ તપાસ હાથ ધરી છે. આ ગેંગ માત્ર ઇકો કારનાં જ સાઇલેન્સરની જ ચોરી કેમ કરે છે અને તે કરવા પાછળ શું કારણ છે તે દિશામાં અલગ અલગ પગેરું મેળવી તપાસનો દોર શરૂ કર્યો છે.