એક્શન / 72 લાખની લાંચ : મહેસૂલ મંત્રીએ કચેરીમાં જઈ બોલાવ્યો સપાટો, તમામ કર્મીઓના બદલીના આપી દીધા આદેશ

• મહેસૂલ મંત્રી રાજેન્દ્ર ત્રિવેદી એક્શન મોડમાં
• રાજેન્દ્ર ત્રિવેદીએ અમદાવાદમાં પાડ્યા દરોડા
• અમદાવાદમાં સ્ટેમ્પ ડ્યુટી કચેરીએ પહોંચ્યા

અમદાવાદમાં સ્ટેમ્પ ડ્યુટી કચેરીમા થતો ભ્રષ્ટાચાર છતો થયા બાદ મહેસૂલ મંત્રી રાજેન્દ્ર ત્રિવેદી એક્શન મોડમાં આવી ગયા છે. હાઈકોર્ટ વકીલના આરોપો બાદ રાજેન્દ્ર ત્રિવેદી ખુદ સ્ટેમ્પ ડ્યુટી ઓફિસ પહોંચી અધિકારીઑના ક્લાસ લીધા હતા. તેમજ મોટી કાર્યવાહીના ભાગરૂપે સ્ટેમ્પ ડ્યુટી ઓફિસના તમામ કર્મચારીઓની બદલીના આદેશ કરી સાંજ સુધીમાં તમામ કર્મચારીઓની બદલી કરવા ઓર્ડર આપી દીધા હતા.

કર્મચારીઑ પર તવાઈ બાદ રાજેન્દ્ર ત્રિવેદીએ શું કહ્યું?
રાજેન્દ્ર ત્રિવેદીએ સમગ્ર મામલે નિવેદન આપતા કહ્યું છે કે આ સ્પષ્ટ ભ્રષ્ટાચારનો કેસ છે, કોઇ પણ સરકારી કર્મચારી આવું કરે તે નહી ચલાવી લેવાય, અધિકારી પુરેપુરો પગાર લે છે તે ખોટુ કરે તો સાંખી પણ લેવાશે નહીં. કર્મચારીઓએ કબૂલ કર્યું છે કે અહી વધારાના માણસો બેસતા હતા આથી જો હજુ પણ કોઈ અધિકારી કો-ઓપરેટ નહી કરે તો તેમની સામે કાર્યવાહી થશે. 

શું હતો આરોપ?
અમદાવાદ ખાતે આવેલી સ્ટેમ્પ ડ્યુટી મુલ્યાંકન કચેરીમાં મોટો ભ્રષ્ટાચાર થતો હોવાના આક્ષેપો લાગ્યા છે. વકીલો પાસે જ સરકારી બાબૂઓ લાંચ માંગી રહ્યા હોવાનું સામે આવ્યું છે. સરકારી બાબુની લાંચ માંગતી એક ઓડિયો ક્લીપ સામે આવી છે. સ્ટેમ્પ ડ્યુટી મુલ્યાંકન કચેરીના અધિકારી પર છે ભ્રષ્ટાચારનો આરોપ, 1200 મકાનોની સોસાયટીમાં 1800 દસ્તાવેજ કરવા માટે લાંચ માંગવામાં આવી હતી. એક દસ્તાવેજ ના 4 હજાર રૂપિયાની લાંચ માંગવામાં આવી હતી. ડેપ્યુટી કલેક્ટર કે કે શાહ દ્વારા લાંચ માંગવામાં આવી હતી. 1800 દસ્તાવેજના 4 હજાર પ્રમાણે 72 લાખની લાંચની માંગણી કરવામાં આવી હતી. જે ઓડિયો ક્લીપ સામે આવી છે એની VTV પુષ્ટિ નથી કરતું

જુઓ કેવી રીતે મળતીયા રાખી થાય છે કટકીના સોદા

1800 દસ્તાવેજ  માટે મારી પાસે લાંચ માંગી: દિપેન દવે, એડવોકેટ, હાઇકોર્ટ 
વકીલે આરોપ કરતાં કહ્યું કે મારે પણ દસ્તાવેજની નોંધણી કરાવાની હોય છે. એક બે સોસાયટીના દસ્તાવેજ સામટા કરાવવાના હોય છે. હું એમની સાથે એ બાબતે  વાતચીતમાં ગયેલો ત્યારે એમના મળતીયા દ્વારા એક દસ્તાવેજના 7000 રૂપિયા લેખે  માગણી કરેલી જ્યારે એમને મે કીધું કે મારી પાસે 1800 દસ્તાવેજ છે. તે બાદ તે મળતીયા સાહેબ પાસે ગયેલા અને સાહેબે પણ ઈશારાથી વાત કરેલી કે 1 દસ્તાવેજના 4000માં કામ પતી જશે. આવી રીતે મારી પાસે લાંચની માંગ કરી હતી. 

મહેસૂત્ર મંત્રીને સબૂત સાથે ફરિયાદ કરતા કાર્યવાહી થઈ
ત્યારે બાદ સમગ્ર ઘટનાનું મે જે રેકોર્ડીંગ કરેલું હતું તે અને ટ્રાનસ્ક્રિપ્ટ ફરિયાદ સ્વરૂપે મે મહેસૂલ મંત્રી રાજેન્દ્ર ત્રિવેદીને મોકલેલું. તે બાદ કાર્યવાહીના ભાગ રૂપે મહેસૂલ મંત્રીએ તાત્કાલિકના ધોરણે અધિકારીને વિલંબિત કરવાની કાર્યવાહી કરી છે. મહેસૂલ મંત્રી જાહેરમાં કહી ચૂક્યા છે કે ભ્રષ્ટાચાર કરતાં અધિકારીઑના સબૂત સાથે મને જાણ કરો હાઈકોર્ટ વકીલે આવી રીતે મંત્રીને જાણ કરી હતી જે બાદ ખુદ  મહેસૂલ મંત્રી રાજેન્દ્ર ત્રિવેદી સ્ટેમ્પ ડ્યુટી કચેરીએ પહોંચ્યા હતા. જ્યાં કાર્યવાહીના ભાગ રૂપે સાંજ સુધીમાં તમામ કર્મચારીઓની બદલી કરી નાખવામાં આવી છે.