અમદાવાદ / ગુજરાતમાં નશાનો કાળો કારોબાર, ત્રણ જ દિવસમાં બે વખત ઝડપાયું ડ્રગ્સ, ૫ પેડલરો સાથે ૧૯ લાખનો મુદ્દામાલ જપ્ત

• અમદાવાદમાં 5 પેડલરો ડ્રગ્સના જથ્થા સાથે ઝડપાયા 
• 192.570 ગ્રામનો 19 લાખની કિંમતનો ડ્રગ્સ ઝડપાયો 
• બાતમીને આધારે એસઓજીની ટીમે કરી ધરપકડ 

અમદાવાદામાં છેલ્લા ત્રણ દિવસમાં બીજી વખત ડ્રગ્સનો જથ્થો પકડાયો છે. આરોપીઓ રાજસ્થાનથી ડ્રગ્સ લઈને આવી રહ્યા હતા તે સમયે તેમને ઝડપી પાડવામાં આવ્યા છે. કુલ 5 આરોપીઓને ડ્રગ્સના જથ્થા સાથે ઝડપી પાડવામાં આવ્યા છે. જેમા આ આરોપીઓએ ડ્રગ્સની હેરાફેરી માટે ગાડીમાં ચોરખાનું બનાવ્યું હતું. 

19 લાખનું ડ્રગ્સ પોલીસે ઝડપી પાડ્યું

આરોપીઓના નામ પરવેઝમીયા શેખ,મઝહરખાન પઠાણ, સાજીદહુસેન મલેક, ઇમરાન પટેલ અને મોઇનુદ્દીન કાગઝી હોવાનું સામે આવ્યું છે જેઓ ડ્રગ્સની હેરાફેરી કરી રહ્યા હતા. એસઓજીની ટીમે બાતમીને આધારે આ પેડલરોની ધરપકડ કરી છે અને આ પેડલરો પાસેથી 192.570 ગ્રામ ડ્રગ્સ જપ્ત કર્યુ છે જેની કુલ કિંમત 19 લાખ રૂપિયા થાય છે. 

બાતમીને આધારે પોલીસે જથ્થો જપ્ત કર્યો 

એસઓજીની ટીમને બાતમી મળી હતી કે સારંગપુર બ્રિજ નજીક એક ગાડીમાં ડ્રગ્સ જથ્થો લઈ આવી રહ્યા છે જેના આધારે ગાડી રોકી ચેક કરતા ગાડીમાં પહેલા કઈ મળી આવ્યું ન હતું..જે બાદ ટિમ પાસે ચોક્કસ માહિતી હોવાથી ગાડીને બરાબર ચેક કરતા ગાડીના ગિયર બોક્ષ વચ્ચે ચોરખાનું બનાવ્યું હતું..જ્યાંથી ડ્રગ્સનો જથ્થો મળી આવ્યો હતો..ડ્રગ્સની હેરાફેરી કરવા માટે પેડલરોએ નવી ગાડી લઈ અંદર ચોરખાનું બનાવી ડ્રગ્સની હેરાફેરી કરતા હતા.

6 મહિનાથી આરોપીઓ ડ્રગ્સની હેરાફેરી કરતા હતા 

ઉલ્લેખનીય છે કે ડ્રગ્સના જથ્થા સાથે પકડાયેલ પેડલરો કોઈ ડ્રગ્સ માફિયાઓ સાથે સંકળાયેલા છે તે મામલે પોલીસ તપાસ કરી રહી છે. આ આરોપીઓ છેલ્લા 6 મહિનાતી ડ્રગ્સની હેરાફેરી કરી રહ્યા હતા. જેથી આ કેસમાં અન્ય કોની કોની સંડોવણી છે તે મામલે પણ પોલીસે તપાસ હાથ ધરી છે અને ઝડપાયેલ પેડલરોની સામે કાયદેસરની કાર્યવાહી હાથ ધરી છે.