અમદાવાદ SOG ક્રાઈમે 48 ગ્રામ MD ડ્રગ્સના જથ્થા સાથે 2 આરોપીની નારોલ પાસેથી ધરપકડ કરી
અમદાવાદમાં MD ડ્રગ્સનો જથ્થો ઝડપાયો
48 ગ્રામ MD ડ્રગ્સ સાથે 2 આરોપીની ધરપકડ
આરોપીઓ રાજસ્થાનના ઝાલોરના રહેવાસી
અમદાવાદમાંથી ફરી એક વખત મેફેડ્રોન ડ્રગ્સ ઝડપાયું છે. SOG ક્રાઇમની ટીમે ચોક્કસ હકીકત આધારે 2 શખ્સોને 48 ગ્રામના MD ડ્રગ્સના જથ્થા સાથે નારોલ માંથી પકડી પાડ્યા છે. જોકે તેમની પૂછપરછ દરમિયાન રાજસ્થાનથી અમદાવાદ ડ્રગ્સ હેરાફેરી કરવા કેરિયરને 5 હજાર રૂપિયા મળવાના હોવાનો ખુલાસો થયો છે. હાલ આ કેસમાં પોલીસે ડ્રગ્સ મંગાવનાર અને ડ્રગ્સ મોકલનાર ની શોધખોળ હાથ ધરી છે.
મુળ રાજસ્થાનના ઝાલોરના આરોપીઓ ડ્રગ્સની હેરાફેરી કરતાં ઝડપાયા
પોલીસ કસ્ટડીમાં રહેલા આ બંને આરોપીઓ એમડી ડ્રગ્સની હેરાફેરી કરતા પકડાયા છે. પકડાયેલા આરોપીઓ નામ મુકેશ રાજપૂત અને મહેન્દ્ર દેવાસી છે. આ બન્ને શખ્સો મુળ રાજસ્થાનના ઝાલોરના રહેવાસી છે. અને ડ્રગ્સ કેરિયર તરીકે MDનો જથ્થો અમદાવાદમાં આપવા આવ્યા હતા. જોકે આ અંગેની હકીકત SOG ક્રાઇમની ટીમે મળતા નારોલ વિસ્તાર માંથી બંને યુવકોને ઝડપી લીધા હતા.
એક ટ્રીપ ના 5000 રૂપિયા મળતા હતા
પકડાયેલા બંને શખ્સોની પૂછપરછમાં સામે આવ્યું કે મુકેશ રાજપૂત અગાઉ અમદાવાદ અને વડોદરામાં ડ્રાઇવર તરીકે નોકરી કરી ચુક્યો હતો જેને પગલે અમદાવાદના રોડ રસ્તા થી વાકેફ હતો. જ્યારે આ ડ્રગ્સ રાજસ્થાનથી લાવી અમદાવાદમાં સરસપુર વિસ્તારમાં જાહીર નામના વ્યક્તિને આપવાનું કામ પૂરું કરવા બન્નેને એક ટ્રીપ ના 5000 રૂપિયા મળવાના હતા. પરંતુ તે પહેલાં જ SOG ક્રાઇમની ટીમે આ બન્ને શખ્સોને ઝડપી લીધા. પોલીસ પૂછપરછમાં એવું પણ ખુલાસો થયો છે કે 48 ગ્રામ MD ડ્રગની આંતરરાષ્ટ્રીય બજારમાં કિંમત આંકીએ તો 4 લાખ 80 હજારથી વધુ છે જેને પકડવામાં પોલીસને મોટી સફળતા મળી છે.
ડ્રગ્સ આપનાર ગોવિંદ ભાટીને જાપ્તામાં લેવા કવાયત
SOG ક્રાઈમે આરોપી મુકેશ રાજપૂત અને મહેન્દ્ર દેવાસીની પૂછપરછ કરતા ડ્રગ્સ આપનાર ગોવિંદ ભાટી જે રાજસ્થાન નો રહેવાસી છે તેનું નામ સામે આવતા તેની પણ ધરપકડ કરવાની દિશામાં તજવીજ હાથ ધરી છે. મહત્વનું છે કે અમદાવાદના સરસપુર વિસ્તારમાં ડ્રગ્સ મંગાવનાર જાહિર નામનો વ્યક્તિ અગાઉપણ ડ્રગ્સ મંગાવી ચુક્યો છે. ત્યારે રાજસ્થાનના વોન્ટેડ અને ડ્રગ્સ સપ્લાયર આરોપિ ગોવિંદ ફરાર છે. ત્યારે વોન્ટેડ ગોવિંદ ભાટી અને જાહિરની ધરપકડ કરવા SOG ની ટીમે ચક્રો ગતિમાન કર્યા છે.