સાહેબ પીવે છે...! / VIDEO: અમદાવાદમાં ટ્રાફિક પોલીસ ચોકીમાં શરાબ અને કબાબની પાર્ટી કરતા કર્મચારીઓ રંગેહાથ ઝડપાયા

• અમદાવાદમાં પોલીસ ચોકીમાં જ દારુની મહેફીલ
• ટ્રાફિક કર્ચચારીઓ દારૂની મહેફીલ માણતા ઝડપાયા
• પોલીસની ટીમે ઘટના સ્થળે પહોંચીને તપાસ હાથ ધરી

પોલીસ એ એક રક્ષક તરીકે કામગીરી કરે છે. પરંતુ અમદાવાદની એક પોલીસ ચોકી જ્યાં ખુદ રક્ષકો એટલે પોલીસ કર્મીઓ જ દારુની મજા માણતા ઝડપાયા હતા. સીજી રોડ પર આવેલી સરદાર પટેલ સ્ટેડિયમ ટ્રાફિક પોલીસ ચોકીમાં જ પોલીસ કર્મચારીઓ ખુલ્લેઆમ કબાબ સાથે દારુ પીતા એક ખાનગી ન્યૂઝ ચેનલના કેમેરામાં રંગેહાથ ઝડપાયા હતા. પોલીસ ચોકીમાં દારુની બોટલ ઝડપાઈ છે, તો નોનવેજ પણ જોવા મળ્યું છે. પોલીસ કર્મીઓ દ્વારા જ આ પ્રકારે પાર્ટી કરવી સમગ્ર પોલીસ વિભાગ માટે શરમજનક બાબત છે.

કયા કર્મચારી કરી રહ્યા હતા પાર્ટી?
મળતી માહિતી અનુસાર, આ મહેફિલમાં પોલીસ કર્મચારી અને ટ્રાફિક વોર્ડન હતા. જેમાં દિનેશ પટ્ટણી, રાકેશ પટ્ટણી, સોનું પાલ અને એએસઆઇ કાંતિભાઈ સામેલ હતા. દારુ પાર્ટી કરતા હોવાના દ્રશ્યો પણ કેમેરામાં કેદ થયા છે. ગાંધીના ગુજરાતમાં રક્ષકો જ દ્વારા દારુ પીવામાં આવી રહ્યો છે. 

પોલીસની ટીમ તપાસ માટે પહોંચી પોલીસ ચોકી
આ ઘટનાને લઇને પોલીસની ટીમ ઘટનાસ્થળે પોલીસ ચોકીમાં પહોંચી હતી અને પંચનામુ કરવામાં આવ્યું હતું. પોલીસ કર્મચારીઓ અને અધિકારીઓ દ્વારા તપાસ કરવામાં આવી રહી છે. આરોપી કર્મચારીઓ સામે કાર્યવાહી કરવામાં આવી રહી છે. તમામ સામે ફોજદારી ગુનો નોંધવામાં આવશે. કોણ દારુની બોટલ લાવ્યું અને ક્યાંથી લાવ્યા તે અંગે પણ પૂછપરછ કરવામાં આવશે.

આ પ્રકારના પોલીસ કર્મચારીઓ સામે થશે કાર્યવાહીઃ શહેર પો.કમિ.
અમદાવાદ પોલીસ કમિશનરનું કહેવું છે કે, અમદાવાદ પોલીસ દારુબંધીનો અમલ કરાવવા માટે કામ કરી રહી છે. દારુબંધીના કાયદાનો ભંગ કરનારા આ પ્રકારના પોલીસ કર્મચારીઓ સામે કાયદેસરની કાર્યવાહી કરીશું.