ભવાડો / ગુસ્સે ભરાયેલો બૉયફ્રેન્ડ રિવરફ્રન્ટ પર પહોંચ્યો અને ગર્લફ્રેન્ડને જાહેરમાં ઝીંકી દીધાં 15 લાફા, કારણ ચોંકાવનારું

• પોલીસે યશવંત વિરુદ્ધ ગુનો નોંધી વધુ તપાસ હાથ ધરી
• યુવતીને ડાબા ગાલે પંદરેક લાફા ઝીંકી દીધા
• યશંવત આવેશમાં આવીને કહ્યુ કેમ તેનો ફોન ઉપાડતી નથી

શાહીબાગમાં રહેતી અને નરોડા જીઆઇડીસીમાં આવેલી એક બેન્ક શાખામાં ક્લાર્ક તરીકે ફરજ બજાવતી ૨૪ વર્ષીય યુવતીએ તેના પ્રેમી યશવંત રાણા વિરુદ્ધ રિવરફ્રન્ટ પોલીસ સ્ટેશનમાં ફરિયાદ નોંધાવી છે. યુવતી હાલમાં પીજીમાં રહે છે. તા ૧૭મી તારીખે સાંજે યુવતી તેની બેન્ક ક્લોઝ કરી શાહીબાગ ખાતેના તેના ઘરે આવવા માટે નીકળી હતી.

યુવતી અને યશવંત રાણા થોડા સમય પહેલાં જ એકબીજાનાં પ્રેમમાં પડ્યા હતા

યુવતી બેન્કમાંથી નીકળીને તે રિક્ષામાં બસ સ્ટેન્ડ પાસે આવી હતી અને ત્યાંથી શાહીબાગ ખાતે આવવા માટે બસ સ્ટેન્ડ ખાતે ઊભી હતી. તે દરમિયાન તેની સાથે અગાઉ મેમ્કો ખાતેની એસબીઆઈ શાખામાં નોકરી કરતો યશવંત રાણા બાઈક લઈને આવ્યો હતો. યુવતી અને યશવંત રાણા થોડા સમય પહેલાં જ એકબીજાનાં પ્રેમમાં પડ્યા હતા. આ યુવતી જ્યારે ઘરે જતી ત્યારે યશવંત તેનું બાઇક લઇને આવતો હતો અને તેના બાઈક પર બેસી બંને રિવરફ્રન્ટ ખાતે બેસવા આવ્યા હતા.

યશંવત આવેશમાં આવીને કહ્યુ કેમ તેનો ફોન ઉપાડતી નથી

યુવક અને યુવતી રિવરફ્રન્ટ ગાર્ડન સામે આવેલા પાર્કિંગમાં ખુલ્લી જગ્યામાં બેઠાં હતાં. ત્યારે આ યુવતીએ યશવંતને કહ્યું  કે તે તેની સાથે પ્રેમ સંબંધ રાખવા માગતી નથી. જોકે આ યુવતી છેલ્લા પંદર દિવસથી યશવંત સાથે ફોન પર વાત ન કરતી તેમજ તેનો ફોન પણ ઉપાડતી ન હતી. જેથી યશવંતે આવેશમાં આવીને કેમ તેનો ફોન ઉપાડતી નથી તે બાબતને લઇને વાત કરતાે હતાે. 

યુવતીને ડાબા ગાલે પંદરેક લાફા ઝીંકી દીધા

દરમિયાન એકબીજા સાથે બોલાચાલી ઉગ્ર થઇ ગઈ હતી. જેના કારણે યશવંતે એકદમ ઉશ્કેરાઇને યુવતીને ડાબા ગાલે પંદરેક લાફા ઝીંકી દીધા હતા.અને કહ્યું કે મારી સાથે પ્રેમસંબંધ નહીં રાખે તો જાનથી મારી નાખીશ. 

પોલીસે યશવંત વિરુદ્ધ ગુનો નોંધી વધુ તપાસ હાથ ધરી

યશવંત  યુવતીને બાઈક પર બેસાડીને તેના શાહીબાગ ખાતેના પીજી પર મૂકી ગયો હતો. યશવંત પ્રેમ સંબંધ રાખવા માટે ધમકી આપતો હોવાથી યુવતી પોલીસ કમિશનરની કચેરી ખાતે ફરિયાદ કરવા માટે ગઈ હતી. ત્યાંથી તેને રિવરફ્રન્ટ ઇસ્ટ પોલીસ સ્ટેશન ખાતે મોકલી આપતાં પોલીસે યશવંત વિરુદ્ધ ગુનો નોંધી વધુ તપાસ હાથ ધરી છે.