આળશ / વિકાસની વાતો વચ્ચે વારસાની દુર્દશા, અમદાવાદના ઐતિહાસિક એલિસબ્રિજ પર ઝાડી-ઝાંખરા અને ખાડાખડિયાનું સામ્રાજ્ય

• વિકાસની વાતો વચ્ચે વારસાની દુર્દશા 
• સંરક્ષણની વાતો માત્ર કાગળ પર
• ઐતિહાસિક બ્રિજ પર ઝાડીઝાંખરા

અમદાવાદની ઓળખ ગણાતા ઐતિહાસિક એલિસબ્રિજ એટલે કે વિવેકાનંદ બ્રિજની મરામતની વાત મહાનગરપાલિકા દ્વારા લાંબા સમયથી કરવામાં આવે છે. પરંતુ જે વારસાને લીધે હેરીટેજનું બિરુદ મળ્યું તેની જાળવણી  કરવામાં તંત્ર હજુ શુભ મુહૂર્તની રાહ જોઈ રહ્યું છે અને ઐતિહાસિક વારસાની દુર્દશા તરફ તંત્ર આંખ આડા કાન કરી રહ્યું હોય તેવો ઘાટ સર્જાયો છે.

વારસાનું સંરક્ષણ માત્ર કાગળ પર
અમદાવાદ મ્યુનિસિપલ કોર્પોરેશન શહેરના ઐતિહાસિક વારસા પર છાતી ફૂલાવીને ગૌરવ લે છે અને હેરીટેજની ગુલબાંગ પોકારે છે, પણ વાત જ્યારે વારસાના સંરક્ષણની આવે તો કામગીરી માત્ર કાગળ પર જ જોવા મળે છે. જેનો બોલતો પુરાવો એલિસબ્રિજને ગણી શકાય છે જે હાલ બંધ છે. વર્ષો જૂનો આ બ્રિજ જર્જરિત થતાં બંધ કરી દેવામાં આવ્યો હતો.  

બ્રિજ પર ઝાડી ઝાંખરા ઉગી ગયા 
બ્રિજની દુર્દશાને લઈ તંત્રની ટીકા થતાં ૨૦૧૯ માં બ્રિજ વોકવે માટે શરૂ કરવાનું સાથે સાથે નાનકડી આર્ટ ગેલેરી પણ ઊભી કરવાની વાત થઈ હતી. આ માટે કોર્પોરેશને કન્સલ્ટન્ટની નિમણૂક કરવા માટે 71 લાખ રૂપિયાની ફી ચૂકવવાનું પણ નક્કી કરવામાં આવ્યું  હતું. પરંતુ એ ઠરાવને આજે ત્રણ વર્ષ જેટલો સમય પસાર થઈ ગયો છે. પણ બ્રિજ મારમતની વાત હજુ કાગળ પર છે અને અહીં બ્રિજ પર ઝાડી ઝાંખરા ઉગી ગયા છે. એટલું જ નહી ખાડાનું પણ સામ્રાજ્ય જામ્યું છે.  આ અંગે તંત્રનું કહેવું છે કે આ મુદ્દો થોડા દિવસ પહેલા મળેલી બેઠકમાં ચર્ચાયો હતો અને જરૂર પડે મેયર ફંડનો ઉપયોગ કરીને પણ કામગીરી શરૂ કરી દેવાની સૂચના આપી દેવામાં આવી છે. હવે કામ અંગે જોવું રહ્યું!
 
મહત્વની બાબત એ છે કે, અસિત વોરા મેયર હતા ત્યારે ભાજપ દ્વારા એલિસબ્રિજ તોડવાની દરખાસ્ત લાવવામાં આવી હતી જેને લઈને ભારે હોબાળો થયો હતો આખરે ભાજપને નિર્ણય રદ કરવાની ફરજ પડી હતી.પરંતુ હવે જયારે વર્લ્ડ હેરિટેજ સીટીમાં જેના કારણે સ્થાન મળ્યું છે તે વારસો તંત્ર કેમ નથી  સાચવી રહ્યું તે સવાલ ઉભો થઇ રહ્યો છે.