અમદાવાદમાં પુરઝડપે રફ વાહન ચલાવતાં લોકોની હવે ખેર નહિ, RTOએ એક જ દિવસમાં 700 વાહન ચાલકોના લાયસન્સ રદ્દ કરી દીધા
જોખમકારક ડ્રાઇવીંગ કરતા 850 ફરિયાદો
RTOએ એક જ ઝાટકે 700 લાયસન્સ રદ કર્યા
150 વાહન ચાલકો પર લટકતી તલવાર
અમદાવાદમાં પુરઝડપે રફ વાહન ચલાવતાં લોકોની હવે ખેર નથી. કારણ કે અકસ્માત કરીને નિર્દોષ લોકોના મોત નિપજાવવનારા સામે અમદાવાદ RTOએ લાલ આંખ કરી છે. એક જ દિવસમાં 700 વાહન ચાલકોના લાયસન્સ રદ્દ કરી દીધા છે. હજુ 150 વાહન ચાલકો સામે લટકતી તલવાર હોવાનુ RTO ઓફિસના અધિકારી તરફથી જાણવા મળ્યુ છે. લાયસન્સ રદ્દ કર્યા બાદ પણ વાહન ચાલક ડ્રાઇવીંગ કરતો ઝડપાશે તો તેની સામે કાયદાકીય કાર્યવાહી પણ કરવામાં આવશે.
ઈ-મેમો ન ભર્યો હોય તો લાઈસન્સ પણ રદ થઈ શકે
મહત્વનું છે કે, જે લોકોએ વારંવાર ટ્રાફિકના નિયમોનું ઉલ્લંઘન કર્યું છે અને ઇ-મેમો ભર્યો નથી તેવા લોકોએ ચેતવાની જરૂર છે. અમદાવાદ પોલીસે આવા વાહનચાલકો વિરુદ્ધ તવાઈ બોલાવવાનું શરૂ કર્યું છે. પોલીસના એક અંદાજ મુજબ જે વાહનચાલક 20થી વધુ વખત ટ્રાફિક નિયમોનું ઉલ્લંઘન કરતાં પકડાયા છે અને અનેક વખત ઈ-મેમો મોકલાવ્યા બાદ પણ તેમણે દંડ ભર્યો નથી. અમદાવાદ પોલીસે આવા લોકોની એક યાદી બનાવી આરટીઓ ઓફિસમાં મોકલી આપી છે. પોલીસના અંદાજ મુજબ અમુક વાહનચાલકોએ 111થી પણ વધુ વખત ટ્રાફિક નિયમ તોડ્યા છે. આવા વાહનચાલકો વિરુદ્ધ આરટીઓ લાઈસન્સ રદ કરવાની કાર્યવાહી કરશે.
વાહન ચલાવવા માટે ડ્રાઈવિંગ લાયસન્સ હોવું ફરજીયાત છે. ડ્રાઈવિંગ સાયસન્સ મેળવવા માટે લર્નિંગ લાયસન્સ માટે પરીક્ષા અને પાકા લાયસન્સ માટે ટેસ્ટ આપવો પડે છે. તે બાદ લાયસન્સ મળે છે. લાયસન્સ મળી ગયા બાદ યોગ્ય રીતે ડ્રાઈવિંગ કરવું પણ જરૂરી છે. જો રફ ડ્રાઈવિંગ કરો તો એક જ દરખાસ્તે લાયસન્સ રદ પણ થઇ જાય છે. ફેટલ અકસ્માત, હિટ એન્ડ રન, રફ ડ્રાઈવિંગ જેવા કેસમાં લાયસન્સ રદ કરવા માટેની 850 દરખાસ્ત અમદાવાદ RTO પાસે અલગ-અલગ ચાર રાજ્યની પોલીસ ધ્વારા મોકલવામાં આવી હતી.
અમદાવાદ આરટીઓએ કરી કાર્યવાહી
ગુજરાત ઉપરાંત રાજસ્થાન,ગોવાઅને મહારાષ્ટની પોલીસ ધ્વારા અમદાવાદના વાહન ચાલકોની ફરિયાદ RTOને મળી હતી. જેના કારણે તાત્કાલિક અસરથી અમદાવાદ આરટીઓ આર.એસ.દેસાઈએ કાર્યવાહી કરી છે. નજીકના દિવસોમાં અમદાવાદના રસ્તા ઉપર પણ રફ ડ્રાઇવીંગ કરનારા લોકો સામે પણ કાયદાકીય કાર્યવાહી થશે. RTO અને પોલીસ દ્વારા નિયમનું પાલન નહિ કરનાર વાહન ચાલકો પર તવાઈ શરૂ કરી છે. નિયમનું પાલન નહિ કરનાર વાહન ચાલકો વિરુદ્ધ હવે કાયદાનું ભાન કરાવવા વધુ કડક કાર્યવાહી હાથ ધરશે.