અમદાવાદ શહેરમાં જાણે અકસ્માતની વણઝાર જોવા મળતી હોય તેવું લાગી રહ્યું છે. આંતરે દિવસે કોઇને કોઇ અકસ્માતમાં કોઇ પરિવાર પોતાના સભ્યને ગુમાવી રહ્યું છે. રાજ્યમાં વહેલી સવારે જ્યાં ઠંડીનો ચમકારો જોવા મળી રહ્યો છે ત્યારે વહેલી સવારે વાહનચાલકો પણ બેફામ જોવા મળતાં હોય છે. ત્યારે આજે સવારે નારણપુરા વિસ્તારમાં ઓલાની ગાડીએ મહિલાને અડફેટે લેતાં મહિલાનું ઘટનાસ્થળે મોત નિપજ્યું છે.
શહેરના નારણપુરા વિસ્તારના જયમાલા ચાર રસ્તા પાસે વહેલી સવારે ગમખ્વાર અકસ્માત થયો છે. સવારે દૂધ લેવા નીકળેલાં વૃદ્ધા આકસ્મિક રીતે કાર અને બસની વચ્ચે આવી જતાં તેમનું કમકમાટીભર્યું મોત નીપજ્યું હતું. લોકો એકઠા થતાં કારચાલક અકસ્માત કર્યા બાદ ફરાર થઇ ગયો હતો. હાલ પોલીસે ફરિયાદ નોંધીને વધુ તપાસ હાથ ધરી છે. મળતી માહિતી પ્રમાણે અકસ્માત સ્થળ સામે આવેલા સમર્પણ ટાવરમાં રહેતાં ૬૦ વર્ષીય હર્ષાબહેન સંઘવી સવારે રોડ ક્રોસ કરીને દૂધ લેવા જતાં હતાં.
સવારના સાતેક વાગ્યાના સુમારે ગણપત યુનિવર્સિટીની બસ રોડ પર ઊભી હતી. વૃદ્ધા બસની પાછળના ભાગેથી રસ્તો પસાર કરવા જતાં હતા. આ સમયે પુરઝડપે ઓલા કેબની વેગનઆર કાર આવી હતી અને તે પાછળથી બસમાં ઘૂસી ગઈ હતી. આ અકસ્માતમાં હર્ષાબહેન કાર અને બસની વચ્ચે આવી જતાં ચગદાઈ ગયાં હતાં.
અકસ્માતમાં બસને નુકસાન થયું હતું તેમજ કારના બોનેટનો કચ્ચરઘાણ નીકળી ગયો હતો અને અકસ્માતના કારણે આસપાસના લોકો એકઠા થઇ ગયા હતા. અકસ્માતના થોડા સમય બાદ તેમનાં પરિવારજનોને જાણ થતાં તેઓ પણ ત્યાં આવી પહોંચ્યાં હતાં. હર્ષાબહેનના મોતના કારણે આખા પરિવારમાં ગમગીની વ્યાપી ગઇ છે. અકસ્માત બાદ થોડો ટ્રાફિક જામ પણ થયો હતો, પરંતુ પોલીસ આવતાં બધું થાળે પડ્યું હતું.
અહીંના સ્થાનિકોનું કહેવું છે કે આ પહેલો અકસ્માત નથી, અહીં અવારનવાર અકસ્માત થાય છે. અહીં કોઈ બમ્પ નથી અને રોડ વચ્ચે જ ટાવર આવેલો છે. નજીકમાં જ બ્રિજ હોવાથી લોકો પુરઝડપે આવે છે. અનેક વાર રજૂઆત કરી પણ તંત્ર રોડની ડિઝાઇન સુધારવામાં ઉદાસીનતા દાખવેે છે. ટ્રાફિક પીઆઈ હેમંત પટેલ જણાવ્યું કે સવારના ૬.૩૦થી ૬.૪પ વચ્ચેનો બનાવ છે. વૃદ્ધા ઝીબ્રા ક્રોસ કરી રહ્યાં હતાં ત્યારે એક બસ ઊભી હતી તેની પાછળ કાર સ્પીડમાં આવીને ઊભી રહેલી બસ સાથે અથડાઇ હતી, જેમાં વૃદ્ધા વચ્ચે આવી જતાં તેમનું ઘટનાસ્થળે જ મોત નીપજ્યું છે. કારચાલક હાલ ફરાર છે, પરંતુ ગાડી અને તેનો નંબર છે એટલે ચાલકની પણ ઓળખ કરી લેવામાં આવશે. ફરાર કારચાલકને શોધવાના પ્રયાસ હાથ ધરાયા છે.
અમદાવાદ શહેરમાં થોડા દિવસ પહેલા પાંજરપોળ ખાતે ડમ્પરે મહિલાને અડફેટે લેતા મોત નિપજ્યું હતું. આ અગાઉ પાંજરાપોળ ખાતે જ BRTS બસ ચાલકે બાઇક ચાલકને અડફેટે લેતા બે લોકાનાં મોત થયા હતા. ત્યારે હવે ફરી એક વખત અકસ્માતમાં એક મહિલાનું મોત થયું છે.