નિયમ / BRTS કો‌રિડોરમાંથી પસાર થતાં ઇમર્જન્સી વાહનો માટે RFID ટેગ ફરજિયાત કરાયા

• BRTS કો‌રિડોરમાંથી પસાર થતાં ઇમર્જન્સી વાહનો માટે પણ નિયમ
• RFID ટેગ ફરજિયાત લગાવવું પડશે 
• ઉસ્માનપુરા ખાતેની ઓફિસ પરથી ભરવું પડશે ફોર્મ 

બીઆરટીએસ કો‌રિડોરમાંથી હાલમાં ગુજરાત એસ.ટી. બસ, ફાયર વિભાગનાં વાહન, પોલીસ વિભાગનાં વાહન તેમજ એમ્બ્યુલન્સને પસાર થવાની છૂટ અપાઇ છે. એસટી બસ સિવાયનાં ફાયર, એમ્બ્યુલન્સનાં વાહન, ઇમર્જન્સી વાહન ગણાતાં હોઇ આ વાહનોનો બીઆરટીએસ કો‌રિડોરમાં પ્રવેશ ચાલુ રખાયો છે.

ઇમર્જન્સી વાહનોએ ફર‌િજયાતપણે RFID  ટેગ લગાવવા ફરજીયાત 

જોકે તંત્ર દ્વારા બીઆરટીએસ કો‌રિડોરમાં અકસ્માત થતા રોકવા ઓટોમેટિક સ્વિંગ ગેટ લગાવવાની કામગીરી ચાલી રહી હોઇ એસ.ટી બસ તેમજ ઇમર્જન્સી વાહનોએ ફર‌િજયાતપણે આરએફઆઇડી ટેગ લગાવવાના રહેશે.

ઉસ્માનપુરા ખાતેની ઓફિસ પરથી ભરવું પડશે ફોર્મ 

જાણકાર સૂત્રો કહે છે, ઇમર્જન્સી વાહનોને ટેગ પૂરા પાડવા માટે જે તે બસ સ્ટેશનના ગેટ પર ખાસ કર્મચારી હાજર રહેશે એટલે ઇમર્જન્સી વાહન તો બીઆરટીએસ કો‌રિડોરમાંથી પસાર થઇ શકશે, જોકે એસટી બસને કો‌રિડોરમાંથી પસાર કરાવવા ઉસ્માનપુરા ખાતેના ડો.રમણભાઇ પટેલ ભવનની BRTS ઓફિસમાં જરૂરી પુરાવા સાથે નિયત ફોર્મ ભરી RFID ટેગ મેળવવાના રહેશે.

અનિચ્છનીય ઘટના બને તો જવાબદારી વાહનચાલકની

જોકે સત્તાવાળાઓએ ટેગ મેળવવા માટેની કોઇ અંતિમ તારીખ નક્કી કરી નથી, પરંતુ ટેગ મેળવ્યા વગર પસાર થતાં વાહનોથી કોઇ અનિચ્છનીય ઘટના બને તો તેની પૂર્ણ જવાબદારી જે તે વાહનચાલકની રહેશે. દરમ્યાન BRTSના સત્તાવાળાઓએ આસ્ટોડિયા રોડ પરના બીઆરટીએસ કો‌રિડોર પર તિલકબાગ સહિત બે બસ સ્ટેશન પર પ્રાયોગિક ધોરણે ઓટોમેટિક સ્વિંગ ગેટ લગાવવાની દિશામાં હિલચાલ આરંભી છે.