રેડ એલર્ટ / ગરમીનો પારો આંબશે 45 ડિગ્રીએ, AMC દ્વારા પીવાનાં પાણી સહ થઇ રહ્યું છે ORS પેકેટનું વિતરણ

મહત્વનું છે કે હાલમાં સમગ્ર ગુજરાતમાં ભર ઉનાળાની કાળઝાળ ગરમી પડી રહી છે. ત્યારે અમદાવાદમાં પણ લોકો કાળઝાળ ગરમીનો સામનો કરી રહ્યાં છે. અંગ દઝાડતી આ ગરમીમાં લોકો ત્રાહિમામ પોકારી ઉઠ્યાં છે. અમદાવાદમાં રેડ એલર્ટ જાહેર કરી દેવાયું છે. આ ગરમીમાં સિવિલ હોસ્પિટલમાં દર્દીઓ પણ પરેશાન થઇ ઉઠ્યાં છે. બીજી બાજુ ગરમીનાં કારણે સિવિલમાં ચોકીદારોની હાલત પણ ખરાબ છે. ચોકીદારોને કેબિન તો મળ્યું છે પરંતુ તેનાં પર તાળું મારી દેવાયું છે. ત્યારે ગરમીથી બચવા માટે સિવિલનાં ચોકીદારો પુંઠાનો સહારો લઇ રહ્યાં છે. ત્યારે સિવિલની રખેદારી કરતા ચોકીદારોનું પણ ધ્યાન સિવિલ તંત્રે રાખવું જરૂરી છે.

ત્યારે ઉલ્લેખનીય છે કે તમને જણાવી દઇએ કે આગામી સમયમાં હજુ પણ ગરમી વધી શકે તેવી હવામાન વિભાગ દ્રારા આગાહી પણ કરવામાં આવી છે. હવામાન વિભાગે આપેલી આગાહીનાં ભાગરૂપે તંત્ર દ્વારા લોકોને કામ સિવાય આ ધકધકતા અંગારા જેવાં તડકામાં બહાર ન નીકળવાની સલાહ પણ આપવામાં આવી છે.

જો કે અમદાવાદમાં રેડ એલર્ટનાં પગલે કોર્પોરેશન દ્રારા બગીચાઓને પણ 11 વાગ્યા સુધી ચાલુ રાખવાનો નિર્ણય કરવામાં આવ્યો છે. ઉપરાંત અર્બન હેલ્થ સેન્ટરો, બીઆરટીએસનાં બસ સ્ટેન્ડ તેમજ કેટલીક જાહેર જગ્યાઓ પર એનર્જી ડ્રીન્કની તેમજ છાશ-પાણીની પણ વ્યવસ્થા કરવાનું નક્કી કરવામાં આવ્યું છે. આ ઉપરાંત BRTS બસ સ્ટેન્ડ પર ORS પેકેટનું વિતરણ પણ કરવાની વ્યવસ્થા ગોઠવવામાં આવી છે.