‘જાગતે રહો!’ આ સ્લોગન સાથે કડકડતી ઠંડી વચ્ચે પણ અમદાવાદ શહેરને સુરક્ષિત રાખવા માટે પોલીસે ખાસ ‘ઓપરેશન’ શરૂ કર્યું છે. પોલીસે ચોરીની ઘટનાઓને રોકવા માઇક્રોલેવલ પ્લાનિંગ ઘડી કામગીરી શરૂ કરી છે.
કડકડતી ઠંડી વચ્ચે પણ શહેરને સુરક્ષિત રાખવા પોલીસનું ‘ઓપરેશન જાગતે રહો’
સીસીટીવી કેમેરા કાર્યરત કરવાની સૂચના પણ અપાઈ
સિક્યોરીટી ગાર્ડને આખી રાત જાગી એલર્ટ રહેવા પ્રેમથી સમજાવી રહી છે
‘જાગતે રહો!’ આ સ્લોગન સાથે કડકડતી ઠંડી વચ્ચે પણ અમદાવાદ શહેરને સુરક્ષિત રાખવા માટે પોલીસે ખાસ ‘ઓપરેશન’ શરૂ કર્યું છે. અમદાવાદ ઠંડીમાં ઠૂંઠવાયું છે ત્યારે તસ્કર ટોળકીઓ ચોરી કરવા સક્રિય થઈ છે તેવા સંજોગોમાં પોલીસે ચોરીની ઘટનાઓને રોકવા માઇક્રોલેવલ પ્લાનિંગ ઘડી કામગીરી શરૂ કરી છે. શહેરને તસ્કરોથી બચાવવા પોલીસ મોડી રાતે મોટા ભાગની સોસાયટી અને ફ્લેટના સિક્યોરીટી ગાર્ડને આખી રાત જાગવા અને એલર્ટ રહેવા પ્રેમથી સમજાવી રહી છે. આ ઉપરાંત સીસીટીવી કેમેરા કાર્યરત કરવા સોસાયટી અને ફ્લેટના ચેરમેન, સેક્રેટરી સહિતના હોદ્દેદારોને સૂચના પણ આપી રહી છે.
ઉલ્લેખનીય છે કે તાજેતરમાં જ શહેરના બોપલ વિસ્તારમાં આવેલા સ્વાગત ગ્રીન વિલેજમાંથી તસ્કરો રૂ. ૧૭.૮૦ લાખની મતાની ચોરી કરી ફરાર થઈ ગયા હતા. આ ઉપરાંત શહેરના વિવિધ વિસ્તારોમાં પણ ચોરીના અનેક બનાવો બની રહ્યા છે. ચોર ટોળકીનું ‘હિટ લિસ્ટ’ પોલીસે તૈયાર કર્યું
ચડ્ડી-બિનયાનધારી, ચીખલીકર ગેંગ, સ્પાઇડર ગેંગ સહિત સંખ્યાબંધ ચોરી કરતી ગેંગ સક્રિય છે, જેને રોકવા માટે પોલીસે તેમનું લિસ્ટ બનાવ્યું છે. ચોરીના ગુનામાં જામીન પર છૂટીને આવેલા તસ્કરોની વિગત પણ પોલીસે તૈયાર કરી છે, જેમના પર ખાસ વોચ રાખવામાં આવશે. જેલમાં કેટલા આરોપીઓ ગયા છે તેની પણ ડીટેઇલ પોલીસ તૈયાર કરશે. વારંવાર ચોરીના ગુનામાં સંડોવાયેલા આરોપીઓની પણ વિગતો પોલીસ પાસે રહેશે.
શિયાળો આવે એટલે તસ્કરો ચોરી કરવા સક્રિય થાય છે
શિયાળો આવે એટલે તસ્કરો ચોરી કરવા સક્રિય થતા હોય છે, જેને રોકવા માટે પોલીસ પણ એડીચોટીનું જોર લગાવે છે. કડકડતી ઠંડીની શરૂઆત થઇ ગઇ છે ત્યારે અમદાવાદીઓ વહેલા સૂઇ જતા હોય છે. શિયાળામાં રજાઇ ઓઢીને સૂઇ ગયેલા મોટા ભાગના લોકો સામાન્ય અવાજ આવે તો પણ ઊઠીને જોવાની તસ્દી લેતા નથી, જેના કારણે તસ્કરો ફાવી જતા હોય છે. મોડી રાતના એક વાગ્યાથી લઇને વહેલી પરોઢ સુધી તસ્કરો ચોરીની ઘટનાને અંજામ આપીને નાસી જતા હોય છે. ઠંડીમાં પોલીસનો બંદોબસ્ત પણ ઓછો હોવાના કારણે તેમને ચોરી કરવી આસાન થઇ જાય છે. ચોરીની ઘટનાને રોકવા માટે માઇક્રોલેવલે પ્લાનીંગ કરી લીધું છે
તસ્કરોના પ્લાનીંગ પર પાણી ફેરવી દેવા માટે હવે પોલીસ પણ મેદાનમાં ઊતરી છે. અમદાવાદ પોલીસે ચોરીની ઘટનાને રોકવા માટે માઇક્રોલેવલે પ્લાનીંગ કરી લીધું છે. અમદાવાદ પોલીસ મોડી રાતે સતત પેટ્રોલિંગ કરી રહી છે અને સોસાયટી તેમજ ફ્લેટના સિક્યોરિટી ગાર્ડને જાગતા રહેવા માટે પ્રેમથી સમજાવી રહી છે. આ સિવાય મોડી રાતે કોઇ શંકાસ્પદ વ્યક્તિ ફરતી હોય તો તેની ગતિવિધિ પર વોચ રાખવી તેમજ પોલીસને તરત જ જાણ કરી દેવી તેવું પણ સમજાવવામાં આવ્યું છે. પોલીસ સોસાયટી અને ફ્લેટ બહાર પેટ્રોલિંગ કરી રહી છે
સોસાયટી કે ફ્લેટમાં લગાવેલા સીસીટીવી કેમેરા ચાલુ છે કે બંધ છે તે મામલે પણ પોલીસ સોસાયટીના ચેરમેન અને સેક્રેટરી સાથે ચર્ચા કરવામાં આવે છે. જો કેમેરા બંધ હોય તો ચાલુ કરવા માટે જણાવાય છે અને કેમેરા નહીં લગાવેલા હોય તો તરત જ કેમેરા ઇન્સ્ટોલ કરવાનું સૂચન કરવામાં આવે છે. સિક્યોરિટી ગાર્ડને એક્ટિવ રહેવા માટેની સૂચના બાદ પણ પોલીસ સોસાયટી અને ફ્લેટ બહાર પેટ્રોલિંગ કરી રહી છે.
આ મામલે સેક્ટર-૧ના જોઈન્ટ પોલીસ કમિશનર (જેસીપી) નીરજ બડગુજરે જણાવ્યું છે કે, પોલીસ અવારનવાર સિક્યોરિટી તેમજ સોસાયટીઓના ચેરમેન-સેક્રેટરીને એલર્ટ રહેવા સમજાવતી હોય છે.