સ્પષ્ટતા / 'કોઈ પણ દરોડા પોલીસ દ્વારા પાડવામાં આવ્યા નથી', AAPના દાવા બાદ અમદાવાદ પોલીસનો ખુલાસો

• AAP ઓફિસ પર પોલીસની રેડના દાવા બાદ ખુલાસો
• અમદાવાદ પોલીસે રેડના દાવાને ફગાવ્યો
• ટ્વીટ કરી અમદાવાદ પોલીસે દાવો ફગાવ્યો

ગુજરાતના AAPના કાર્યાલય પર પોલીસે રેડ પાડી હોવાનો ગોપાલ ઈટાલીયા, ઇસુદાન ગઢવી અને અરવિંદ કેજરીવાલે ટ્વિટ કરીને દાવો કર્યો હતો. જોકે,  અમદાવાદ પોલીસે આ દાવાને ફગાવ્યો છે અને ટ્વિટ કરીને આ મામલે ખુલાસો કર્યો છે. અમદાવાદ પોલીસે જણાવ્યું છે કે, 'ગઈકાલે આમ આદમી પાર્ટીની ઓફિસે પોલીસે રેડ કરી છે તેવા સમાચાર સોશિયલ મીડિયા દ્વારા જાણવા મળેલ છે. આવા પ્રકારની કોઈ પણ રેડ શહેર પોલીસ દ્વારા કરવામાં આવી નથી.'

ગઈકાલે આમ આદમી પાર્ટીની ઓફિસે પોલીસે રેડ કરી છે તેવા સમાચાર સોસીયલ મીડિયા દ્વારા જાણવા મળેલ છે.
આવા પ્રકારની કોઈ પણ રેડ શહેર પોલીસે દ્વારા કરવામાં આવી નથી.

— Ahmedabad Police 👮‍♀️અમદાવાદ પોલીસ (@AhmedabadPolice) September 12, 2022

ઇસુદાન ગઢવી અને ગોપાલ ઈટાલીયાએ દરોડા પાડ્યાનો કર્યો હતો દાવો

ગતરોજ આમ આદમી પાર્ટીના નેશનલ જોઇન્ટ જનરલ સેક્રેટરી ઇસુદાન ગઢવીએ ટ્વીટ કરીને દાવો કર્યો હતો કે, 'કેજરીવાલજીના અમદાવાદ પહોંચતા જ ગુજરાત પોલીસે આમ આદમી પાર્ટીની અમદાવાદ ઓફિસ પર દરોડા પાડ્યા. બે કલાક સુધી શોધખોળ હાથ ધરી. કંઈ મળ્યું નહીં. કહ્યું કે ફરી આવીશું.' 

केजरीवाल जी के अहमदाबाद पहुँचते ही आम आदमी पार्टी के अहमदाबाद ऑफ़िस पर गुजरात पुलिस की रेड। दो घंटे तलाशी लेकर चले गए। कुछ नहीं मिला। बोले फिर आयेंगे।

— Isudan Gadhvi (@isudan_gadhvi) September 11, 2022

આ રેડ મામલે આપના પ્રદેશ પ્રમુખ ગોપાલ ઈટાલીયાએ પણ ટ્વિટ કરીને જણાવ્યું હતું કે, 'ગઈકાલે આમ આદમી પાર્ટીની ડેટા ઓફિસ ઉપર પોલીસે રેઈડ કરી હતી અને આખી ઓફિસમાં તમામ કબાટ, ડ્રોઅર, કોમ્પ્યુટર, ડાયરી વગેરે ચેક કર્યા હતા. ડેટા ઓફિસ ચેક કરનાર પોલીસનું નામ પૂછતાં તેઓએ નવરંગપુરા પોલીસ સ્ટેશનમાંથી હિતેષભાઈ તેમજ પારસભાઈ અને એક અજાણ્યો વ્યક્તિ હોવાનું જણાવ્યું હતું.'

જે બાદ દિલ્હીના મુખ્યમંત્રી અને આપના રાષ્ટ્રીય સંયોજક અરવિંદ કેજરીવાલે ટ્વીટ કર્યું હતું. જેમાં તેઓએ જણાવ્યું હતું કે,  'ગુજરાતની જનતા તરફથી મળી રહેલા જંગી સમર્થનથી ભાજપ સંપૂર્ણ હચમચી ગયું છે. ગુજરાતમાં "આપ" ની તરફેણમાં વાવાઝોડું ફુંકાઈ રહ્યું છે. દિલ્હી બાદ હવે ગુજરાતમાં પોલીસ રેડ પડી છે. દિલ્હીમાં પણ કંઇ ના મળ્યું અને ગુજરાતમાં પણ કંઇ નહીં મળે. અમે કટ્ટર દેશભક્ત લોકો છીએ.' આ મુદ્દે પોલીસે નિવેદન આપતા જણાવ્યું હતું કે, 'આવી કોઇ રેડ પાડવામાં નથી આવી.'