ટો કરેલાં વાહનો છોડાવવાં 'ચા-પાણી'નો વ્યવહાર કરવો જ પડશે. પોલીસ કર્મચારીએ કહ્યું કે આમ તો ૭૫૦ રૂપિયા મેમો થાય છે પરંતુ તમે ૧૦૦ રૂપિયા આપી દેશો તો વાહન છૂટી જશે.
અમદાવાદમા પોલીસમાં વાહન મેમોના નામે થતો ભ્રષ્ટાચાર
750 રૂ. મેમોના બદલે 100 રૂપિયા માગ્યા
ખિસ્સા ગરમ કરતાં ભ્રષ્ટાચારીઓ ક્યારે દંડાશે?
નો પાર્કિંગ ઝોનમાંથી ટો કરેલાં વાહનોનો મેમો આપવાની જગ્યા પર પોલીસ કર્મચારીઓ વાહનચાલકો પાસેથી ચા પાણીનો વ્યવહાર કરતા હોવાના અનેક કિસ્સા બની રહ્યા છે. ગઇ કાલે મીઠાખળી સર્કલ પાસે ટો કરેલાં વાહનને છોડવા માટે પોલીસ કર્મચારીએ ૧૦૦ રૂપિયા માગ્યા હોવાની ઘટના સામે આવી છે. આમ તો ૭૫૦ રૂપિયા મેમોના થાય છે પરંતુ તમે વિજયને ૧૦૦ રૂપિયા આપી દેશો તો વાહન છૂટી જશે તેવું પોલીસ કર્મચારીએ વાહનચાલકના ઓળખીતાને કહ્યું હતું.
સમગ્ર મામલો કેવી રીતે બહાર આવ્યો?
શહેરના લો ગાર્ડન ખાતે ગઇ કાલે સાંજે એક યુવતી નો પાર્કિંગ ઝોનમાં પોતાનું ટુ વ્હીલર પાર્ક કરીને ચાલવા માટે ગઇ હતી ત્યારે ટોઇંગવાન આવી હતી અને તેનું ટુ વ્હીલર ડીટેઇન કરી લીધું હતું. યુવતી ચાલીને પરત તેના ઘરે જવા માટે નીકળી ત્યારે તેનું વાહન નહીં મળતાં તે ટેન્શનમાં આવી ગઇ હતી તે સમયે ગાર્ડનની બહાર ખાણી પીણીની લારી લઇને ઊભેલાં એક બહેને યુવતીને કહ્યું હતું કે તમારું વાહન પોલીસવાળા ક્રેનમાં મૂકીને લઇ ગયા છે. યુવતી રિક્ષામાં બેસીને સીધી મીઠાખળી છ રસ્તા પાસે પહોંચી જ્યાં તેનું વાહન ટો થયેલું પડ્યું હતું. યુવતીના ઓળખીતાએ ટ્રાફિક વિભાગના ઉચ્ચ અધિકારીને ફોન કરીને વાહન પરત આપી દેવા માટે ભલામણ કરી હતી. અધિકારીએ ભલામણ માની લીધી હતી અને યુવતીનું એક્ટિવા દંડ ભર્યા વગર પરત આપી દેવાની બાંયધરી આપી હતી.
ઓળખાણ આપી તો રૂપિયા લીધા વગર જ વાહન છોડી દીધું
તો બીજી તરફ યુવતીના ઓળખીતાએ ટોઇંગવાનના ઇન્ચાર્જ અને ટ્રાફિક પોલીસમાં ફરજ બજાવતા એએસઆઇને પણ ફોન કરીને ભલામણ કરી હતી. એએસઆઇએ વાહન આપી દેવાના બદલામાં સો રૂપિયા ચા પાણીના માગી લીધા હતા. પોલીસ કર્મચારીએ યુવતીના ઓળખીતાને ફોન પર કહ્યું હતું કે ૭૫૦ રૂપિયાનો મેમો થાય છે પરંતુ તમે વિજયને ૧૦૦ રૂપિયા આપી દેશો તો વાહન આપી દેશે. ત્યારબાદ ટ્રાફિકના અધિકારીએ એએસઆઇને ફોન કર્યો તો ૧૦૦ રૂપિયા પણ લીધા વગર ટુ વ્હીલર છોડી દીધું હતું.
ટોઇંગવાનના ચાલકો ડાયરેક્ટ વહીવટ કરે છે
આ ઘટના પરથી એક વાત નક્કી છે કે જો કોઇ પણ જગ્યાએ વાહન ટો થાય તો પોલીસ કર્મચારીઓને મેમો ફાડવાની જગ્યાએ ચા પાણીના રૂપિયા લેવામાં વધારે રસ હોય છે. અમદાવાદમાં ટોઇંગવાનનો કોન્ટ્રાક્ટ અપાયો છે. જેમાં કામ કરતા કર્મચારીઓ આડેધડ લોકોનાં વાહનો ઉઠાવીને વાનમાં મૂકતા હોય છે. પોલીસ ખાતાની આ ક્રેનમાં ઉપરની આવક લેવા માટે તે વાહનચાલકને મેમો આપતા નથી જેના કારણે સરકારને પણ નુકસાન થાય છે.
100થી 200 રૂપિયામાં પતાવટ કરી લોકો જતા રહે છે
નો પાર્કિંગ ઝોનમાં વાહન પાર્ક કરવું ગેરકાયદે ગણવામાં આવે છે. જેના કારણે ટ્રાફિક પોલીસ વાહન ટો કરે છે. વાહનચાલકને નિયમોનું ભાન થાય તે માટે ૭૫૦ રૂપિયાનો મેમો આપવામાં આવતો હોય છે પરંતુ મોટાભાગના પોલીસ ચા પાણીના રૂપિયા લઇને વાહન છોડી દેતા હોય છે. વાહનચાલકો પણ મેમો ફડાવવાની જગ્યાએ પોલીસ કર્મચારીઓને ૧૦૦, ૨૦૦ રૂપિયા આપીને જતા રહેતા હોય છે.
ટુ વ્હીલરના ૧૦૦ અને કારના ૨૦૦ રૂપિયા
ટુ વ્હીલર ટો થાય તો ૭૫૦ રૂપિયાનો મેમો આપવામાં છે જ્યારે કાર માટે એક હજાર રૂપિયાનો મેમો છે પરંતુ પોલીસ કર્મચારીઓનો ચા પાણી કરવા માટેનો ભાવ ફિક્સ હોય છે. ટુ વ્હીલર માટે ૧૦૦ અને કાર માટે ૨૦૦ રૂપિયા છે.જો તમે પોલીસ કર્મચારીને રૂપિયા આપી દો તો મેમો ફાડ્યા વગર વાહન આપી દેવામાં આવે છે.