ગુપ્ત રીતે ચાલતા હુક્કાબાર પર પોલીસે તવાઇ બોલાવતા અમદાવાદમાં યુવાનો હવે ઇ-સિગારેટના રવાડે ચઢ્યા છે.
હુક્કાબાર પર પોલીસનું નિયંત્રણ વધતા અમદાવાદમાં વધ્યો ઇ-સિગારેટનો ક્રેઝ
પોલીસે એક દુકાનમાં રેડ પાડી નિકોટીન યુક્ત સિગારેટ કબ્જે કરી
દુકાનદારની ધરપકડ કરી કુલ 18 હજારનો મુદ્દામાલ પોલીસે કબ્જે કર્યો
અમદાવાદમાં હુક્કાબાર પર પોલીસનો નિયંત્રણ વધતા યુવાનોમાં હવે ઇ-સિગારેટનો ક્રેઝ વધવા લાગ્યો છે. PCBએ સેટેલાઇટ વિસ્તારમાંથી એક દુકાનમાં રેડ પાડી નિકોટીન યુક્ત ઇ-સિગારેટ અને હુક્કાને લગતી સામગ્રી જપ્ત કરી એક શખ્સની ધરપકડ કરી છે. PCBએ 18 હજારનો મુદ્દામાલ કબ્જે કરી ઇ-સિગારેટનું વેચાણ કરતા લોકો સામે કાર્યવાહી હાથ ધરી છે.
સેટેલાઇટ વિસ્તારમાં દુકાનમાં રેડ પાડતા એક વેપારીની ધરપકડ
શહેરમાં પ્રથમ વખત ઇ-સિગારેટનો ધંધો કરનારા 10 લોકો સામે ધી પ્રોહિબિશન ઓફ ઇલેક્ટ્રોનિક સિગારેટ્સ એક્ટ 2019ની કલમ 7 અને 8 મુજબ ગુનો નોંધીને એક આરોપીની ધરપકડ કરી છે અને ઝડપાયેલ આરોપી પાસેથી રૂ. 2.51 લાખની ઇ-સિગારેટ અને હુક્કાબારનો મુદ્દામાલ જપ્ત કરી તેને FSLમાં મોકલવામાં આવેલ છે.
PCBએ રેડ પાડતા લિક્વિડ નિકોટીન રિફિલો પણ મળી આવી
સામાન્ય રીતે યુવાવર્ગ હુક્કાનો નશો કરવા માટે હુક્કાબારમાં જતા હતા. પરંતુ પ્રતિબંધ હુક્કાબાર પર પોલીસની તવાઈ વધતા હવે મીની હુક્કાબારની શરૂઆત ઇ-સિગારેટ રૂપમાં થઇ છે. જે યુવાનને સરળતાથી ઇલેક્ટ્રિક ઇ-સિગારેટ બજારમાં મળી રહે છે અને યુવાઓનો હવે હુક્કાની જગ્યાએ લિકવિડ નિકોટીનવાળી ઇ-સિગારેટના વ્યસની બની ગયા છે. જેના લીધે PCBએ બાતમી મળતા જ સેટેલાઇટની સ્મોકર્સ રિટેલ્સ નામની દુકાનમાં રેડ પાડી વિવિધ કંપનીની જુદી-જુદી ફ્લેવરની ઇ-સિગારેટ, લિક્વિડ નિકોટીન રિફિલ તથા તેને લગતી ડિવાઇસ અને ઇલેક્ટ્રિક રિફિલો મળી આવી હતી. આ તમામ વસ્તુઓ પ્રતિબંધિત હોવાનું સામે આવતા પોલીસે સન્ની કાકવાણી નામના શખ્સની ધરપકડ કરી છે.
ઇ-સિગારેટના કિસ્સામાં સામે આવ્યું મુંબઈનું કનેક્શન
PCB દ્વારા ઇ-સિગારેટના વેચાણ અને ખરીદીના નેટવર્કની તપાસ કરતા ગુજરાતના અલગ-અલગ જિલ્લાઓ સહિત મુંબઈનું પણ કનેક્શન તેમાં સામે આવ્યું છે. પકડાયેલ આરોપી સન્ની કાકવાણીની પૂછપરછમાં મુંબઈના અલી, મમલી અને ઐબાની પાસેથી નશાની ઇ-સિગારેટ આણંદનો ઇ-મિસ્ટ કંપનીનો હાર્દિક ત્રિવેદી કુરિયર દ્વારા મંગાવતો હતો અને આરોપી અમદાવાદના જુદા-જુદા પાન પાર્લર જેવાં કે વીજળીઘર પાસે આવેલું આશીકી પાન પાર્લર સહિત વેરાવળ અને ગાંધીનગરમાં આ જથ્થો મોકલતો હતો. મહત્વનું છે કે ઇ-સિગારેટની ફ્લેવરમાં લિક્વિડ નિકોટીન રહેલ છે અને તમામ ચાર્જિંગવાળી ઇલેક્ટ્રોનિક સિગારેટનો હુક્કાની જેમ જ ઉપયોગ થતો હોય છે. આ તમામ વસ્તુ ભારતમાં પ્રતિબંધિત હોવા છતાં નશાના વેપારીઓ તેનો ધંધો કરીને યુવાધનને બરબાદ કરી રહ્યાં છે.