મહાઅભિયાન / બાળ તસ્કરીને બ્રેક મારવા અમદાવાદ પોલીસનું ‘ઓપરેશન ટ્રાફિક સિગ્નલ’, ગરીબડા બાળકોને ઉગારવાનું સરાહનીય કામ જોઈ કરશો સલામ

• બાળ તસ્કરીને બ્રેક મારવા અમદાવાદ પોલીસનું ‘ઓપરેશન ટ્રાફિક સિગ્નલ
• ભિક્ષુક બાળકોને ઉજ્જવળ ભવિષ્ય મળે મહાઅભિયાન’ શરૂ 
• બાળ સુરક્ષા અધિકારીઓના સહકારથી હાથ ધરાયુ અભિયાન

સતત દોડતું શહેર એટલે અમદાવાદ. અહીં તમને રસ્તા પર ભીખ માગતાં માસૂમ બાળકો પણ મળી આવશે. ટ્રાફિક સિગ્નલ પર તમારી ગાડી રોકાઈ નથી કે તરત જ લાચાર ચહેરો લઇને વસ્તુ વેચવાની આડમાં કે પછી ગાડી સાફ કરીને ભીખ માગતાં બાળકોની સંખ્યા દિવસે ને દિવસે વધી રહી છે. આવાં ભિક્ષુક બાળકોને ઉજ્જવળ ભવિષ્ય મળે અને બાળ તસ્કરીનો પણ પર્દાફાશ થાય તે માટે પોલીસ એલર્ટ મોડ પર આવી ગઇ છે અને બાળ સુરક્ષા અધિકારીઓ સાથે મળીને ‘ઓપરેશન ટ્રાફિક સિગ્નલ’ નામનું ‘મહાઅભિયાન’ શરૂ કર્યું છે.. ગઈકાલે પોલીસે ચાર ભિક્ષુક બાળકોને રેસ્ક્યૂ કરીને બાળ સુરક્ષા કેન્દ્રમાં મોકલી આપ્યાં છે. 

ભીખ મંગાવતી ગેંગનો પર્દાફાશ કર્યો હતો

ગુજરાત સહિત અન્ય રાજ્યોમાં બાળ તસ્કરીના અનેક કેસો પોલીસ ચોપડે નોંધાતા હોય છે, જેમાં કેટલાંક બાળકો મળી જાય છે, પરંતુ કેટલાંક એવાં બાળકો છે, જે હજુ સુધી મળી શક્યાં નથી. પોલીસ સ્ટેશન તેમજ સુરક્ષા એજન્સીઓના ચોપડા પર અસંખ્ય બાળકો મીસિંગ છે. વર્ષ ર૦૧૯માં અમદાવાદ મહિલા પોલીસે ગુજરાત અને રાજ્ય બહારનાં બાળકોને ઉઠાવી તેમની પાસે ભીખ મંગાવતી ગેંગનો પર્દાફાશ કર્યો હતો. આ ઘટના પરથી એ સા‌િબત થાય છે કે બાળકોનાં અપહરણ પાછળ ક્યાંક ને ક્યાંક ભીખ મંગાવતી ગેંગનો પણ હાથ હોઇ શકે છે. 

પોલીસે બાળ તસ્કરી કરીને ભીખ મંગાવતી ગેંગને ધ્યાનમાં રાખીને બાળ સુરક્ષા અધિકારીઓ સાથે મળીને ‘ઓપરેશન ટ્રાફિક સિગ્નલ’ શરૂ કર્યું છે. ગઈ કાલે પશ્ચિમ વિસ્તારમાં આવેલા ટ્રાફિક સીગ્નલ પર પોલીસે સર્ચ કર્યું હતું અને ચાર બાળકોને રેસ્ક્યૂ કર્યાં હતાં. મેગા સીટી અમદાવાદમાં એક બાજુ શોપિંગ મોલ અને મ‌િલ્ટપ્લેક્સની ચમક-દમક છે તો બીજી બાજુ ટ્રાફિક સિગ્નલ પર અનેક જગ્યાએ ભીખ માગતાં માસૂમ બાળકો પણ જોવા મળે છે. રસ્તા પર ક્યાંક મહિલાઓ હાથમાં બાળકને તેડી ભીખ માગતી ફરતી હોય છે. મિસિંગ ચાઇલ્ડના ફોટોગ્રાફ્સને ભિક્ષુક બાળકો સાથે મેચ કરાશે.

બાળકોનાં બોગસ માતા-પિતા વિરુદ્ધ કાર્યવાહી થશે

પોલીસસૂત્રોના જણાવ્યા અનુસાર બાળકોની તસ્કરી કરીને તેમની પાસે ભીખ મંગાવતા હોવાનું અનેક વખત સામે આવ્યું છે. ગુજરાતમાં ગુમ થયેલાં બાળકો તેમજ અન્ય રાજ્યોમાંથી ગુમ થયેલાં બાળકોના ફોટોગ્રાફ્સને રેસ્ક્યૂ કરેલાં ભિક્ષુક બાળકો સાથે મેચ કરવામાં આવશે. જે બાળકો ટ્રાફિક સિગ્નલ પર ભીખ માગતાં મળી આવે છે તેમનાં માતા-પિતાનો સંપર્ક કરવામાં આવશે. જો બાળકોનાં માતા-પિતા બોગસ હશે તો તેમના વિરુદ્ધ કાર્યવાહી કરવામાં આવશે. 

પોક્સો એક્ટ હેઠળની કલમ ઉમેરવાનો પણ પ્લાન 
પોલીસનાં આધારભૂત સૂત્રોના જણાવ્યા અનુસાર ટ્રાફિક સિગ્નલ પર ભીખ માગવાના રેકેટમાં કાયદાની આંટીઘૂંટી કરીને ભિક્ષુકોનાં કહેવાતાં માતા-પિતા છૂટી જતાં હોય છે. ત્યાર બાદ ફરી તે જ ભીખ મંગાવવાના ધંધામાં સક્રિય થઇ જતાં હોય છે. બાળકો પાસે ભીખ મંગાવવાની પ્રવૃત્તિ બંધ થાય અને કહેવાતાં માતા-પિતા તેમજ સ્નેહીજનો વિરુદ્ધ કડક કાર્યવાહી થાય તે માટે પોક્સો એક્ટ હેઠળ ફરિયાદ કરવાનો પ્લાન પોલીસ કરી રહી છે. કાયદાના નિષ્ણાતોનાં સલાહ-સૂચન બાદ કાર્યવાહી શરૂ કરવામાં આવશે.

ચરસની ગોટી ખવડાવી બાળકને સુવાડી દેવાય છે
 
ઉચ્ચ પોલીસ અધિકારીએ નામ નહીં આપવાની શરતે જણાવ્યું છે કે ટ્રાફિક સિગ્નલ પર ક્યાંક મહિલાઓ હાથમાં બાળકને તેડી ભીખ માગતી ફરતી હોય છે. મહિલાઓના હાથમાં જે બાળક હોય છે તે આખો દિવસ સૂતું હોય છે. મહિલાઓ બાળકને ચરસની ગોટી ખવડાવી દેતી હોય છે, જેના કારણે તે આખો દિવસ સૂઇ જાય છે. તડકો, છાંયો કે વરસાદ હોય ત્યારે આ બાળક ઊઠતું નથી. ટ્રાફિક સિગ્નલ પર જો બાળક સાથે મહિલા મળશે તો તેના વિરુદ્ધ કાર્યવાહી કરવામાં આવશે. બાળક તેમજ મહિલાનો ડીએનએ ટેસ્ટ કરવામાં આવશે અને જો તે બાળક મહિલાનું નહીં હોય તો બાળ તસ્કરીનો ગુનો પણ દાખલ કરવામાં આવશે.