શહેરમાં મહિલાઓની જાહેરમાં થતી છેડતી તેમજ રોડરોમિયો દ્વારા કરાતા બીભત્સ ચેનચાળા જેવી અનેક ઘટનાઓને રોકવા માટે શહેર પોલીસ દ્વારા ૧૦૦ જેટલી નિર્ભયા વાન-કમ-પીસીઆર વાન તૈયાર કરવામાં આવી રહી છે. જેમાં વીડિયો રેકોર્ડિંગ સહિત સીસીટીવી કેમેરા જેવી અનેક સુવિધા હશે.
- નિર્ભયા પ્રોજેક્ટ અંતર્ગત 'શી' (She) ટીમ શરૂ કરવામાં આવી
- મહિલાઓની સુરક્ષા માટે 100 નિર્ભયા વાન તૈયાર થઇ રહી છે
- નિર્ભયા પ્રોજેક્ટમાં ગૃહ મંત્રાલયે રૂ. 3000 કરોડની ફાળવણી કરી
શહેરમાં જાહેરમાં મહિલાઓની છેડતી, રોડરોમિયો દ્વારા બીભત્સ હરકતો કરવી તેમજ મહિલાઓના ગળામાંથી ચેઇન સ્નેચિંગ જેવી ગંભીર પ્રકારની ઘટનાઓ દિવસે ને દિવસે વધી રહી છે, જેના કારણે મહિલાઓની સુરક્ષાના મામલે એક સવાલ ઊભો થયો છે. દિલ્હીમાં થયેલા નિર્ભયાકાંડ બાદ મહિલાઓ અને યુવતીઓની સલામતી માટે કેન્દ્ર સરકારે નિર્ભયા પ્રોજેક્ટ શરૂ કર્યો છે.
કોઇ પણ મહિલા બસમાં મુસાફરી કરતી હોય કે પછી મોલમાં ફરવા માટે ગઇ હોય કે કોઇ પણ જગ્યાએ મોડી રાત સુધી હરવા-ફરવા માટે ગઇ હોય તેવા સમયે તેને કોઇ પણ પ્રકારની મુસીબત આવે નહીં અને તે છેડતી કે બળાત્કારનો ભોગ બને નહીં તે માટે પોલીસ દ્વારા અનેક યોજનાઓ અમલમાં મુકાઇ છે.
તાજેતરમાં પોલીસ દ્વારા નિર્ભયા પ્રોજેક્ટ અંતર્ગત 'શી' (She) ટીમ શરૂ કરવામાં આવી છે, જેનો મૂળ ઉદ્દેશ મહિલાઓ-બાળકો અને વૃદ્ધોને સુરક્ષા આપીને તેમનું રક્ષણ કરવાનો છે. કોલેજ કેમ્પસ, પીજી હોસ્ટેલ, જાહેર સ્થળો, બાગ-બગીચા, શોપિંગ મોલ, રિવરફ્રન્ટ અને જાહેર જગ્યાઓ પર કોઈ પણ મહિલાઓ સાથે છેડતીના બનાવ ન બને તે માટે આ 'શી' ટીમ દિવસ-રાત સતત પેટ્રોલિંગ કરે છે. છેડતીખોરો અને રોમિયોગીરી કરતી વ્યક્તિઓને સ્થળ પર જ પકડવા માંટે આ ટીમ બનાવવામાં આવી છે, જે જાહેર સ્થળો પર મહિલાઓની સુરક્ષા કરી રહી છે. તાજેતરમાં 'શી' ટીમે કેટલાક રોડરોમિયોને અલગ અલગ જગ્યાએ પકડી પાડીને પ્રશંસનીય કામગીરી કરી છે.
હવે મહિલાઓની સુરક્ષા માટે 100 નિર્ભયા વાન તૈયાર થઇ રહી છે, જે શહેરમાં જાહેર રોડ ઉપર કોલેજ-યુનિવર્સિટીની બહાર, શાકમાર્કેટ અને અનેક જાહેર સ્થળો પર યુવતીઓની છેડતીઓની ઘટના સામે નજર રાખશે. આ નિર્ભયા વાનની ખાસિયત એ છે કે તે સીસીટીવી કેમેરાથી સજ્જ છે, જેમાં લાઇવ રેકોર્ડિંગ પણ થઇ શકે છે.
નિર્ભયા પ્રોજેક્ટના મેમ્બર અને સેક્ટર-1ના જોઇન્ટ કમિશનર ઓફ પોલીસ અિમત વિશ્વકર્માએ જણાવ્યું છે કે શહેરના કોઇ પણ વિસ્તારમાંથી કોઈ પણ મહિલાનો ફોન 100 નંબર પર અથવા 181-' મહિલા અભયમ' હેલ્પલાઇન પર આવશે કે તરત જ નિર્ભયા વાન ગણતરીની સેકન્ડોમાં તે જગ્યાએ પહોંચી જશે અને છેડતી કરનાર વ્યક્તિની અથવા તો લોકોની ધરપકડ કરી લેશે.
આ વાન ટેક્નોલોજી અને સીસીટીવી કેમેરાથી સજ્જ હશે, જેમાં મોબાઇલ ડેટા, લાઇવ રેકોર્ડિંગ અને રેડલાઇટ વાયોલેશન ડિટેક્શન પણ હશે. વાનના સીસીટીવી કેમેરાનું લાઇવ વિઝ્યુલ કંટ્રોલરૂમમાં જોઇ શકાશે. આ મામલે નિર્ભયા પ્રોજેકટના મેમ્બર અને ઝોન-પના ડીસીપી અક્ષયરાજ મકવાણાએ જણાવ્યું છે કે, વાનમાં ઓટોમેટિક નંબર પ્લેટ રેકોગ્નીશન કેમેરા લગાવાશે જેમાં જ્યારે કોઇપણ બાઇકચાલક અને કારચાલક છેડતી કે ચેઇનસ્નેચિંગ જેવી ઘટનાને અંજામ આપી ફરાર થઇ જાય તો નંબર પ્લેટના આધારે તે તરત જ ઓળખ થઇ જશે.
આ વાન 'શી' ટીમને પણ ફાળવવામાં આવશે તેવું પોલીસસૂત્રો પાસેથી જાણવા મળ્યું છે. કોઇ પણ મહિલા છેડતીનો ભોગ બની હોય તો તેને પોલીસ વાનમાં બેસાડી તેના ઘેર અથવા પોલીસ સ્ટેશન લઇ જશે. પોતાની ફરિયાદ લખાવી શકશે. નિર્ભયા પ્રોજેક્ટમાં ગૃહ મંત્રાલયે રૂ.3000 કરોડની ફાળવણી કરી હતી. મહિલાઓ અને બાળકો માટે રસ્તા પર વિશેષ કોરિડોર, સ્માર્ટ એલઇડી સ્ટ્રીટલાઇટ, વન સ્ટોપ ક્રાઇિસસ સેન્ટર અને ફોરેન્સિક તેમજ સાયબર ક્રાઇમ સેલ આ પ્રોજેક્ટના ભાગ હશે. આ પ્રોજેક્ટમાં અમદાવાદ ઉપરાંત નવી દિલ્હી, મુંબઇ, કોલકાતા, ચેન્નઇ, બેંગલુરુ, હૈદરાબાદ અને લખનૌનો સમાવેશ થાય છે.