અમદાવાદની પરિણીતા પર ગેંગરેપ પ્રકરણમાં સંડોવાયેલા બે આરોપીઓને પોલીસે ઉઠાવી લઈ તપાસ હાથ ધરી છે.
પ્રેમીના ત્રણ મિત્રોએ પરિણીતા પર આચર્યું દુષ્કર્મ
મોરબી નજીક દુષ્કર્મ આચરી આરોપી નાશી ગયા હતા
ગેંગરેપનો પર્દાફાશ થતા પોલીસે આરોપીઓની કરી ધરપકડ
અમદાવાદમાં ગેંગરેપના ગુન્હામાં સંડોવાયેલા બે આરોપીની કારંજ પોલીસે ધરપકડ કરી તેમની વિરુદ્ધ કાયદેસરની કાર્યવાહી હાથ ધરી હતી. આ ચકચારી પ્રકરણમાં આરોપીઓએ એક પરિણીત મહિલાને પ્રેમીના કહેવાથી મામાના ઘરે બોલાવી અને મોરબી પંથકમાં તેણીની ઉપર બળાત્કાર ગુજાર્યો હતો. પરિણીતા પતિને અંધારામાં રાખી પ્રમી સાથે ભાગી જવા માંગતી હતી પરંતુ પ્રેમીએ તેના મિત્રો સાથે આવવાનું કહ્યા બાદ મિત્રોએ કુકર્મ કરતા આ મામલે પરિણીતાએ ગેંગરેપની ફરિયાદ નોંધાવી હતી. ત્યારબાદ પોલીસે બે આરોપીઓની ધરપકડ કરી લઈ કાર્યવાહી હાથ ધરી છે.
પરિણીતાને કાસીન્દ્રા ગામના યુવક સાથે હતો પ્રેમસંબંધ
અમદાવાદનાં કારંજ પોલીસ સ્ટેશનમાં એક 19 વર્ષીય પરિણીતાએ ગેંગરેપની ફરિયાદ નોંધાવતા ચકચાર મચી જવા પામી હતી. જેની વિગત એવી છે કે થોડા દિવસો પહેલા પરિણીતા પતિ સાથે ઢાલગરવાડમાં ખરીદી કરવા આવી હતી. જોકે તેનાં લગ્ન પહેલા તેને કાસીન્દ્રા ગામમાં રહેતા જાવેદ મકરાણી નામનાં યુવક સાથે પ્રેમસંબંધ હતો. જાવેદે પરિણીતાને પોતાની સાથે ભાગવાનું કહેતા યુવતી તેની વાતોમાં આવી ગઈ હતી અને લાલ દરવાજા ખાતે પતિ સાથે પહોંચી હતી. ત્યારે ચક્કર આવતા હોવાનું પતિને કહેતા પતિ પાણીની બોટલ લેવા ગયો હતો. તે સમયગાળામાં યુવતી ફરાર થઈ ગઈ હતી. જે મામલે કારંજ પોલીસ મથકે જાણવાજોગ દાખલ કરવામાં આવી હતી.
પરિણીતાએ પતિને છોડીને પ્રેમી સાથે ભાગવાનું ષડયંત્ર રચ્યું
પ્રથમ પ્રેમને મેળવવા યુવતીએ પતિને છોડીને પ્રેમી સાથે ભાગવાનું ષડયંત્ર રચ્યું હતું. પરંતુ યુવતીનાં પ્રેમી જાવેદે પોતે તેને લેવા આવી શકતો ન હોવાનું જણાવી પોતાનાં મિત્રો તેને લેવા આવે છે તેમ જણાવ્યું હતુ અને સરખેજનાં ઉજાલા સર્કલ પાસે બોલાવી હતી. જ્યાં જાવેદ મકરાણીનો મિત્ર રોનક સુથાર અને તેની સાથેનાં 2 મિત્રોએ યુવતીને કારમાં બેસાડી મોરબી તરફ લઈ ગયા હતાં. જ્યાં ત્રણેય મિત્રોએ યુવતીની સાથે વરાફરતી શારિરીક સંબંધ બાંધ્યો હતો. યુવતી ગભરાઈ જતા ત્રણમાંથી બે આરોપીઓ નિકળી ગયા હતા. જ્યારે મહેશ નામનો એક આરોપી તેને લઈને રાજકોટ પહોંચ્યો હતો. જ્યાં એક હોટલમાં લઈ જઈને ફરીથી યુવતી પર બળાત્કાર ગુજાર્યો હતો.
અન્ય બે આરોપીઓને પકડવા કારંજ પોલીસે કવાયત તેજ કરી
જે બાદ પણ યુવતીનો પ્રેમી જાવેદ ન આવતા તેણે યેનકન પ્રકારે પોતાનાં પરિવારજનો સંપર્ક સાધ્યો હતો. આ દરમિયાન યુવતી રાજકોટ પહોંચી જ્યાં પોલીસ સમક્ષ હાજર થઈ પણ બળાત્કારની વાત પોલીસને ન જણાવી.ત્યાંર બાદમાં યુવતી કારંજમાં ગુમ થવા બાબતે હાજર થઈ અને બળાત્કારની હકીકત જણાવતા યુવતીની પુછપરછ કરતા તેની સાથે ગેંગરેપ થયો હોવાનું ખુલ્યું હતું. આ સમગ્ર મામલે કારંજ પોલીસે દુષ્કર્મની કલમો હેઠળ ગુનો દાખલ કર્યો હતો. જોકે આ મામલે ગુનો નોંધાતા પોલીસે અસલાલીથી ગેંગરેપનાં ગુનામાં સામેલ સરખેજનાં રોનક સુથાર અને યુવતીનાં પ્રેમી જાવેદ મકરાણીને ઝડપી લીધા છે.આ મામલે ગુનામાં સામેલ અન્ય બે આરોપીઓને પકડવા કારંજ પોલીસે કવાયત તેજ કરી છે.