સોશિયલ મીડિયા / નવું નવું નવ દિવસ: અમદાવાદ શહેર પોલીસના અનેક ફેસબુક પેજ અનિયમિત અને કેટલાકના બાળમરણ

• અમદાવાદ પોલીસના સોશિયલ મીડિયા પેજનું અપડેશન બંધ
• પોલીસના કેટલાક ફેસબુક પેજનું થયું બાળમરણ 
• અમદાવાદ પોલીસ દ્વારા અનેક ફેસબુક પેજ તૈયાર કરાયાં છે

આજના ટેક્નોસેવી અને આધુનિક યુગમાં પોલીસ પણ હાઇટેક થઇ ગઇ છે. અને અદ્યતન ટેક્નોલોજીની મદદથી ગુનેગારોને પકડવા માટે તેમજ ગુનાઈત કૃત્યોનો ભેદ ઉકેલવા માટે સક્ષમ થઇ ગઇ છે. સાયબર ક્રાઇમ હોય કે પછી કોઇ પણ ઘટના હોય પોલીસ હાઇટેક પદ્ધતિનો ઉપયોગ કરીને તેનો ભેદ ખોલી દેતી હોય છે. તો બીજી તરફ પોલીસ અને પ્રજા વચ્ચે સંકલનનો અભાવ રહે નહીં તે માટે પણ પોલીસે સોશિયલ મી‌ડિયાનો સહારો લીધો છે. પોલીસના અલગ અલગ વિભાગ દ્વારા સોશિયલ મીડિયા એકાઉન્ટ અને ફેસબુક પેજ બનાવાયાં છે, જે પાછળ તેમણે કરેલી કામગીરી તેમજ સ્થાનિકોના કોઇ પણ પ્રશ્નોનું સમાધાન ફટાફટ થઇ જાય તે માટેનો હેતુ છે. લોકોને પોલીસનો સોશિયલ મીડિયા નજીક લાવવાનો આ નવતર પ્રયોગ ખરેખર પ્રશંસનીય છે, પરંતુ આ પ્રયોગ થોડા દિવસ સુધી જોરશોરથી ચાલે છે. ત્યાર બાદ તેનું બાળમરણ થઇ જાય છે.

‘નવું નવું નવ દિવસ’ એ કહેવત પોલીસે શરૂ કરેલા ફેસબુક પેજના પ્રયોગથી ખબર પડી જાય છે. અમદાવાદ શહેર પોલીસે અનેક ફેસબુક પેજ તૈયાર કર્યાં છે. જેમાં કેટલાંક ફેસબુક પેજ હાલ સતત અપડેટ થઇ રહ્યાં છે. જ્યારે કેટલાંક ફેસબુક પેજનું બાળમરણ થઇ ગયું છે. આ ફેસબુક પેજ રેગ્યુલર અપડેટ થતાં ન હોવાથી હાલ હાસ્યાસ્પદ સાબિત થયાં છે. આઇપીએસ ઓફિસર્સની બદલીઓ થાય ત્યારે શરૂઆતના દિવસોમાં જોરશોરથી કામગીરી ચાલુ હોય છે. પરંતુ સમય જતાં તે કામગીરી પર અસર પડે છે. હાલ અમદાવાદ પોલીસ દ્વારા એવાં અનેક ફેસબુક પેજ તૈયાર કરાયાં છે, જેમનો ઉપયોગ રેગ્યુલર કરવામાં આવતો નથી.

11 ફેબ્રુઆરી, 2019ના રોજ છેલ્લી પોસ્ટ થઇ હતી. ફેસબુક પર 21 ઓક્ટોબર, 2018ના રોજ ટ્રાફિક વેસ્ટના પૂર્વ ડીસીપી સંજય ખરાતે ‘DCP Traffic West Ahmedabad’ ફેસબુક પેજ બનાવ્યું હતું, જેનો હેતુ ટ્રાફિક બાબતે લોકોમાં અવરનેસ આવે અને પોલીસની કામગીરીની લોકો નોંધ લે તે હતો. શરૂઆતમાં આ ફેસબુક પેજ રેગ્યુલર અપડેટ થતું હતું, પરંતુ 11 ફેબ્રુઆરી, 2019ના રોજ ડીસીપી ટ્રાફિક દ્વારા છેલ્લી સત્તાવાર પોસ્ટ મૂકવામાં આવી હતી એટલે કે આમ જોવા જઇએ તો પાંચ મહિનામાં જ આ ફેસબુક પેજમાં અપડેટ થતું બંધ થઇ ગયું હતું. હાલ આ પેજ પર લોકો ટૂરિઝમની એડ્વર્ટાઇઝમેન્ટ શેર કરી રહ્યા છે.

એમ ડિવિઝનનું ફેસબુક પેજ છેલ્લાં ત્રણ વર્ષથી અપડેટ જ થયું નથી. 25 સપ્ટેમ્બર, 2018ના રોજ ‘Ahmedabad City Police-M Division’ના ફેસબુક એકાઉન્ટમાં છેલ્લી પોસ્ટ કરવામાં આવી હતી, જે પોસ્ટમાં ‘રાષ્ટ્રની સેવા અને સુરક્ષાનો એકમાત્ર ધ્યેય શાંતિનો જ છે’ તેવું લખવામાં આવ્યું છે, જે પછી આ ફેસબુક એકાઉન્ટમાં અન્ય કોઇ પોસ્ટ શેર કરવામાં આવી નથી.

ડીસીપી પ્રેમસુખ ડેલુનો માત્ર ફોટો જ છે, બાકી કંઇ નહીં, 6 સપ્ટેમ્બર 2020ના રોજ ઝોન-7ના ડીસીપી પ્રેમસુખ ડેલુએ એક ફેસબુક પેજ બનાવ્યું હતું, જેમાં તેમનો ફોટોગ્રાફ અપડેટ કર્યા બાદ કોઇ પણ ઇન્ફર્મે‌ટિવ પોસ્ટ કરવામાં આવી નથી. આ ફેસબુક એકાઉન્ટ માત્ર બનાવવા ખાતર જ બનાવ્યું હોય તેવું લાગી રહ્યું છે, કારણ કે એક વર્ષ થવા આવ્યું હોવા છતાં પણ આ ફેસબુક એકાઉન્ટમાં એક પણ અન્ય પોસ્ટ મૂકવામાં આવી નથી. 

બે ફેસબુક પેજનું બાળમરણ, અચાનક બંધ કરી દેવાયાં, ઉલ્લેખનીય છે કે શહેર પોલીસનાં અન્ય બે ફેસબુક પેજ ‘ડીસીપી ટ્રાફિક ઈસ્ટ અમદાવાદ’ અને ‘ડીસીપી ઝોન-૧ અમદાવાદ સિટી પોલીસ ફોર્સ’નું પણ બાળમરણ થઈ ગયું છે. આ બંને પેજ ઓચિંતાં કોઈ કારણ વગર બંધ કરી દેવામાં આવ્યાં છે. આ બંને પેજ પરથી પણ કોઈ પોસ્ટ શેર કરવામાં આવી નહોતી.