ક્રાઇમ / અમદાવાદમાં 'રોમિયો'નો ત્રાસ વધ્યો: કોણ હોય છે આ લોકો જાણીને દંગ રહી જશો

આવા ભોગ બનનાર લોકો માટે અને રોમિયોને પાઠ ભણાવવા માટે અભયમ્ ૧૮૧ હેલ્પલાઇન આશીર્વાદ સમાન સાબીત થઈ છે. છેલ્લાં સાડા ચાર વર્ષમાં પરિણીતાઓ અને યુવતીઓને હેરાન પરેશાન કરતા ૧૪૯૭૭ જેટલા રોમિયોને પોલીસે પાઠ ભણાવ્યા હોવાનું સામે આવ્યું છે. જેમાં અમદાવાદમાં સાડા ચાર વર્ષમાં ૩૨૩૧ અને છેલ્લા છ મહિનામાં ૪૬૯ કિસ્સા નોંધાયા છે. જ્યારે ગતવર્ષે ૯૫૩ કિસ્સા બન્યા હતા. પરિણીતા અને યુવતીઓને હેરાનપરેશાન કરતા રોમિયો કોઇ ઓળખીતા, પડોશી અથવા તો કોલેજમાં સાથે અભ્યાસ કરનારા જ હોવાનું સામે આવ્યું છે. 

આજના સમયમાં વિકૃત યુવકો જાહેરમાં યુવતી અને પરિણીતાઓની છેડતી તેમજ બીભસ્ત ચેનચાળા કરવામાં સહેજ પણ ગભરાતા નથી. ત્યારે બીજી તરફ સોશિયલ મીડિયામાં પણ અજાણી યુવતી અને મહિલાઓને ફ્રેન્ડ રિકવેસ્ટ મોકલીને તેમની સાથે મેસેજ ચેટિંગ કરીને બીભસ્ત માગણી કરીને હેરાનપરેશાન કરવાના કિસ્સાઓ વધી રહ્યા છે. દરરોજ શહેરમાં અનેક કિસ્સાઓ સામે આવે છે કે જેમાં યુવતી અને પરિણીતાઓ આવા રોમિયોના ત્રાસનો ભોગ બની હોય. આજે ધણી મહિલાઓ અને યુવતી એવી છે કે સમાજની ચિંતા કર્યા વગર રોમિયોને પાઠ ભણાવવા માટે સામે આવતી હોય છે અને પોલીસની મદદ લેતી હોય છે પરંતુ તેના કરતાં વધુ યુવતી અને મહિલાઓ એવી છે કે સમાજના ડરથી પોલીસ ફરિયાદ કરવાનું ટાળી રહી છે. 

યુવતી  અને પરિણીતાનો મોબાઇલ નંબર મેળવીને રોમિયો અવારનવાર તેમને ફોન અને વોટ્સએપ મેસેજ કરીને હેરાન પરેશાન કરતા હોય અને જે રોમિયો પાસે નંબર ના હોય તે સોશિયલ મીડિયા જેમ કે ફેસબુક અને ઇન્સ્ટાગ્રામ પર મેસેજ અને વીડિયો કોલ કરીને હેરાન કરતા હોય છે. પરિણીતાના પતિ જ્યારે ઘરે હાજર હોય ત્યારે મોડી રાત્રે આવા રોમિયો વીડિયો કોલ અથવા મેસેજ કરીને હેરાન કરતા હોય છે. જેના કારણે પતિ પત્ની વચ્ચે ઝધડા પણ થતા હોય છે.

પોલીસ ફરિયાદ નહીં કરી શકનાર મહિલા અને યુવતીઓ માટે ૧૮૧નો ટેલિફોનિક સ્ટોક સેલ વરદાનરૂપ સાબીત થયાે છે. આધુનિક યુગમાં સ્માર્ટફોન લાઈફ લાઈન બન્યો છે અને યુવા પેઢી સોશિયલ મીડિયામા જ સક્રિય રહે છે, પરંતુ આ ટેકનોલોજી વરદાન તો છે, પરંતુ યુવતીઓ અને મહિલાઓ માટે શ્રાપ પણ બની છે.કારણ કે, ગુજરાતમાં દરરોજ ૧૦થી વધુ યુવતીઓ રોમિયોથી પરેશાન છે. ટેલિફોનિક કોલ કે મેસેજ અથવા તો બીભત્સ ફોટો અને વીડિયો મોકલવાના કિસ્સાઓ સતત વધી રહ્યા છે.

વુમન સેફટી માટે શરૂ કરવામાં આવેલી અભયમ્ હેલ્પલાઈનમાં યુવતીઓની હેરાનગતિના સૌથી વધુ કોલ સામે આવ્યા છે. દર મહિને ૪૦૦થી વધુ યુવતીઓ રોમિયોથી પરેશાન છે અને પોતાની સલામતી માટે મદદ માગી રહી છે. જેને લઈને અભયમ્ હેલ્પલાઈન સાથે ટેલિફોનિક સ્ટોક સેલની રચના કરવામાં આવી છે. આ સેલ દ્વારા રોમિયોથી પીડિત અનેક યુવતીઓને રક્ષણ આપીને અસામાજિક ત્તત્વો વિરુદ્ધ કાર્યવાહી શરૂ કરી કરવામાં આવી છે. 

થોડાક દિવસ પહેલા અમદાવાદની એક પરિણીત મહિલાને બીભત્સ માગણીઓ કરતા અનેક ફોન આવવાના શરુ થઇ ગયા હતા. જેમાં તેણે અભયમ્ હેલ્પલાઇનની મદદ લીધી હતી. અભયમ્ હેલ્પલાઇનની ટીમે તપાસ કરતાં જાણવા મળ્યું હતું કે આ મહિલાએ પીએનયુઝમાં નંબર લખ્યો હતો. પોલીસે ફોન કરનારને આ નંબર ડિલિટ કરવાની જાણ કરી હતી. 

આ મામલે અભયમ્ હેલ્પલાઇનના પ્રોજેક્ટ હેડ નરેન્દ્ર ગોહિલે જણાવ્યું છે કે મહિલા અને યુવતી જ્યારે અભયમ્ હેલ્પલાઈનમાં ફોન કરે ત્યારે તરત જ આ કોલ થઈ ટેલિફોનિક સ્ટોકિંગ સેલમાં ટાન્સફર થઈ જાય અને સેલમાં હાજર પોલીસ જવાન કાર્યવાહી શરૂ કરે. ફરિયાદ વગર જ યુવતીઓને રોમિયોથી છુટકારો આપવામાં આવે છે. આ સેલમાં સાત મહિલા પોલીસ અને ચાર પુરુષ પોલીસનો સમાવેશ છે. યુવતીની ફરિયાદને લઈને તેઓ રોમિયો વિરુદ્ધ કાર્યવાહી કરે છે.

જ્યાં સુધી યુવતી આ મુશ્કેલીમાંથી બહાર ના નીકળે ત્યાં સુધી તેનો સંપર્ક કરવામાં આવે છે. પુરુષ પોલીસ ચેતવણીના સૂરમાં રોમિયોને સમજાવતા હોય છે અને જો તે ના માને તો યુવતી કે મહિલાને સમજાવીને કેસ કરાવતા હોય છે. ૯૫ ટકા કેસોમાં પોલીસના ફોનથી રોમિયો સુધરી જતા હોય છે પરંતુ કેટલાક કેસોમાં છેવટે પોલીસ ફરિયાદ કરીને કાર્યવાહી કરાય છે.