સુરક્ષા અને સતર્કતા / અમદાવાદમાં સાયકલ-સ્કૂટર વેચતા કે ખરીદતા પહેલાં પોલીસ કમિશ્નરનું જાહેરનામું જાણી લેજો

• અમદાવાદ પોલીસ કમિશનર દ્વારા સાઇકલ-સ્કૂટર મામલે જાહેરનામું
• સાઇકલ, સ્કુટર ખરીદનારને ફરજિયાત બિલ આપવું પડશે
• ભવિષ્યમાં વાહનનો ઉપયોગ કરી બોમ્બ બ્લાસ્ટની ઘટના પહેલા સતર્કતા

ગુજરાતના ભૂતકાળમાં પણ સિરયલ બોમ્બ બ્લાસ્ટની ઘટનાઓ સામે આવી ચૂકી છે. અને દેશના પણ અનેક શહેરોમાં ધાર્મિક સ્થળ કે, જાહેર સ્થાન પર બોમ્બ બ્લાસ્ટ થઈ ચૂક્યા છે. આવી ઘટનાઓમાં અનેક વખત સાઇકલ અને સ્કુટરનો ઉપયોગ કરવામાં આવે છે. જેને લઈ હવે અમદાવાદ પોલીસે સતર્કતા દર્શાવી છે. ગુજરાતમાં ક્રાઈમની ઘટનાઓનું પ્રમાણ વધી રહ્યું છે. અને ભવિષ્યમાં પણ કોઈ દ્વારા આતંકી પ્રવૃતિને અંજામ આપવામાં આવે તો વાતને નકારી શકાય નહીં. ભવિષ્યની ઘટનાઓને ધ્યાનમાં રાખી અમદાવાદ પોલીસ કમિશનર દ્વારા એક જાહેરનામું રજૂ કરવામાં આવ્યું છે. જેમાં વાહનનું વેચાણ કરતા ડિલરોને ઉલ્લેખ કરાયો છે. 

પોલીસ કમિશનરના જાહેરનામામાં ઉલ્લેખ કરાયો કે, ભૂતકાળમાં જાહેર સ્થળ પર જેવા કે, રેલવે સ્ટેશન, બસ સ્ટેશન, સરકારી કચેરી, જાણીતા પર્યટક સ્થળો પર બોમ્બ બ્લાસ્ટની ઘટના બની છે. જેમાં સાઇકલ, સ્કુટર કે ફોર વ્હિલરનો ઉપયોગ કરાયો છે. અને ભૂતકાળને ધ્યાનમાં રાખી ભવિષ્યની ઘટનાઓને નકારી શકાય નહીં. જેને લઈ પોલીસ કમિશનર સંજય શ્રીવાસ્તવ દ્વારા હુકમ કરાયો છે. જેમાં સ્કુટર વેચનારા માલિકો, મેનેજરો, સંચાલકો, એજન્ટોએ વાહન અથવા સાઇકલના વેચાણ સમયે નિયમોનું ચુસ્ત પણે પાલન કરવાનું રહેશે. 

• સાઇકલ, સ્કુટર ખરીદનારને ફરજિયાત બિલ આપવું પડશે, સ્થળ પ્રત કબજામાં રાખવી
• વેચાણ લેનાર ગ્રાહકનું ડ્રાઈવિંગ લાઈસન્સ, પાનકાર્ડ કે કોઈપણ સરકાર માન્ય ઓળખકાર્ડ વેચાણ કરનારા વેપારીએ લેવો પડશે
• બિલમાં નામ, સરનામું, સંપર્ક નંબર લેવાનો રહેશે, માહિતી અધુરી રાખી શકાશે નહીં
• સાઇકલ અથવા બેટરીથી ચાલતા વાહનનો ફ્રેમ નંબર, ચેસીસ નંબર ફરજિયાત બિલ કોપી અને જમા કોપીમાં લખવાનો રહેશે
• પોલીસ કમિશનરનો આ હુકમ 20 ઓગસ્ટ 2021થી 60 દિવસ માટે અમલમાં રહેશે